លោក ដូណាល់ត្រាំ បានសរសេរលើបណ្ដាញ Twitter ផ្លូវការរបស់ខ្លួនថា ជំនួបពាណិជ្ជកម្មរវាងអាមេរិក និងចិនដែលធ្វើឡើងនាពេលថ្មីៗនេះ សម្រេចបាននូវវឌ្ឍនភាពគួរឲ្យកត់សម្គាល់ ដោយផ្ដោតសំខាន់លើបញ្ហារចនាសម្ព័ន្ធ រួមបញ្ចូលទាំងការការពារកម្មសិទ្ធិបញ្ហា ការផ្ទេរបច្ចេកវិទ្យា កសិកម្ម សេវាកម្ម រូបិយវត្ថុ និងមានបញ្ហាផ្សេងទៀត។
បន្ទាប់មានការពិភាក្សាគ្នាយ៉ាងស្រុះស្រួលលោកត្រាំបានបញ្ជាក់ថា អាមេរិកនឹងពន្យាផែនការដំឡើងពន្ធលើមុខទំនិញចិន ដែលនឹងត្រូវបានកំណត់ធ្វើឡើងនៅថ្ងៃទី១ ខែមីនា ហើយដោយមើលឃើញពី ដំណើរការល្អរបស់ភាគីទាំងពីរ ក្នុងការដោះស្រាយបញ្ហាជាមួយគ្នានោះ លោកត្រាំថា ភាគីទាំងពីរនឹងមានផែនការជំនួបថ្មីមួយទៀត រវាងលោក និងលោក ស៊ីជិនពីង ផ្ទាល់ នៅរមណីដ្ឋានដែនដីប្រវត្តិសាស្ត្រជាតិអាមេរិក ម៉ា អា ឡាហ្គូ (Mar-a-Lago) ក្នុងរដ្ឋ Florida ដើម្បីសម្រេចនូវកិច្ចព្រមព្រៀងរួមគ្នា។
អត្ថបទគួរអាន!
គួរបញ្ជាក់ថា ក្រោយពីមានការសងសឹកគ្នាទៅវិញទៅមក ក្នុងសង្គ្រាមពាណិជ្ជកម្មអស់មួយរយៈ ដែលបានដំឡើងពន្ធលើមុខទំនិញទៅវិញទៅមក ក្នុងតម្លៃប្រមាណ ៣០០ពាន់លានដុល្លារអាមេរិកនោះ អាមេរិក និងចិន កាលពីខែធ្នូឆ្នាំ ២០១៨កន្លងទៅ ធ្លាប់បានប្រកាសព្រមព្រៀងគ្នាម្ដងរួចហើយ លើការផ្អាកការដំឡើងពន្ធទៅវិញទៅមក ក្នុងរយៈពេល ៩០ថ្ងៃ។
សូមរំឭកបន្តិចថា ក្នុងសង្គ្រាមពាណិជ្ជកម្មនេះ ត្រូវបានគេមើលឃើញថា អាមេរិកគឺជាអ្នកចាប់ផ្ដើមមុន ដោយសារតែលោក ត្រាំ យល់ឃើញថា ការធ្វើពាណិជ្ជកម្មរបស់អាមេរិកជាមួយចិន គឺមិនមានភាពស្មើភាពគ្នា ហើយភាគីទាំងពីរក៏បានសងសឹក និងដំឡើងពន្ធលើមុខទំនិញវាងគ្នាទៅវិញទៅមក ដែលការអូសបន្លាយនៃជម្លោះនេះ ក៏បានធ្វើឲ្យសេដ្ឋកិច្ចពិភពលោកកំពុងប្រឈមនឹងការធ្លាក់ចុះផងដែរ៕
None
