រដ្ឋបាលអាមេរិកចាត់ទុកកិច្ចប្រជុំអាមេរិក ជាមួយនឹងមេដឹនាំអាស៊ាននេះ គឺជា "អាទិភាពកំពូល" ដើម្បីបម្រើជា "ដៃគូដ៏រឹងមាំ និងគួរឱ្យទុកចិត្តសម្រាប់អាស៊ាន និងធ្វើការរួមគ្នា ដើម្បីដោះស្រាយបញ្ហាប្រឈមនានា។ កិច្ចប្រជុំកំពូលរវាងលោក ចូ បៃដិន នឹងមេដឹកនាំនៃប្រទេសសមាគមប្រជាជាតិអាស៊ីអាគ្នេយ៍ហៅកាត់អាស៊ាន នឹងធ្វើឡើងនៅថ្ងៃទី ២៨ និង ២៩ ខែមីនានៅទីក្រុងវ៉ាស៊ីនតោន។
មន្ត្រីដែលបាននិយាយក្នុងលក្ខខណ្ឌមិនបញ្ចេញឈ្មោះបានបន្ថែមថា ផលប្រយោជន៍ គុណតម្លៃ និងចក្ខុវិស័យរួមរបស់អាមេរិកសម្រាប់តំបន់នេះ នឹងជំរុញឱ្យតំបន់ឥណ្ឌូប៉ាស៊ីហ្វិកមានសេរីភាព និងបើកចំហ សុវត្ថិភាព និងរឹងមាំ។
គួរជម្រាបថាកិច្ចប្រជុំកំពូលនេះ ទំនងជានឹងមានការចូលរួមពីសំណាក់មេដឹកនាំអាស៊ានតែ៩ប្រទេសប៉ុណ្ណោះ ខណៈដែលមេដឹកនាំប្រទេសមីយ៉ាន់ម៉ា ដែលពួកយោធាបានដណ្តើមអំណាចក្នុងរដ្ឋប្រហារកាលពីខែកុម្ភៈឆ្នាំមុន ទំនងជាមិនចូលរួមក្នុងកិច្ចប្រជុំកំពូលនាពេលខាងមុខនោះទេ។
អត្ថបទគួរអាន
នៅថ្ងៃច័ន្ទដដែលនេះ អ្នកសម្របសម្រួលរបស់សេតវិមានសម្រាប់តំបន់ឥណ្ឌូប៉ាស៊ីហ្វិក លោក Kurt Campbell បានឱ្យដឹងថា លោក បៃដិន ត្រូវបានគេរំពឹងថានឹងធ្វើដំណើរទៅកាន់តំបន់អាស៊ីអាគ្នេយ៍ ដើម្បីចូលរួមក្នុងការប្រមូលផ្តុំ ក៏ដូចជាកិច្ចប្រជុំសំខាន់ៗដែលពាក់ព័ន្ធនឹងអាស៊ាននៅចុងឆ្នាំនេះផងដែរ។
គួររំឭកថា កាលពីឆ្នាំមុន លោក បៃដិន បានចូលរួមកិច្ចប្រជុំកំពូលទាក់ទងនឹងអាស៊ាន ដែលធ្វើឡើងជាទម្រង់អនឡាញចំពេលមានការរីករាលដាលនៃមេរោគឆ្លងកូវីដ១៩។ លោក ប៉ៃដិន បានសង្កត់ធ្ងន់លើសារៈសំខាន់នៃការបង្ហាញមុខរបស់អាមេរិកក្នុងកិច្ចប្រជុំអាស៊ាន ដែលផ្ទុយពីលោក ដូណាល់ ត្រាំ ដែលត្រូវបានរិះគន់ ដោយសម្ព័ន្ធមិត្តអាស៊ីប៉ាស៊ីហ្វិកចំពោះការមើលងាយកិច្ចប្រជុំសំខាន់ៗនៅក្នុងតំបន់នេះ៕
អត្ថបទ ស៊ើង និមល់
None
