ក្រោយពីមានការរារាំងពីសមាជិកសភារបស់គណបក្សសាធារណរដ្ឋជាងពីរខែមកនេះ នៅទីបំផុតសមាជិកសភាតំណាងរាស្ត្រអាម៉េរិក បានបោះឆ្នោតក្នុងសំឡេង៣១២-១១២ កាលពីថ្ងៃសៅរ៍ ទី២០ ខែមេសា ដើម្បីអនុម័តកញ្ចប់ថវិកាចំនួន៩៥ពាន់លានដុល្លារ សម្រាប់ផ្ដល់ជំនួយដល់ប្រទេសអ៊ុយក្រែន ប្រទេសអ៊ីស្រាអែល និងកោះតៃវ៉ាន់។ ឥឡូវនេះ សភាតំណាងរាស្ត្របានបញ្ជូនច្បាប់ថវិកានេះឡើងទៅកាន់ព្រឹទ្ធសភាដែលគ្រប់គ្រងសំឡេងភាគច្រើនដោយគណបក្សប្រជាធិបតេយ្យ ដែលគ្រោងនឹងអនុម័តនៅថ្ងៃអង្គារ សប្ដាហ៍នេះ មុនពេលបញ្ជូនវាទៅឱ្យប្រធានាធិបតីអាម៉េរិក លោក ចូ បៃដិន ចុះហត្ថលេខាឱ្យចូលជាច្បាប់ធរមាន។
ក្នុងចំណោមថវិកាជំនួយទាំង៩៥ពាន់លានដុល្លារនេះ គឺជិត៦១ពាន់លានដុល្លារសម្រាប់ដោះស្រាយជម្លោះនៅអ៊ុយក្រែន រួមទាំង២៣ពាន់លានដុល្លារសម្រាប់ផ្នែកសន្តិសុខផងដែរ។ ចំណែក២៦ពាន់លានដុល្លារទៀត គឺសម្រាប់ប្រទេសអ៊ីស្រាអែល រួមទាំងជាង៩ពាន់លានដុល្លារសម្រាប់តម្រូវការមនុស្សធម៌ ហើយចំនួនជាង៨ពាន់លានដុល្លារ គឺសម្រាប់តំបន់ឥណ្ឌូប៉ាស៊ីហ្វិករួមទាំងតៃវ៉ាន់ផងដែរ។
អត្ថបទគួរអាន
ប្រធានាធិបតីអ៊ុយក្រែនលោក វ៉ូឡូឌីមៀ ហ្សឺឡិនស្គី បានសម្តែងការអរគុណដោយនិយាយថា សមាជិកសភាអាម៉េរិក បានរក្សា«ប្រវត្តិសាស្រ្តនៅលើផ្លូវដ៏ត្រឹមត្រូវ» ហើយថា ច្បាប់ថវិកាដ៏សំខាន់របស់អាម៉េរិកនេះ នឹងការពារសង្រ្គាមពីការរីករាលដាល ជួយសង្គ្រោះជីវិតមនុស្សរាប់ពាន់នាក់ និងជួយប្រទេសទាំងពីរឱ្យកាន់តែរឹងមាំ។
ពាក់ព័ន្ធនឹងសហរដ្ឋអាម៉េរិកនេះដែរ រដ្ឋមន្ត្រីការបរទេសអាម៉េរិក លោក អេនថូនី ប្ល៊ីនខិន គ្រោងនឹងធ្វើទស្សនកិច្ចនៅទីក្រុងស៊ាងហៃ និងទីក្រុងប៉េកាំងប្រទេសចិន ចាប់ពីថ្ងៃទី២៤ ដល់ទី២៦ ខែមេសា ដើម្បីបង្ហាញពីក្ដីកង្វល់របស់អាម៉េរិកចំពោះការគាំទ្ររបស់ក្រុមហ៊ុនចិន សម្រាប់ក្បាលម៉ាស៊ីនសង្គ្រាមរបស់ប្រទេសរុស្ស៊ី និងដើម្បីធានាបានថា ទំនាក់ទំនងជាមួយនឹងទីក្រុងប៉េកាំងមិនធ្លាក់ចេញពីផ្លូវម្ដងទៀត។
ទោះជាប្រទេសចិន មិនទាន់ឆ្លងកាត់បន្ទាត់ក្រហមរបស់អាម៉េរិកក្នុងការផ្តល់ជំនួយយោធា ឬគ្រាប់រំសេវដល់រុស្ស៊ីក៏ពិតមែន ប៉ុន្តែបើតាមមន្ត្រីជាន់ខ្ពស់អាមេរិកម្នាក់បាននិយាយថា នៅក្នុងដំណើរទស្សនកិច្ចនេះលោក ប្ល៊ីនខិន នឹងផ្តល់ការព្រមានដល់ទីក្រុងប៉េកាំងថា ទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួនកំពុងរួបរួមគ្នាប្រឆាំងនឹងតួនាទីរបស់ចិន។ មន្ត្រីជាន់ខ្ពស់អាមេរិករូបនេះ បានប្រាប់អ្នកកាសែតថា លោក ប្ល៊ីនខិន នឹងធ្វើការបកស្រាយពីផលប៉ះពាល់សម្រាប់សន្តិសុខនៅតំបន់អឺរ៉ុប។
នេះគឺជាដំណើរទស្សនកិច្ចចុងក្រោយបង្អស់ក្នុងចំណោមដំណើរទស្សនកិច្ចជាបន្តបន្ទាប់របស់មន្ត្រីជាន់ខ្ពស់អាម៉េរិកទៅកាន់ទីក្រុងប៉េកាំង ខណៈដែលប្រទេសទាំងពីរនេះកំពុងសម្លឹងរកការធ្វើឱ្យបានល្អតាមការសន្យារបស់ពួកគេដែលបានកំណត់នៅទីក្រុងសានហ្វ្រាន់ស៊ីស្កូ កាលពីចុងឆ្នាំមុន ដើម្បីបន្ធូរបន្ថយភាពតានតឹងដែលនាំឱ្យទំនាក់ទំនងទ្វេភាគីបែកបាក់គ្នាស្ទើរតែទាំងស្រុង៕
អត្ថបទ៖ សុខ មង្គល
None
