ទីប្រឹក្សាសេតវិមានបង្ហាញ៖ អាមេរិកអាចនឹងបន្ថយពន្ធសម្រាប់ចិនដើម្បីទប់ទល់អតិផរណា

លោក ដេលីប ស៊ីង (Daleep Singh) ទីប្រឹក្សាសន្តិសុខជាតិសហរដ្ឋអាមេរិកទទួលបន្ទុកសេដ្ឋកិច្ចអន្តរជាតិបាននិយាយពាក់ព័ន្ធនឹងបញ្ហាពន្ធគយ ដែលបានដាក់ទៅលើការនាំទំនិញនាំចូលពីប្រទេសចិនក្នុងអំឡុងសង្គ្រាមពាណិជ្ជកម្ម ដែលបានចាប់ផ្ដើមនៅឆ្នាំ២០១៨ថា ទោះបីជាអាមេរិក និងចិនអាច បង្កើតលទ្ធភាពសម្រាប់ការចរចាគ្នាបាន ប៉ុន្ដែពួកគេគ្មានគោលបំណងជាយុទ្ធសាស្ត្រណាមួយនោះទេ។

អនុទីប្រឹក្សាសន្ដិសុខជាតិអាមេរិក បានគូសបញ្ជាក់ទៀតថា ឱកាសរបស់សហរដ្ឋអាមេរិកនៅពេលនេះ គឺត្រូវកំណត់ជាថ្មីនូវគោលបំណងយកពន្ធគយជាថ្មីទៅលើទំនិញរបស់ចិន ដើម្បីឱ្យប្រទេសចិនអាចជួយពន្លឿននូវអ្វីដែលជាបញ្ហាអាទិភាពយុទ្ធសាស្ត្រពិតប្រាកដរបស់សហរដ្ឋអាមេរិក។

អនុទីប្រឹក្សារូបនេះបានបន្តទៀតថា ចំណាត់ការបែបនេះនឹងរក្សាការយកពន្ធលើទំនិញពាក់ព័ន្ធនឹងចង្វាក់ផ្គត់ផ្គង់សំខាន់ៗ បច្ចេកវិទ្យាមូលដ្ឋាន និងសន្តិសុខជាតិ ប៉ុន្តែនឹងកាត់បន្ថយពន្ធលើទំនិញដូចជាកង់ សំលៀកបំពាក់មួយចំនួនជាដើម។

មន្ត្រីជាន់ខ្ពស់របស់អាមេរិករូបនេះ ក៏បានបង្ហាញដែរថា ការរៀបចំបែបនេះត្រូវមានធាតុផ្សំបំពេញឱ្យគ្នាទៅវិញទៅមក ដែលប្រទេសចិនអាចកាត់បន្ថយពន្ធគយលើទំនិញមិនមែនយុទ្ធសាស្ត្របស់ខ្លួនមួយចំនួនដែលនាំចូលពីសហរដ្ឋអាមេរិកដូចគ្នាដែរ ព្រោះថាទីក្រុងប៉េកាំង «ក៏កំពុងព្រួយបារម្ភអំពីបញ្ហាខ្សែចង្វាក់ផ្គត់ផ្គង់ដ៏ធ្ងន់ធ្ងររបស់ខ្លួន»ដែលបណ្តាលមកពីការធ្លាក់ចុះសេដ្ឋកិច្ចដោយសារតែគោលនយោបាយគ្មានកូវីដរបស់ខ្លួន។

ជាមួយវិធានការមួយចំនួនទៀតទាក់ទងនឹងប្រទេសចិនដែរនោះ គឺរដ្ឋការរបស់ប្រធានាធិបតីអាមេរិកលោក Joe Biden បានរក្សាទំនាក់ទំនងធ្វើពាណិជ្ជកម្មជាមួយប្រទេសចិន ដែលអាមេរិកបានទទួលមរតកពីអតីតប្រធានាធិបតីលោក Donald Trump រួមទាំងពន្ធលើការនាំចូលទំនិញរបស់ចិនដែលមានតម្លៃ ៣០០ ពាន់លានដុល្លារអាមេរិកផងដែរ៕

អត្ថបទ៖ សុខ ជា