លោក William Heidt បាននិយាយក្នុងសន្និសីទសារព័ត៌មានថា ៖ «សម្ដីប្រឆាំងអាមេរិកបានធ្វើឲ្យជនជាតិអាមេរិក និងអ្នកទេសចរណ៍លោកខាងលិចជាច្រើនមានអារម្មណ៍លែងកក់ក្តៅជាងមុន នៅពេលធ្វើដំណើរមកកម្ពុជានាពេលបច្ចុប្បន្ន»។
លោកបន្តថា «ឆ្នាំនេះ អ្នកទេសចរទាំងនោះអាចនឹងទៅចាយលុយនៅ ហាឡុង បេយ៍ ឬនៅ ភូកេត ជាជាងនៅអង្គរវត្ត»។
លោកក៏បាននិយាយផងដែរថា ក្រុមហ៊ុនអាមេរិកនិងលោកខាងលិចក៏មានអារម្មណ៍លែងកក់ក្តៅដូចមុនផងដែរ ហើយក្រុមហ៊ុនកាន់តែតិចថែមទៀតនឹងមកវិនិយោគនៅកម្ពុជា។
ម្ចាស់ជំនួយមនុស្សធម៌ សប្បុរសធម៌អាមេរិក ដែលជាក្រុមធំជាងគេនិងមានទ្រព្យច្រើនជាងគេនៅក្នុងពិភពលោកក៏លែងមានអារម្មណ៍គិតថាខ្លួនត្រូវបានទទួលស្វាគមន៍ដែរ ដែលតាមការប៉ាន់ប្រមាណថា អង្គការសប្បុរសធម៌អាមេរិកបានសាងសង់សាលាជាង ១០០០នៅកម្ពុជា។
តើអ្នកបានអានអត្ថបទនេះឬនៅ?
លោក William Heidt សួរថា «វាជាចំនួនច្រើនមែនទេ? ខ្ញុំបានឮពីអង្គការសប្បុរសធម៌ធំៗខ្លះថា ការធ្វើប្រតិបត្តិការនៅកម្ពុជាកាន់តែប្រឈមនឹងហានិភ័យខ្លាំង ហើយពួកគាត់កំពុងពិចារណាប្តូរការងារល្អៗរបស់គាត់ទៅឥណ្ឌូនេស៊ី បង់ក្លាដេស និងវៀតណាមវិញ»។
ថ្លែងក្នុងសន្និសីទសារព័ត៌មាន លោក William Heidt ក៏បានបដិសេធថា អាមេរិកមិនបាននៅពីក្រោយករណីលោក កឹម សុខា ជាមេដឹកនាំបក្សប្រឆាំងដែលត្រូវបានអាជ្ញាធរចាប់និងចោទប្រកាន់ថាក្បត់ជាតិ កាលពីថ្ងៃទី២ ខែកញ្ញា នោះទេ។
លោក William Heidt ក៏បានទាមទារឲ្យមានការដោះលែងលោក កឹម សុខា ផងដែរ។
អ្នកនាំពាក្យរដ្ឋាភិបាលលោក ផៃ ស៊ីផាន បាននិយាយថា អ្នកដែលប្រាប់ពិភពលោកថា អាមេរិកនៅពីក្រោយ គឺលោក កឹម សុខា នោះទេ ហើយថា កម្ពុជាចាត់ទុកអាមេរិកជាដៃគូជានិច្ច។
លោក ផៃ ស៊ីផាន បាននិយាយថា «យើងអត់ចាត់ទុកអាមេរិកជាសត្រូវទេ។ យើងគ្រាន់តែប្រើសិទ្ធិរបស់យើងប្រាប់កុំឲ្យលូកដៃក្នុងកិច្ចការកម្ពុជា»៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
