ការធ្លាក់ចុះនៃការវិនិយោគផ្ទាល់ពីក្រៅប្រទេសដល់អត្រាតួលេខ២ខ្ទង់នេះ គឺជាតួលេខធ្លាក់ចុះខ្លាំងបំផុតមួយ តាំងពីមានការផ្ទុះឆ្លងកូវីដ-១៩ ក្នុងប្រទេសនេះ ជាថ្មីទៀតនៅក្នុងខែមេសាកន្លងទៅ ដែលវាបានបង្កផលប៉ះពាល់ដល់វិស័យឧស្សាហកម្មជាច្រើននៅខេត្តភាគខាងជើង នៃខេត្តបាក់កៀង និងបាក់និញ។
ក្រសួងផែនការ និងវិនិយោគវៀតណាម បានឲ្យដឹងទៀតថា ក្នុងរយៈពេល៧ខែឆ្នាំ២០២១ មានគម្រោងដែលបានចុះបញ្ជីថ្មីៗប្រមាណជាង១ពាន់គម្រោងស្មើនឹងទឹកប្រាក់ជាង ១០ពាន់លានដុល្លារ កើនឡើង ៧% បើធៀបនឹងឆ្នាំមុន។ ខណៈទឹកប្រាក់ជាង ៤ពាន់៥រយលានដុល្លារទៀត ត្រូវវិនិយោគបន្ថែមទៅក្នុងគម្រោងដែលមានស្រាប់ជាង ៥៦០ គម្រោង មានអត្រាធ្លាក់ចុះ ៣,៧%។ ការចូលរួមវិភាគទានមូលធន និងការទិញភាគហ៊ុនរបស់វិនិយោគិនបរទេសនៅវៀតណាម បានធ្លាក់ចុះជិត ៥៦ភាគរយ ដែលទឹកប្រាក់ត្រឹមតែជាង ២ ពាន់លានដុល្លារប៉ុណ្ណោះ។
នៅក្នុងការវិនិយោគផ្ទាល់ពីបរទេសដែលវៀតណាមទទួលបាននៅ ៧ ខែមកនេះ មានទឹកប្រាក់ដើមទុនប្រមាណ ៨ពាន់លានដុល្លារ ឬស្មើជាង ៤៧% បានវិនិយោគក្នុងវិស័យឧស្សាហកម្មផលិតកែច្នៃ និងតាមពីក្រោយដោយ ឧស្សាហកម្មផលិតនិ ងការចែកចាយគ្រឿងអគ្គិសនី។
ប្រទេសសិង្ហបុរីឈរលំដាប់កំពូល ដែលបានវិនិយោគផ្ទាល់មកកាន់វៀតណាមច្រើនជាងគេ ជាមួយនឹងទឹកប្រាក់ជិត៦ពាន់លានដុល្លារ បន្ទាប់មកគឺជប៉ុនមានជាង ២ពាន់៥រយលានដុល្លារ និងកូរ៉េខាងត្បូង ជាង២ ពាន់លានដុល្លារ ។
អត្ថបទគួរអាន
ក្រុមសេដ្ឋវិទូបានជឿជាក់ថា ការរីករាលដាលនៃជំងឺកូវីដ-១៩ មានឥទ្ធិពលលើការទាក់ទាញវិនិយោគផ្ទាល់ពីបរទេសរបស់ប្រទេសវៀតណាម។ ដោយក្នុងនោះ រលកចម្លងកូវីដលើកទី ៤ នៅប្រទេសក្បែរខាងកម្ពុជាមួយនេះ ក៏បានធ្វើឱ្យមានប៉ះពាល់ដល់ទំនុកចិត្ដនៃក្រុមធុរកិច្ចពីអឺរ៉ុបជាច្រើនផងដែរ។
វៀតណាម នៅតែបន្ដមានតួលេខឆ្លងខ្ពស់ ដោយករណីឆ្លងប្រចាំថ្ងៃត្រូវបានរកឃើញថាមានរាប់ពាន់នាក់ក្នុងមួយថ្ងៃៗ។ ប្រការនេះ បានជំរុញឲ្យទីក្រុងហូជីមិញ និងទីក្រុងចំនួន១៨ផ្សេងទៀត ត្រូវបន្ដវិធានការរឹតបន្ដឹងរយៈពេល ២សប្ដាហ៍បន្ថែមទៀត ដើម្បីប្រយុទ្ធទប់ទល់នឹងកូវីដ-១៩ ដែលកំពុងហក់ឡើងកាន់តែខ្លាំង។
សូមបញ្ជាក់ថា បច្ចុប្បន្ន វៀតណាមទើបតែអ្នកចាក់វ៉ាក់សាំងសរុបប្រមាណ៦លាននាក់ប៉ុណ្ណោះ ក្នុងនោះ អ្នកចាក់បានគ្រប់ចំនួន២ដូសមានជិត៥៦ម៉ឺននាក់៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
