អាមេរិកប្រកាសដាក់ពន្ធលើសម្បកកង់រថយន្ដនាំចូលពីប្រទេសមួយចំនួន ក្រោយរកឃើញថា បានលក់បង្ខូចថ្លៃ

នៅក្នុងឆ្នាំ២០២០ ក្រសួងពាណិជ្ជកម្មអាមេរិកបានបើកការស៊ើបអង្កេត ក្នុងករណីសម្បកកង់នាំចូលពីប្រទេសកូរ៉េខាងត្បូង កោះតៃវ៉ាន់ ប្រទេសថៃ និងវៀតណាម បន្ទាប់ពីមានការដាក់ញ្ញតប្ដឹងជំទាស់ពីសហជីព United Steelworkers របស់អាមេរិក ដែលតំណាងឲ្យកម្មករធ្វើការនៅក្នុងរោងចក្រផលិតសម្បកកង់រថយន្ដជាច្រើន។

ប្រធានសន្និសីទឧស្សហាកម្មកៅស៊ូ និងផ្លាស្ទិកនៃ សហជីព United Steelworkers គឺលោក Kevin Johnsen បាននិយាយថា ប្រព័ន្ធគ្រប់គ្រងពាណិជ្ជកម្មនៅអាមេរិក គឺមានការបញ្ហាច្បាស់ណាស់។ លោកបន្ថែមថា ក្រុមហ៊ុនផលិតសម្បកកង់រថយន្ដក្នុងស្រុក ទម្រាំអាចទទួលបានការជួយពីរដ្ឋាភិបាលនានេះ ពួកគេបានបង្ហាញពីការជំទាស់ ក៏ដូចជាបង្ហាញពីផលប៉ះពាល់របស់ពួកគេ ពិសេសគឺការបាត់បង់ការងារធ្វើ និងការកាត់បន្ថយទីផ្សារនាពេលកន្លងមក ដោយសារតែការនាំចូលសម្បកកង់រថយន្ដលក់បង្ខូចថ្លៃទីផ្សារនេះ ហើយកន្លងមក កម្មករអាមេរិក ក៏បានរងទុក្ខមកជាច្រើនហើយដែរទាក់ទងនឹងរឿងនេះ។

កាលពីឆ្នាំ២០១៥ សហជីពតំណាងរោងចក្រផលិតសម្បកកង់រថយន្ដនៅអាមេរិក ក៏ធ្លាប់បានចេញមុខតវ៉ាយកឈ្នះលើការនាំចូលសម្បកកង់រថយន្ដមកពីប្រទេសចិនម្ដងហើយដែរ ដែលវាបានធ្វើឲ្យការលក់សម្បកកង់រថយន្ដនាំចូលពីចិននៅទីផ្សារអាមេរិក មានការធ្លាក់ចុះជាលំដាប់ ហើយវាបានអនុញ្ញាតឲ្យឧស្សាហកម្មក្នុងស្រុករបស់អាមេរិកមានការស្ទុះងើបឡើងជាថ្មី។

សូមបញ្ជាក់ថា សហរដ្ឋអាមេរិក កាលពីឆ្នាំ២០២០ បាននាំចូលសម្បកកង់រថយន្ដពីប្រទេសកូរ៉េខាងត្បូង កោះតៃវ៉ាន់ ប្រទេសថៃ និងវៀតណាម ក្នុងតម្លៃជាង៤ពាន់៤រយលានដុល្លារ៕