លោកស្រី គីម យ៉ូជុង ដែលជាមន្ត្រីជាន់ខ្ពស់ក្នុងរដ្ឋាភិបាលនិងបក្សកាន់អំណាចកូរ៉េខាងជើងបាននិយាយថា វាគឺជា«កំហុសដ៏ធំមួយ»សម្រាប់រដ្ឋមន្ត្រីក្រសួងការពារជាតិកូរ៉េខាងត្បូងដែលបានធ្វើសុន្ទរកថា នាពេលថ្មីៗនេះ ដោយបានពិភាក្សាពីការវាយប្រហារលើកូរ៉េខាងជើង។ នេះបើយោងតាមទីភ្នាក់ងារសារព័ត៌មានរដ្ឋ KCNA បានឱ្យដឹងនៅថ្ងៃអង្គារសប្ដាហ៍នេះ។
សូមរំលឹកថា រដ្ឋមន្ត្រីការពារជាតិកូរ៉េខាងត្បូងលោក ស៊ូ វូក (Suh Wook) បាននិយាយពីថ្ងៃសុក្រថា យោធារបស់កូរ៉េខាងត្បូងមានមីស៊ីលជាច្រើនប្រភេទ ដែលអាចបាញ់បានឆ្ងាយ ត្រឹមត្រូវ និងថាមពលកាន់តែប្រសើរជាងមុន និងមាន«សមត្ថភាពបាញ់បានយ៉ាងច្បាស់ និងរហ័សដល់គោលដៅណាមួយនៅក្នុងប្រទេសកូរ៉េខាងជើង»។
ប្រទេសបងប្អូនកូរ៉េទាំង២នេះ បានអួតបង្ហាញពីកម្លាំងយោធារបស់ខ្លួនកាន់តែខ្លាំងឡើងក្រោយពីកូរ៉េខាងជើងបានបាញ់សាកល្បងមីស៊ីល ដែលមានកម្លាំងខ្លាំងជាងមុននៅក្នុងឆ្នាំនេះ ហើយមន្ត្រីក្រុងសេអ៊ូល និងវ៉ាស៊ីនតោនក៏បារម្ភដែរថា កូរ៉េខាងជើងអាចនឹងកំពុងរៀបចំបន្តការសាកល្បងអាវុធនុយក្លេអ៊ែរដ៏មានឥទ្ធិពលរបស់ខ្លួនកាលពីពីឆ្នាំ២០១៧ឡើងវិញ ចំពេលការចរចារជាប់គាំង។
លោកស្រី យ៉ូជុង និងមន្ត្រីកូរ៉េខាងជើងម្នាក់ទៀត បានចេញសេចក្តីថ្លែងការណ៍ ដោយថ្កោលទោសសុន្ទរកថារបស់លោក រដ្ឋមន្ត្រីការពារជាតិកូរ៉េខាត្បូង ហើយបានព្រមានថាទីក្រុងព្យុងយ៉ាងនឹងបាញ់កម្ទេចគោលដៅសំខាន់ៗនៅក្នុងទីក្រុងសេអ៊ូលប្រសិនបើកូរ៉េខាងត្បូងចាត់វិធានការ «យោធាដ៏គ្រោះថ្នាក់»ដូចជាការវាយប្រហារទប់ស្កាត់មុនជាដើម។
អត្ថបទគួរអាន
អ្នកស្រី រ៉ាឆែល មីនយុង លី (Rachel Minyoung Lee) ជាអ្នកវិភាគនៃគម្រោងកូរ៉េខាងជើង៣៨ (38 North) ដែលមានមូលដ្ឋាននៅសហរដ្ឋអាមេរិក និងជាអ្នកឃ្លាំមើលស្ថានភាពនៅកូរ៉េខាងជើងបាននិយាយថា ការរិះគន់របស់ថ្នាក់ដឹកនាំកូរ៉េខាងជើង ទំនងជាចង់សំដៅទៅលើប្រធានាធិបតីជាប់ឆ្នោតកូរ៉េខាងត្បូងលោក យ៉ុន ស៊ូក យ៉ែល (Yoon Suk-yeol) ព្រោះលោក គឺជាអ្នកអំពាវនាវឱ្យបង្កើនកម្លាំងការពារជាតិបន្ថែមទៀត ដើម្បីទប់ទល់នឹងការគំរាមកំហែងរបស់កូរ៉េខាងជើង។
អ្នកវិភាគរូបនេះបានបន្ថែមទៀតថា សុន្ទរកថាស្ដីពីការវាយប្រហារទុកជាមុនរបស់លោករដ្ឋមន្ត្រីការពារជាតិកូរ៉េខាងត្បូងនេះ បានក្លាយជាចំណងជើងដ៏សំខាន់នៅលើប្រព័ន្ធផ្សព្វផ្សាយកាលពីប៉ុន្មានខែមុននេះ ហើយទីក្រុងព្យុងយ៉ាងកំពុងឆក់យកឱកាសនេះ ដើម្បីវាយប្រហារទៅលើរដ្ឋបាលកូរ៉េខាងត្បូងរបស់លោក យ៉ុន ។ «រហូតមកដល់ពេលនេះ កូរ៉េខាងជើងបានមិនទាន់រិះគន់ចំៗទៅលើលោក យ៉ុនក្នុងកម្រិតអាជ្ញាធរណាមួយនៅឡើយទេ ប៉ុន្តែវាហាក់ដូចជាកំពុងសម្ងំសន្សំកម្លាំងអ៊ីចឹង»។ នេះបើតាមការបញ្ជាក់ពីអ្នកវិភាគ។
អ្នកស្រី មីនយុង លី បានបន្ថែមថា សេចក្តីថ្លែងការណ៍នេះ បានបង្ហាញថា ទីក្រុងព្យុងយ៉ាងកំពុងរៀបចំជាសាធារណៈ សម្រាប់ការផ្លាស់ប្តូរដែលអាចកើតមានណាមួយនៅក្នុងទំនាក់ទំនងរវាងកូរ៉េទាំង២នេះនៅពេលលោក យ៉ុន នឹងចូលកាន់តំណែងប្រធានាធិបតីកូរ៉េខាងត្បូងថ្មីនៅក្នុងខែឧសភា៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
