ក្រុមហ៊ុន OMNI NAVITAS ដែលជាក្រុមហ៊ុនវិនិយោគលើវិស័យថាមពលធំមួយរបស់អាមេរិក បានសម្លឹងឃើញឱកាសវិនិយោគថាមពលអគ្គិសនី ដោយប្រើបន្ទះសូឡានៅកម្ពុជា ហើយបើតាមការអះអាងពីនាយកប្រតិបត្តិរបស់ក្រុមហ៊ុននេះ បានគូសបញ្ជាក់ថា ក្រុមហ៊ុនខ្លួនគ្រោងនឹងចំណាយទុនវិនិយោគប្រមាណ ៥០០លានដុល្លារ ដើម្បីសាងសង់ប្រព័ន្ធថាមពលសូឡានៅកម្ពុជា ជាមួយនឹងថាមពលអគ្គិសនីទំហំ ១៥០មេហ្គាវ៉ាត់។
លោក Jim McAuliffe នាយកប្រតិបត្តិក្រុមហ៊ុន OMNI NAVITAS បានលើកឡើងថា ក្រុមហ៊ុនរបស់លោកបានសិក្សាពីទីផ្សារកម្ពុជាជាយូរមកហើយ ហើយបច្ចុប្បន្ន លោកកំពុងស្វែងរកកិច្ចគាំទ្រពីរាជរដ្ឋាភិបាលកម្ពុជា ដើម្បីអាចសម្រួលដល់គម្រោងនេះ ឲ្យចេញជាលទ្ធផលក្នុងពេលឆាប់ខាងមុខៗ។
លោកបន្ថែមថា គម្រោងវិនិយោគលើប្រព័ន្ធថាមពលសូឡានេះ កំពុងត្រូវបានសិក្សាទីតាំងនៅខេត្តកោះកុង សម្រាប់រៀបចំដំឡើងប្រព័ន្ធបន្ទះសូឡា ដែលមានផ្ទៃដីប្រមាណ ៥០០ហិកតា និងផ្ដល់នូវកាងារជូនកម្មករខ្មែរប្រមាណ ៣ពាន់នាក់ផងដែរ។
លោក ប៊ូ បញ្ញា ដៃគូគ្រប់គ្រងនៃក្រុមហ៊ុន OMNICAM ដែលជាក្រុមហ៊ុនក្នុងស្រុកមួយ ត្រូវបានបង្កើតឡើងរវាងការសហវិនិយោគជាមួយក្រុមហ៊ុនអាមេរិក OMNI NAVITAS បានលើកឡើងថា ការចូលមករបស់ក្រុមហ៊ុនអាមេរិកមួយនេះ ក៏ត្រូវបានចូលរួមសហវិនិយោគ ជាមួយនឹងក្រុមហ៊ុនក្នុងស្រុកដែរ ពោលគឺក្រុមហ៊ុន OMNI NAVITAS របស់អាមេរិកមានភាគហ៊ុន ៥១% និងក្រុមហ៊ុនក្នុងស្រុកមានភាគហ៊ុន ៤៩%។
ក្រុមហ៊ុន OMNI NAVITAS របស់អាមេរិក គ្រោងវិនិយោគ ៥០០លានដុល្លារ លើប្រព័ន្ធថាមពលពន្លឺព្រះអាទិត្យ (សូឡា) នៅកម្ពុជា។
តើអ្នកបានអានអត្ថបទនេះឬនៅ?
លោកបន្ថែមថា ថាមពលអគ្គិសនីដែលផលិតបាន នឹងត្រូវលក់ជូនទៅកាន់អាជ្ញាធរអគ្គិសនីកម្ពុជា EDC ដើម្បីផ្គត់ផ្គង់ការប្រើប្រាស់ក្នុងប្រទេស។ រីឯតម្លៃដែលដាក់ជូនទៅកាន់ EDC គឺមានតម្លៃ ៩សេនក្នុងមួយគីឡូវ៉ាត់ម៉ោង និងសុំដំឡើងតម្លៃបន្ដិចបន្តួចជាប្រចាំឆ្នាំ តែយ៉ាងណា តម្លៃនេះ នឹងមានការចរចាគ្នាជាថ្មីម្ដងទៀតជាមួយនឹង EDC ខណៈដែលតម្លៃថាមពលអគ្គិសនីដែលក្រុមហ៊ុនចិនផលិតលក់មកឲ្យ EDC នាពេលបច្ចុប្បន្ន មានតម្លៃប្រមាណជាង ៧សេន ទៅ ៨សេន ក្នុងមួយគីឡូវ៉ាត់ម៉ោង។
លោកបន្តថា ប្រសិនបើគម្រោងនេះនឹងត្រូវបានគាំទ្រឲ្យដំណើរការពេញលេញ នោះការសាងសង់ដំឡើងថាមពលពន្លឺព្រះអាទិត្យដោយប្រើបន្ទះសូឡានេះ នឹងចំណាយពេលប្រមាណ១ឆ្នាំប៉ុណ្ណោះ នឹងរួចរាល់ហើយ។
យ៉ាងណាក៏ដោយចុះ លោក ប៊ូ បញ្ញា ជឿជាក់ថា រាជរដ្ឋាភិបាលនឹងជួយគាំទ្រដល់គម្រោងវិនិយោគលើវិស័យថាមពលអគ្គិសនីនេះ ដើម្បីបង្កើនសមត្ថភាពផ្គត់ផ្គង់អគ្គិសនីកម្ពុជាកាន់តែមានភាពពេញលេញ និងប្រកួតប្រជែង ក៏ដូចជាការបើកទ្វារឲ្យវិនិយោគិនបរទេស ពិសេស វិនិយោគិនអាមេរិក ចូលមកវិនិយោគនៅកម្ពុជាកាន់តែច្រើនឡើងផងដែរ។
ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្ម បានលើកឡើងដែរថា ក្រសួងពាណិជ្ជកម្មសាទរចំពោះការចាប់អារម្មណ៍របស់ក្រុមហ៊ុនអាមេរិកមួយនេះ មកលើទីផ្សារកម្ពុជា និងគាំទ្រដល់ការវិនិយោគក្នុងវិស័យអគ្គិសនីនៅកម្ពុជា ព្រោះថា បច្ចុប្បន្ន កម្ពុជាក៏កំពុងខ្វះខាតថាមពលអគ្គិសនីប្រើប្រាស់ផងដែរ។ ប៉ុន្ដែ ឯកឧត្តមសង្ឃឹមថា ក្រុមហ៊ុននឹងពិចារណាធ្វើយ៉ាងណាឲ្យតម្លៃមានទាប ឬស្មើនឹងក្រុមហ៊ុនផ្គត់ផ្គង់នាពេលបច្ចុប្បន្ន នោះទើបអាចធានាបាននូវភាពប្រកួតប្រជែងទីផ្សារ។
តើអ្នកបានអានអត្ថបទនេះ ឬនៅ?
ទោះយ៉ាងណា ឯកឧត្តមបានគូសបញ្ជាក់ថា នៅប្រមាណ២ឆ្នាំទៀត ការផ្គត់ផ្គង់ថាមពលអគ្គិសនីរបស់កម្ពុជា នឹងមានសមត្ថភាពកើនឡើងច្រើនទៀត ព្រោះថា បច្ចុប្បន្ន កម្ពុជាក៏មានទំនប់វារីអគ្គិសនីធំៗជាច្រើនត្រូវបាននិងកំពុងបង្កើតឡើង ដែលនឹងពង្រីកសមត្ថភាពផ្គត់ផ្គង់ថាមពលអគ្គិសនីកាន់តែធំជាងមុនផងដែរ។
សូមជ្រាបដែរថា បើតាមរបាយការណ៍ពីអាជ្ញាធរអគ្គិសនីកម្ពុជា បានបង្ហាញថា បច្ចុប្បន្ន កម្ពុជាមានសមត្ថភាពផលិតថាមពលអគ្គិសនីប្រើប្រាស់ក្នុងស្រុកប្រមាណជាង ៨០% ហើយ ខណៈដែលជិត ២០%ទៀត ត្រូវបានទិញពីប្រទេសជិតខាង។ ទន្ទឹមនឹងនេះ ក្នុងឆ្នាំ២០១៧ កន្លងទៅ អានុភាពសរុបនៃថាមពលអគ្គិសនី ដែលកម្ពុជាបានប្រើប្រាស់ មានប្រមាណជាង ២.២៨៤ មេហ្គាវ៉ាត់ កើនឡើងប្រមាណ ១១% ធៀបនឹងឆ្នាំ២០១៦ ដែលមានប្រមាណតែជាង ២.១១៥ មេហ្គាវ៉ាត់។
ប្រភពអគ្គិសនីដែលផលិតឡើងក្នុងស្រុកមានដូចជា ប្រភពដុតធ្យូងថ្ម វារីអគ្គិសនី ដុតប្រេង ប្រភពកកើតឡើងវិញ និងប្រភពផ្ទាល់ខ្លួនរបស់អ្នកចែកចាយ។ ក្នុងនោះ គិតត្រឹមឆ្នាំ២០១៧ ប្រភពវារីអគ្គិសនីត្រូវបានកត់សម្គាល់ឃើញថា មានទំហំនៃការផ្គត់ផ្គង់ច្រើនជាង ពោលគឺមាន ៩៧៩មេហ្គាវ៉ាត់ ប្រភពធ្យូងថ្ម មាន ៥៣៨ មេហ្គាវ៉ាត់ និងប្រភពថាមពលកកើតឡើងវិញ មាន ៨៤មេហ្គាវ៉ាត់។ រីឯតម្លៃអគ្គិសនីអប្បបរមា សម្រាប់ការប្រើប្រាស់បច្ចុប្បន្នមានចាប់ពីក្រោម ឬស្មើ ៧៩០រៀល និងអតិបរមា មានដល់ ២៦០០រៀល ដល់ ៣០០០រៀល។ ទោះយ៉ាងណា តម្លៃថាមពលអគ្គិសនីនៅកម្ពុជា ត្រូវបានគេមើលឃើញថា នៅតែមានខ្ពស់ជាងប្រទេសជិតខាងនៅឡើយ៕
None
