អាមេរិកបាននិយាយថា "ការលក់ដែលបានស្នើឡើងនេះ គឺដើម្បីបម្រើផលប្រយោជន៍ជាតិ សេដ្ឋកិច្ច និងសន្តិសុខ ដោយគាំទ្រដល់កិច្ចខិតខំប្រឹងប្រែងបន្តដល់កោះតៃវ៉ាន់ នឹងដើម្បីធ្វើទំនើបកម្មកងកម្លាំងប្រដាប់អាវុធរបស់ខ្លួន និងដើម្បីរក្សាបាននូវសមត្ថភាពការពារដ៏គួរឱ្យជឿជាក់"។ ជាពិសេស ការលក់នេះ នឹងជួយរក្សាដង់ស៊ីតេមីស៊ីលកោះតៃវ៉ាន់ និងធានាបាននូវការត្រៀមខ្លួនសម្រាប់ប្រតិបត្តិការផ្លូវអាកាស។ តៃវ៉ាន់ អាចនឹងប្រើប្រាស់សមត្ថភាពនេះ ជាការរារាំងដល់ការគំរាមកំហែងក្នុងតំបន់ និងពង្រឹងការការពារដែនដីរបស់ខ្លួនផងដែរ។
សូមជម្រាបថា កោះតៃវ៉ាន់ជារឿយៗតែងតែលើកឡើងពីការកើនឡើងសម្ពាធយោធា ដោយទីក្រុងប៉េកាំង ដើម្បីព្យាយាម និងបង្ខំកោះតៃវ៉ាន់ ដែលគ្រប់គ្រងតាមបែបប្រជាធិបតេយ្យឱ្យទទួលយកអធិបតេយ្យភាពរបស់ខ្លួន។
សូមបញ្ជាក់ថា សហរដ្ឋអាមេរិកបានកំណត់ដោយច្បាប់ ដើម្បីផ្តល់ឱ្យកោះតៃវ៉ាន់នូវមធ្យោបាយការពារខ្លួន ទោះបីជាមិនមានទំនាក់ទំនងការទូតផ្លូវការក៏ដោយ ហើយការខឹងសម្បារតែងតែកើតមានពីសំណាក់ទីក្រុងប៉េកាំង ចំពោះសកម្មភាពរបស់អាមេរិកនេះ។ លើសពីនេះ បើយោងតាមទិន្នន័យដែលចងក្រងដោយសារព័ត៌មាន AFP បានឱ្យដឹងថា ប្រទេសចិនបានបង្កើនការដាក់សម្ពាធយ៉ាងខ្លាំងក្លារបស់ខ្លួនក្នុងរយៈពេលប៉ុន្មានឆ្នាំថ្មីៗនេះ ដោយបានបញ្ជូនយន្តហោះចម្បាំងចិនចំនួន ៩៦៩ គ្រឿង ហោះចូលទៅក្នុងតំបន់ការពារដែនអាកាសរបស់តៃវ៉ាន់ក្នុងឆ្នាំ២០២១។អត្ថបទគួរអាន
ប្រទេសចិន ចាត់ទុកកោះតៃវ៉ាន់ជាទឹកដីរបស់ខ្លួន ហើយបានប្តេជ្ញាម្តងហើយម្តងទៀតថា នឹងធ្វើការបង្រួបបង្រួមកោះតៃវ៉ាន់នៅថ្ងៃណាមួយ ហើយក៏ព្រមានប្រើកម្លាំងដែរ ប្រសិនបើចាំបាច់។
ដោយឡែក ការិយាល័យប្រធានាធិបតីកោះតៃវ៉ាន់បានកត់សម្គាល់ថា នេះគឺជាការលក់អាវុធលើកទីបីហើយ ដែលអាមេរិកលក់មកឲ្យតៃវ៉ាន់ ចាប់តាំងពីប្រធានាធិបតីសហរដ្ឋអាមេរិក លោក ចូ បៃដិន (Joe Biden) ចូលកាន់តំណែង ហើយបានបង្ហាញពីលក្ខណៈនៃទំនាក់ទំនងជាមួយកោះតៃវ៉ាន់។
អ្នកនាំពាក្យកោះតៃវ៉ាន់ លោក ហ្សាវៀរ ចាង (Xavier Chang) បាននិយាយនៅក្នុងសេចក្តីថ្លែងការណ៍មួយថា "កោះតៃវ៉ាន់នឹងបន្តបង្ហាញពីការប្តេជ្ញាចិត្តរបស់ខ្លួន ដើម្បីការពារខ្លួន និងបន្តភាពជាដៃគូសហប្រតិបត្តិការជាមួយសហរដ្ឋអាមេរិក និងប្រទេសដែលមានគំនិតដូចគ្នា" ។ កោះតៃវ៉ាន់បាននិយាយថា ខ្លួនរំពឹងថា កិច្ចព្រមព្រៀងនេះ នឹងបង្ហាញពីប្រសិទ្ធភាព ក្នុងរយៈពេលមួយខែ ខណៈដែលសហរដ្ឋអាមេរិក គឺជាអ្នកផ្គត់ផ្គង់អាវុធអន្តរជាតិ ដ៏សំខាន់របស់កោះតៃវ៉ាន់៕
អត្ថបទ៖ ម៉ុន សុកែវ
None
