នៅក្នុងសន្និសារព័ត៌មានក្រោយជំនួបរវាងប្រទេសជាសម្ព័ន្ធទាំងបីនៅកោះហាវៃ លោកប្លីនខេន និយាយថា កូរ៉េខាងជើងស្ថិតក្នុងតំណាក់កាលមួយដែលចង់បង្ករឿង ស្របពេលដែលជប៉ុន និងកូរ៉េខាងត្បូង រួមទាំងអាមេរិកខ្លួនឯង បានសម្តែងការថ្កោលទោសការសាកល្បងមីស៊ីលរបស់ក្រុងព្យុងយ៉ាងជាបន្តបន្ទាប់ផងដែរ។
យ៉ាងណាមិញ សម្ព័ន្ធមិត្តទាំងបី គឺជប៉ុន កូរ៉េខាងត្បូង និងអាមេរិកបានចេញសេចក្តីថ្លែងការណ៍រួមមួយ អំពាវនាវឲ្យព្យុងយ៉ាងត្រឡប់ចូលតុចរចា តែត្រូវបញ្ឈប់សកម្មភាពសាកល្បងមីស៊ីលបាលីស្ទិកខុសច្បាប់របស់ខ្លួនបន្តទៀតទៅ។ សេចក្តីថ្លែងការណ៍ដដែលបានចាត់ទុក ការសាកល្បងមីស៊ីលបាលីស្ទិក ទាំង៧លើក ត្រឹមរយៈពេល១ខែដំបូងនៅឆ្នាំ២០២២របស់កូរ៉េខាងជើង កន្លងមកនេះថា បានបង្កឱ្យមានអស្ថិរភាពក្នុងតំបន់ខ្លាំងណាស់។
សកម្មភាពរបស់កូរ៉េខាងជើង ត្រូវបានក្រុមអ្នកវិភាគមួយចំនួនអះអាងថា ជាការព្យាយាមដាក់សម្ពាធលើរដ្ឋបាលលោកចូ បៃឌិន ឲ្យបើកផ្លូវចរចាជាមួយក្រុងព្យុងយ៉ាង ជាថ្នូរនឹងការដកទណ្ឌកម្មសេដ្ឋកិច្ចមកលើខ្លួន ស្របពេលដែលរបបផ្តាច់ការមួយនេះ កំពុងយ៉ាប់យ៉ឺនសេដ្ឋកិច្ច ដែលបណ្តាលមកពីមេរោគឆ្លងកូវីដ១៩ និងការរងទណ្ឌកម្មអន្តរជាតិអស់ពេលជាយូរហើយនោះ នៅតែជាសម្ពាធដល់កូរ៉េខាងជើង។
អត្ថបទគួរអាន
ទីក្រុងវ៉ាស៊ីនតោន បានចំហទ្វារចរចាដល់កូរ៉េខាងជើងពិតមែន ប៉ុន្តែមិនបានបង្ហាញពីឆន្ទៈក្នុងការបន្ធូរបន្ថយទណ្ឌកម្មនោះឡើយ ប្រសិនបើកម្មវិធីនុយក្លេអ៊ែររបស់ព្យុងយ៉ាងនៅតែបន្តសកម្មភាព។
គួរជម្រាបថា រដ្ឋមន្ត្រីការបរទេសអាមេរិក លោកអាន់តូនី ប្លីងខេន បានបំពេញបេសកម្មដំណើរទស្សនកិច្ចនៅក្នុងតំបន់ឥណ្ឌូប៉ាស៊ីហ្វិកជាលើកទី២របស់លោក។ លោកបានចាប់ផ្តើមដំណើរទស្សនកិច្ចកាលពីថ្ងៃទី០៧ ខែកុម្ភៈនៅប្រទេសអូស្ត្រាលី ជាទីដែលលោកបានជួបជាមួយសមភាគីនៃសម្ព័ន្ធមិត្ត "Quad" រួមមានអូស្ត្រាលី ឥណ្ឌា និងជប៉ុន ខណៈបានបន្តដំណើរមកប្រទេសហ្វីជី និងកោះហាវៃ ដើម្បីជួបជាមួយបណ្តាប្រទេសនៅតំបន់មហាសមុទ្រប៉ាស៊ីហ្វិក និងជួបជាមួយសមភាគី ជប៉ុន និងកូរ៉េខាងត្បូងនេះផ្ទាល់តែម្តង។ លោកបានវិលមកសហរដ្ឋអាមេរិកវិញ កាលពីថ្ងៃទី ១២ខែកុម្ភៈនេះ៕
None
