ក្រោយកូវីដ-១៩ស្ងប់ស្ងាត់ តើវិនិយោគិនចិន នៅតែឈរលើកំពូលតារាងវិនិយោគនៅកម្ពុជាដែរ ឬយ៉ាងណា?

អនុប្រធានសភាពាណិជ្ជកម្មកម្ពុជាឧកញ៉ា លឹម ហេង បានលើកឡើងជាមួយក្ដីរំពឹងខ្ពស់លើកិច្ចព្រមព្រៀងពាណិជ្ជកម្មសេរីរវាងកម្ពុជាជាមួយចិន ក្នុងការទាក់ទាញវិនិយោគិនបរទេស ពិសេសចិន ឲ្យមកបោះទុនវិនិយោគនៅកម្ពុជាកាន់តែច្រើនថែមទៀត ពិសេសនៅក្រោយការឆ្លងរាលដាលនៃជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ មានភាពធូរស្បើយ។

កត្តានេះ បានធ្វើឲ្យឧកញ៉ា លឹម ហេង នៅតែមានសុទិដ្ឋិនិយមខ្ពស់លើវិនិយោគិនចិន ក្នុងការឈរកំពូលតារាងនៅកម្ពុជា ក្នុងនាមប្រទេសមានការវិនិយោគច្រើនជាងគេ។

បើតាមឧកញ៉ា លឹម ហេង សង្ឃឹមថា ក្រៅតែពីវិនិយោគិនចិន កម្ពុជាក៏មានឱកាសអាចស្រូបទាញក្រុមហ៊ុនវិនិយោគរបស់ជប៉ុន និងក្រុមហ៊ុនបរទេសផ្សេងទៀត ដែលកំពុងរកស៊ីនៅមីយ៉ាន់ម៉ា ឲ្យងាកមកវិនិយោគនៅកម្ពុជាកាន់តែច្រើនដែរ ដ្បិតថា ប្រទេសនេះ បាននិងកំពុងធ្លាក់ក្នុងវិបត្តិនយោបាយធ្ងន់ធ្ងរ។ 

ស្របពេលប្រទេសជាច្រើននៅលើពិភពលោកកំពុងជួបវិបត្តិសេដ្ឋកិច្ចដោយសារការឆ្លងរាលដាលនៃជំងឺកូវីដ-១៩ ចិនត្រូវបានគេព្យាករណ៍ថា នឹងមានកំណើនសេដ្ឋកិច្ចកើនឡើងជាង៨%នៅឆ្នាំនេះ។ ជុំវិញនឹងការវិនិយោគពីប្រទេសចិននេះដែរ អ្នកជំនួយចាស់វស្សានៅក្នុងវិស័យអចលនទ្រព្យ ឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL រំពឹងថា កំណើនសេដ្ឋកិច្ចរបស់ចិន នឹងរួមចំណែកជួយស្តារវិស័យសេដ្ឋកិច្ច ក៏ដូចជាអចលនទ្រព្យនៅកម្ពុជាឲ្យមានភាពល្អប្រសើរឡើងវិញនៅពេលខាងមុខ។

បើតាមរបាយការរបស់ក្រុមប្រឹក្សាអភិវឌ្ឍន៍កម្ពុជា ឬហៅកាត់ថា CDC ទោះបីកម្ពុជាទទួលរងនូវការឆ្លងរាលដាលខ្លាំងនៃជំងឺកូវីដ-១៩ រលកទី៣ក៏ដោយចុះ ប៉ុន្តែការវិនិយោគលើគម្រោងថ្មីៗរបស់ក្រុមហ៊ុនជាច្រើននៅតែបន្ដមានជាហូរហែ ។ ជាក់ស្តែង នៅក្នុងរយៈពេល៥ខែក្នុងឆ្នាំ២០២១ CDC  បានអនុម័តលើគម្រោងវិនិយោគថ្មីៗជិត ៦០គម្រោង ដែលមានទុនវិនិយោគសរុបជាង២ពាន់២រយលានដុល្លារអាមេរិក ដោយបានផ្តល់ការងារជិត៤ម៉ឺនកន្លែង។ នេះបើតាមទិន្នន័យដែលបានបង្ហាញនៅលើទំព័រហ្វេសប៊ុកផ្លូវការរបស់ CDC៕