ក្រុមហ៊ុនផលិតឱសថ Pfizer និង Biontech របស់សហរដ្ឋអាមេរិក
សហការជាមួយ អាល្លឺម៉ង់ បានអះអាងថា វ៉ាក់សាំង ប្រឆាំងមេរោគកូវីដ-១៩
ដែលត្រូវបានធ្វើតេស្តនៅក្នុងដំណាក់កាលទី ៣ គឺមានប្រសិទ្ធភាពដល់ទៅ ៩០%
ផ្អែកទៅលើលទ្ធផលសាកល្បងដំណាក់កាលដំបូង ដែលត្រូវបានចាត់ទុកជា ជ័យជម្នះមួយ
ប្រឆាំងនឹងមេរោគដ៏កាចសាហាវ ដែលបានសម្លាប់មនុស្សរាប់លាននាក់។ ក្រៅពីនោះ
ប្រទេសរុស្ស៊ី ក៏បានអះអាងដែរថា វ៉ាក់សាំងរបស់ខ្លួន ក៏មានប្រសិទ្ធភាពដល់ទៅ ៩០%
ដូចគ្នាដែរ ដោយផ្អែកទៅលើ ទិន្នន័យព្យាបាលជាក់ស្តែង មិនមែនតេស្តសាកល្បងនោះឡើយ។
ទាំងអ្នកវិទ្យាសាស្រ្ត មន្រ្តីសុខាភិបាល និងវិនិយោគិន សុទ្ធតែស្វាគមន៍ចំពោះដំណឹងនេះ ដោយរំពឹងថា វ៉ាក់សាំង នឹងអាចជួយស្រោចស្រង់ភាពក្រឡាប់ចាក់របស់សកលលោកបាន នៅពេលដែលការធ្វើតេស្តសាកល្បង បញ្ចប់ជាផ្លូវការ។
ទោះយ៉ាងណាក៏ដោយ ដើម្បីអាចផលិតវ៉ាក់សាំងបានច្រើននោះ ក្រុមហ៊ុន ត្រូវការច្បាប់អនុញ្ញាតជាមុនសិន ដោយរំពឹងនឹងទទួលបានការសម្រេចចិត្តពី រដ្ឋាភិបាលអាមេរិក ក្នុងខែធ្នូខាងមុខនេះ ហើយបើសិនជា ក្រុមហ៊ុន ទទួលបានសិទ្ធិហើយ នោះអាចនឹងផលិតបានប្រមាណ ៥០លានវ៉ាក់សាំង ក្នុងឆ្នាំ ២០២០នេះ ដែលអាចជួយមនុស្សបាន ២៥លាននាក់ នឹងអាចបន្តផលិតបាន ១ពាន់ ៣រយលានវ៉ាក់សាំង ក្នុងឆ្នាំ ២០២១បន្ថែមទៀត។
អត្ថបទទាក់ទង!
អនាគតប្រធានាធិបតីថ្មីរបស់អាមេរិក បានលើកឡើងថា ដំណឹងនេះ គឺពិតជាល្អណាស់ ក៏ប៉ុន្តែ ការពាក់ម៉ាស់ ការរក្សាគម្លាតសង្គម និងការអនុវត្តតាមវិធានការសុខភាពផ្សេងៗ គឺជារឿងសំខាន់ និងចំាបាច់បំផុត សម្រាប់ឆ្នាំ ២០២០នេះ និងឆ្នាំ ២០២១ខាងមុខ។
ប្រធានអង្គការសុខភាពពិភពលោក បានចាត់ទុកលទ្ធផលនៃការធ្វើតេស្តនេះ គឺជារឿងវិជ្ជមានបំផុត ក៏ប៉ុន្តែ ក៏បានព្រមានដែរថា បញ្ហាកង្វះខាតថវិកាឧបត្ថម្ភជាង ៤ពាន់ ៥រយលានដុល្លារអាមេរិក នឹងបង្កជា ភាពយឺតយ៉ាវដល់ ការធ្វើតេស្ត ផលិតឱសថ និងវ៉ាក់សាំង នៅក្នុងបណ្តាប្រទេសសេដ្ឋកិច្ចខ្នាតតូច និងមធ្យម។
ជាក់ស្តែង ក្រុមហ៊ុនផលិតឱសថ Pfizer និង Biontech បានចុះកុងត្រាជាមួយបណ្តាប្រទេសជាច្រើន ដូចជា រដ្ឋាភិបាលអាមេរិកខ្លួនឯងផ្ទាល់ បានចុះកុងត្រាតម្លៃ ២ពាន់លានដុល្លារអាមេរិក ដែលគ្រោងចាប់ផ្តើមទទួលវ៉ាក់សាំង ១០០លាន តាំងពីដើមឆ្នាំ ២០២០នេះ, សហភាពអឺរ៉ុប ចុះកុងត្រាទិញ ៣០០លានវ៉ាក់សាំង និងមានកុងត្រាជាមួយ ចក្រភពអង់គ្លេស កាណាដា និងជប៉ុនជាដើម។
យ៉ាងណាក៏ដោយចុះ ព័ត៌មានសំខាន់ៗអំពីវ៉ាក់សាំង គឺពុំទាន់ត្រូវបានបង្ហាញនោះទេ ថាតើ វ៉ាក់សាំងប្រភេទនេះ អាចការពារកុំឲ្យមានករណីឆ្លងធ្ងន់ធ្ងរ រហូតដល់ថ្នាក់ឈឺខ្លាំងចូលមន្ទីរពេទ្យ ឬស្លាប់នោះទេ ហើយក៏ពុំបានបង្ហាញថា វាអាចការពារអ្នកផ្ទុកមេរោគ កុំឲ្យចម្លងទៅអ្នកដទៃបាន ឬយ៉ាងណានោះដែរ។
បន្ទាប់ពីការប្រកាសអំពី ប្រសិទ្ធភាពរបស់វ៉ាក់សាំង អាមេរិក ប្រទេសរុស្ស៊ី ក៏បានលើកឡើងអំពី វ៉ាក់សាំងប្រឆាំងមេរោគកូវីដ១៩ របស់ខ្លួន ដែលមានឈ្មោះថា Sputnik V ថាមានប្រសិទ្ធភាពលើសពី ៩០% ដូចគ្នាដែរ ដោយផ្អែកលើទិន្នន័យបានមកពីសាធារណជនផ្ទាល់តែម្តង។
គួរជម្រាបដែរថា ក្រុមអ្នកស្រាវជ្រាវ និងអ្នកផលិតឱសថ ជុំវិញសកលលោក នៅតែបន្តប្រលងប្រណាំង ក្នុងការអភិវឌ្ឍបង្កើតវ៉ាក់សាំងនេះឡើង ដើម្បីប្រយុទ្ធប្រឆាំងនឹងមេរោគឆ្លងកូវីដ-១៩ ដែលបានកើនឡើងលើស ៥០លានករណីទៅហើយ៕
None
