លោក Yuthasak Supasorn ប្រធានអាជ្ញាធរទេសចរណ៍ថៃ បានអះអាងថា នៅក្នុងក្រសែភ្នែករបស់ភ្ញៀវទេសចរមកពីអឺរ៉ុប ថៃនៅតែជាគោលដៅដ៏ទាក់ទាញបំផុតនៅអាស៊ី ។
លោកបានបង្ហាញក្តីរំពឹងថា ភ្ញៀវទេសចរមកពីអឺរ៉ុប គឺអាចជាភ្ញៀវមកពីអង់គ្លេស អាល្លឺម៉ង់ និង រុស្ស៊ីជាដើម ប៉ុន្តែទន្ទឹមនឹងសុទិដ្ឋិនិយមនេះ វិបត្តិនៃការបន្តសង្រ្គាមរុស្ស៊ី-អ៊ុយក្រែន ក៏អាចនឹងបន្តមានឥទ្ធិពលអវិជ្ជមានដល់ការព្យាករណ៍នេះផងដែរ ។
តាមការរំពឹងទុកនេះ ប្រសិនបើថៃអាចទាក់ទាញភ្ញៀវទេសចរពីអឺរ៉ុប ៦ លាននាក់ ថៃអាចនឹងរកប្រាក់ចំណូលប្រមាណជា ៤២០ ពាន់លានបាត ឫប្រមាណជា ជិត ១២ ពាន់លានដុល្លារ ។
ក្រៅពីភ្ញៀវមកពីអឺរ៉ុប ថៃក៏កំពុងតែសង្ឃឹមទុកថា ខ្លួននឹងអាចទាក់ទាញភ្ញៀវទេសចរពីមជ្ឈិមបូព៌ា និងចិន ផងដែរ ។
អត្ថបទគួរអាន
លោក Yuthasak Supasorn បានអះអាងថា ដើម្បីទាក់ទាញភ្ញៀវទេសចរទាំងអស់ នៅពេលនេះ អ្នកដែលពាក់ព័ន្ធនៅក្នុងប្រទេសនេះ កំពុងតែរួបរួមគ្នាដាក់ចេញនូវកញ្ចប់ផ្សព្វផ្សាយ និង ទាក់ទាញជាច្រើនដល់ភ្ញៀវទេសចរទាំងអស់ ។
លោក Siripakorn Cheawsamoot អនុប្រធានអាជ្ញាធរទេសចរណ៍ថៃ ទទួលបន្ទុកទីផ្សារនៅអឺរ៉ុប អាហ្រ្វិក មជ្ឈឹមបូព៌ា និង អាមេរិកបានអះអាងថា ចំនួនជើងហោះហើរចូលប្រទេសថៃនៅពេលនេះ បានឈានឡើងដល់៧០% នៃចំនួនជើងដែលបានកត់ត្រាកាលពីឆ្នាំ២០១៩ ពោលគឺមុនពេលការរីករាលដាលនៃមេរោគកូវីដ ១៩។
ក្រៅពីនោះ អ្នកដែលទទួលខុសត្រូវខាងសណ្ឋាគារនៅក្នុងប្រទេសថៃក៏បានបង្ហាញអំពីសញ្ញាវិជ្ជមាននៃអត្រាកក់បន្ទប់នៅក្នុងប្រទេស ជាពិសេសនៅក្នុងទីក្រុងបាងកក ដោយអត្រាកក់កើឡើង លើសពី ៧៨%នៅក្នុងត្រីមាសចុងក្រោយ ដោយនៅក្នុងនោះ ៤០% គឺជា ជាភ្ញៀវមកពីអឺរ៉ុប ៕
អត្ដបទ ៖ សរ សុជាតិ
