នេះបើតាមការរាយការណ៍ដោយសារព័ត៌មានធំៗជាច្រើន។ តើមានមូលហេតុអ្វីខ្លះ ទើបក្រុមប្រទេសផលិតនាំចេញប្រេង OPEC+ មិនអាចបូមប្រេងបានទៅតាមការចង់បានរបស់អាមេរិក?
អង្គការប្រទេសនាំចេញប្រេង និងសម្ព័ន្ធមិត្តរបស់ខ្លួន ដែលគេស្គាល់ថា OPEC+ កំពុងតែសម្រាលនូវអ្វីដែលជាវិធានការទប់ស្កាត់ការផ្គត់ផ្គង់ប្រេងរបស់ខ្លួន ដែលបានផលិតឡើងកាលពីឆ្នាំ២០២០ ដោយកាលនោះ ក្រុមប្រទេសទាំងនេះ បានកាត់បន្ថយការផលិតប្រេង ដើម្បីរក្សាតម្លៃប្រេងឆៅកុំឲ្យធ្លាក់ចុះខ្លាំង នៅគ្រាដែលតម្រូវការនាពេលនោះក៏មានការធ្លាក់ចុះដែរ។ ប៉ុន្ដែ បន្ទាប់ពីស្ថានភាពកូវីដ១៩ធូរស្បើយ ជាមួយនឹងការបន្ធូរបន្ថយវិធានការរឹតបន្ដឹង និងមានសកម្មភាពសេដ្ឋកិច្ចសង្គមឡើងវិញនៅប្រទេសជាច្រើននៅទូទាំងពិភពលោក វាក៏បានធ្វើឲ្យតម្រូវការប្រេងហក់ឡើងខ្ពស់ ប្រេងក៏ឡើងថ្លៃខ្លាំងណាស់ដែរមកទល់បច្ចុប្បន្ននេះ។ ដូច្នេះហើយ ទើបអាមេរិកបានដាក់សម្ពាធទៅលើអង្គការប្រទេសផលិតនាំចេញប្រេង OPEC+ ឲ្យបង្កើនការបូមប្រេងឲ្យបានច្រើន ដើម្បីជំរុញបន្ទាបតម្លៃប្រេងឲ្យមកនៅទាបវិញ ក៏ប៉ុន្ដែ ការបង្កើនការបូមប្រេងនេះ គឺនៅមិនទាន់លឿនគ្រប់គ្រាន់ តាមការចង់បានរបស់ទីក្រុងវ៉ាស៊ិនតោននៅឡើយទេ ហើយកំពុងបង្កឲ្យមានក្ដីបារម្ភអំពីតម្លៃប្រេងដែលជិតដល់កម្រិតខ្ពស់បំផុតមិនធ្លាប់មានក្នុងរយៈពេល៣ឆ្នាំចុងក្រោយនេះ។
អង្គការ OPEC+ ដែលរួមមានប្រទេសរុស្ស៊ីដែលជាដៃគូប្រជែងរបស់អាមេរិកដែរនោះ បានចេញមុខទប់ទល់នឹងសម្ពាធ ដែលអាមេរិកបានដាក់ ឲ្យមានការបន្ថែមល្បឿនបូមប្រេងនេះ ដោយក្រុមប្រទេសផលិតប្រេងទាំងអស់នោះ នៅតែប្រកាន់ខ្ជាប់នូវផែនការរបស់ពួកគេក្នុងការបង្កើនទិន្នផលជាបណ្ដើរៗក្នុងចំនួន ៤០ម៉ឺនបារ៉ែលក្នុងមួយថ្ងៃ ជារៀងរាល់ខែចាប់តាំងពីខែសីហាមក ហើយក្រុមប្រទេសផលិតប្រេងទាំងនេះ ក៏បានលើកឡើងពីក្ដីបារម្ភដែរថា ប្រសិនបើពួកគេបង្កើនការបូមប្រេងលឿនពេក វានឹងធ្វើឲ្យមានទីផ្សារប្រេងនៅឆ្នាំ២០២២នឹងមានសភាពអាប់អ៊ួឡើងវិញ ហើយវាក៏អាចរាំងស្ទះទៅដល់ផែនការបូមប្រេងរបស់ពួកគេផងដែរ។
អត្ថបទគួរអាន
បញ្ហាមួយទៀត ដែលប្រទេសផលិតប្រេងមិនអាចបង្កើនការបូមប្រេងបានលឿន គឺដោយសារតែការវិនិយោគនៅក្នុងផលិតកម្មប្រេងមានការធ្លាក់ចុះ ព្រោះតែវិបត្តិកូវីដ១៩ និងសម្ពាធបញ្ហាបរិស្ថានចំពោះក្រុមប្រទេសផលិតប្រេង ពិសេសនៅរដ្ឋក្រីក្រតែម្ដង។ មានន័យថា មានត្រឹមតែសមាជិក ៣ប៉ុណ្ណោះ នៃអង្គការ OPEC+ ដែលអាចបង្កើនសមត្ថភាពផ្គត់ផ្គង់ប្រេងបានលឿន គឺអារ៉ាប់ប៊ីសាអ៊ូឌីត, អេមេរ៉ាតអារ៉ាប់រួម, និងប្រទេសអ៊ីរ៉ាក់។
យ៉ាងណាក៏ដោយចុះ ផលិតកម្មប្រេង របស់ OPEC+ ត្រូវបានគេមើលឃើញថា គឺមានតិចជាងអ្វីដែលបានកំណត់នៅក្នុងផែនការ ពោលគឺការបូមប្រេងមានប្រមាណ៧០ម៉ឺនបារ៉ែលប៉ុណ្ណោះក្នុងមួយថ្ងៃ សម្រាប់ខែកញ្ញា និងខែតុលាកន្លងទៅនេះ។ ប្រការនេះ បានធ្វើឲ្យទីផ្សារប្រេងឆៅកាន់តែជួបការលំបាក ហើយតម្លៃប្រេងក៏នឹងនៅតែមានខ្ពស់យូរទៅមុខទៀតដែរ។ នេះបើតាមការអះអាងពី ទីភ្នាក់ងារថាមពលអន្តរជាតិ។
សូមបញ្ជាក់ថា ថ្មីៗនេះ សហរដ្ឋអាមេរិក ក៏មានផែនការនឹងបញ្ចេញស្ដុកប្រេងដែលបានបម្រុងទុកទៅលើទីផ្សារផងដែរ ដើម្បីធានាតម្លៃប្រេងកុំឲ្យហក់ឡើងខ្ពស់ ហើយអាមេរិក ក៏បានអំពាវនាវទៅដល់ប្រទេសចិនឲ្យមានការបញ្ចេញស្ដុកប្រេងរបស់ខ្លួនទៅលើទីផ្សារផងដែរ ដ្បិតថា ប្រទេសចិន និងអាមេរិក គឺសុទ្ធសឹងជាប្រទេសដែលមានការនាំចូល និងប្រើប្រាស់ប្រេងច្រើនជាងគេបំផុតនៅក្នុងពិភពលោក។
តម្លៃប្រេងឆៅនៅទីផ្សារអាមេរិក នៅថ្ងៃអង្គារសប្ដាហ៍នេះ មានជិត៧៦ដុល្លារអាមេរិក ខណៈតម្លៃប្រេងឆៅនៅអង់គ្លេសជិត៧៩ដុល្លារអាមេរិក៕
None
