ការងើបហក់ឡើងវិញនៃសេដ្ឋកិច្ចអាមេរិកសម្រាប់ត្រីមាសទី២នេះ អាចកើតឡើងទៅបានក៏ដោយសារតែបាន ថវិកាដ៏ច្រើនសន្ធឹកសន្ធាប់របស់រដ្ឋាភិបាលអាមេរិកផ្តល់ឲ្យ តាមរយៈជំនួយដល់វិស័យឯកជន និងសាច់ប្រាក់ជូនពលរដ្ឋ គួបផ្សំនឹងការចាក់បញ្ចូលសាច់ប្រាក់ជាច្រើនពាន់លានដុល្លារផ្សេងទៀតទៅក្នុងវិស័យនានា ដើម្បីជំរុញចរន្ដសេដ្ឋកិច្ច។
ក្នុងនោះគេសង្កេតឃើញថា យុទ្ធនាការចាក់វ៉ាក់សាំងបានស្ទើរតែពាក់កណ្តាលនៃចំនួនប្រជាជនអាមេរិក ក៏បានរួមចំណែកក្នុងការលើកស្ទួយសេដ្ឋកិច្ចអាមេរិកផងដែរ ដែលវាបានធ្វើឲ្យសកម្មភាពរបស់ពលរដ្ឋ ក៏ដូចជា សេដ្ឋកិច្ចអាចដំណើរការឡើងវិញ ពលរដ្ឋអាចដើរទិញទំនិញដូចពីមុន គួបផ្សំនឹងការប្រើប្រាស់សេវាសាធារណៈផ្សេងៗផងដែរ។
ជាក់ស្តែង ផលិតផលក្នុងស្រុកសរុប ឬ GDP ក្នុងត្រីមាសទី២ របស់អាមេរិកបានកើនឡើង ៦,៥% ខណៈត្រីមាសទី១ មានត្រឹម ៦,៣%។ លើសពីនេះ ស្ថាប័នមូលនិធិរូបិយវត្ថុអន្តរជាតិ ហៅកាត់ថា IMF កាលពីពេលថ្មីៗនេះ ទើបបានបង្កើនការព្យាករសេដ្ឋកិច្ចអាមេរិកជារួមក្នុងឆ្នាំ ២០២១ ថា នឹងមានកំណើនដល់ ៧% កើនឡើង ០,៦% ពីការព្យាករកាលខែមេសាកន្លងទៅ។
អត្ថបទគួរចាប់អារម្មណ៏
ការចំណាយរបស់ពលរដ្ឋ ដែលតំណាងឲ្យពីរភាគបី នៃសេដ្ឋកិច្ចរបស់អាមេរិកទាំងមូលបានកើនឡើងក្នុងអត្រាជិត ១២% ក្នុងត្រីមាសទី២ឆ្នាំនេះ ភាគច្រើនស្ថិតក្នុងវិស័យសេវាកម្ម ស្របពេលដែលការចំណាយលើមុខទំនិញរបស់ពលរដ្ឋអាមេរិកនៅរក្សាបានភាពធន់របស់ខ្លួន។
គួរជម្រាបថា បើគេរាប់ទាំងអាណត្តិលោក ដូណាល់ ត្រាំ និងក្រោមរដ្ឋបាល លោក ចូ បៃឌិន សហរដ្ឋអាមេរិកបានផ្តល់ជំនួយសាច់ប្រាក់ដល់ ពលរដ្ឋ វិស័យឯកជន និងដល់ចរន្តសេដ្ឋកិច្ចទាំងមូល គិតសរុបជារួមមានប្រមាណជិត ៦ទ្រីលានដុល្លារហើយ ចាប់តាំងពីមានការផ្ទុះឆ្លងរាលដាល ជំងឺកូវីដ១៩ដំបូងនៅសហរដ្ឋអាមេរិក កាលពីខែមិនាឆ្នាំ២០២០៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
