ការផ្ដល់ប្រាក់កម្ចីយ៉ាងច្រើនដល់ឧស្សាហកម្មមួយនេះបានធ្លាក់ចុះកាលពីចុងឆ្នាំ២០២១បើធៀបនឹងឆ្នាំ២០២០នៅតាមធនាគារចំនួន ១៧ ក្នុងចំណោមធនាគារឈានមុខគេចំនួន៣២ ដែលបានចុះបញ្ជីនៅផ្សារហ៊ុនក្រុងហុងកុង ដែលក្នុងនោះក៏មានធនាគាររបស់រដ្ឋចិន ឆៃណា ស៊ីទិក (China CITIC) និងធនាគារ ឆៃណា មីនសេង (China Minsheng) ដែលជាធនាគារឯកជនធំបំផុតនៅប្រទេសចិនផងដែរ។
ធនាគារសេង ជីង (Shengjing) គ្រប់គ្រងដោយក្រុមហ៊ុនមេ China Evergrande Group ដែលជំពាក់បំណុលគេវ័ណ្ឌក និងជាម្ចាស់ភាគហ៊ុនធំនោះបានកាត់បន្ថយការផ្តល់ប្រាក់កម្ចីដល់ក្រុមអ្នកអភិវឌ្ឍន៍បន្ទាប់ពីធនាគារនេះ បានបង្កើនការផ្ដល់កម្ចីកើនឡើងជិតទ្វេដងក្នុងឆ្នាំ២០២០។
ស្ថាប័នផ្តល់ប្រាក់កម្ចីក្នុងតំបន់មួយចំនួនបានដកខ្លួនថយស្ទើរទាំងស្រុងក្នុងការផ្ដល់កម្ចីទៅកាន់អ្នកអភិវឌ្ឍន៍ ដូចជាធនាគារ China Bohai Bank មានមូលដ្ឋាននៅទីក្រុងធៀនជិន (Tianjin) ដែលបានកាត់បន្ថយការផ្ដល់កម្ចី ៣២%។ ប្រាក់កម្ចីសរុបសម្រាប់វិស័យអចលនទ្រព្យនៅធនាគារធំទាំងបួនរបស់ប្រទេសចិនបានកើនឡើងត្រឹមតែ ប្រមាណ៥%ប៉ុណ្ណោះ គឺតិចជាងការផ្តល់កម្ចីជារួមរបស់ពួកគេ ហើយវាក៏ជាកំណើនយឺត បើធៀបនឹងតួលេខកំណើនពីរខ្ទង់នៅចន្លោះឆ្នាំ២០១៧ដល់ឆ្នាំ២០២០។
ស្របពេលដែលការផ្ដល់ប្រាក់កម្ចីអចលនទ្រព្យធ្លាក់ចុះកាន់តែច្រើនឡើងៗនោះ ស្ថាប័នហិរញ្ញវត្ថុមួយចំនួនមានបំណងកាត់បន្ថយហានិភ័យ ដែលពួកគេប្រឈមមុខ ដោយទុកឱ្យក្រុមហ៊ុនអចលនទ្រព្យដែលកំពុងជួបការលំបាកនូវជម្រើសតិចតួចបំផុត។ ស្ថាប័នផ្តល់ប្រាក់កម្ចីក៏ប្រុងប្រយ័ត្នផងដែរ ចំពោះកិច្ចខិតខំប្រឹងប្រែងរបស់រដ្ឋាភិបាលទីក្រុងប៉េកាំងក្នុងការគ្រប់គ្រងទីផ្សារដ៏ផុយស្រួយនេះ។
អត្ថបទគួរអាន
អាជ្ញាធរចិនបានចាប់ផ្តើមបន្ថយកុំឲ្យមានការច្រើនពេកពីសំណាក់ក្រុមអ្នកអភិវឌ្ឍន៍ចាប់ពីឆ្នាំ២០២០មក
ដោយកំណត់«បន្ទាត់ក្រហម» ចំនួន៣នៅ
ដើម្បីបង្អាក់ការផ្តល់ប្រាក់កម្ចីដល់ក្រុមហ៊ុនអចលនទ្រព្យណា
ដែលមិនសូវមានហិរញ្ញវត្ថុច្រើន។
ការដាក់កំហិតលើការផ្ដល់ប្រាក់កម្ចីទិញផ្ទះ
និងការណែនាំអំពីវិស័យអចលនទ្រព្យនៅឆ្នាំបន្តបន្ទាប់មកទៀតផងដែរ។
ទុក្ខលំបាករបស់ឧស្សាហកម្មនេះបានធ្លាក់ទៅលើស្ថាប័នមួយចំនួនដូចជាម្ចាស់បំណុលរបស់ក្រុមហ៊ុនមេ Evergrande គឺធនាគារ Minsheng ដែលភាគហ៊ុនរបស់ពួកគេបានធ្លាក់ចុះកាលពីឆ្នាំមុនចំពេលមានវិបត្តិបំណុលរបស់ក្រុមហ៊ុនអភិវឌ្ឍន៍មួយចំនួន។ ស្ថាប័នផ្តល់ប្រាក់កម្ចីបានពិនិត្យពិច័យលើការផ្តល់ហិរញ្ញប្បទានយ៉ាងដិតដល់ដោយសារព្រួយបារម្ភ ក្រុមហ៊ុនអចលនទ្រព្យមួយចំនួនអាចនឹងត្រូវរងគ្រោះដោយសារ «បំណុលលាក់កំបាំង» ជាច្រើនដែលពួកគេមិនបានបង្ហាញ។
ធនាគារ Minsheng បាននិយាយនៅក្នុងសេចក្តីប្រកាសស្ដីពីប្រាក់ចំណូលរបស់ខ្លួនសម្រាប់ឆ្នាំ២០២១ថា ខ្លួនបានអនុវត្តយ៉ាងតឹងរ៉ឹងនូវតម្រូវការតាមបទប្បញ្ញត្តិ សម្រាប់វិស័យអចលនទ្រព្យ និងធ្វើឱ្យប្រសើរឡើងនូវសមត្ថភាពគ្រប់គ្រងដំណើរការឥណទានទាំងមូលផងដែរ។
ខណៈដែលអ្នកអភិវឌ្ឍន៍ ដែលកំពុងជាប់គាំងរឿងសាច់ប្រាក់ ត្រូវប្រឈមនឹងការលំបាកក្នុងការទទួលបានមូលនិធិបន្ថែមពីធនាគារនោះ គេសង្កេតឃើញថា សាច់ប្រាក់សរុប ដែលក្រុមហ៊ុនអភិវឌ្ឍនចំនួន១០០ក្រុមហ៊ុន ដែលទទួលបានរួមទាំង ពីកម្ចីធនាគារ និងបំណុលសាជីវកម្មផងនោះ មានជាង៦ពាន់លានដុល្លារគិតក្នុងខែកុម្ភៈកន្លងទៅនេះ ពោលគឺ បានធ្លាក់ចុះ៥៩% ធៀបនឹងរយៈពេលដូចគ្នាកាលពីឆ្នាំមុន។ នេះបើតាមព័ត៌មានដែលបានបង្ហាញដោយសារប័នព័ត៌មានអចលនទ្រព្យចិន៕អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
