លោក ហួង កុច វួង អនុរដ្ឋមន្រ្តីនៃក្រសួងឧស្សហកម្ម និងពាណិជ្ជកម្មវៀតណាម បានលើកឡើងថា ការអភិវឌ្ឍនេះ ត្រូវការចំណាយច្រើនណាស់ ដើម្បីរៀបចំការផលិតថាមពលជាង ៨ម៉ឺន ៣ពាន់មេហ្គាវ៉ាត់ បន្ថែមទៀត គួបផ្សំនឹងបណ្តាញចែកចាយថាមពលអគ្គិសនីនេះ ដើម្បីអាចសម្រេចនូវផែនការរបស់រដ្ឋាភិបាលបាន។
លោកបន្តថា សព្វថ្ងៃនេះ ប្រទេសវៀតណាម ពឹងផ្អែកស្ទើរតែទាំងស្រុងលើ វារីអគ្គិសនី និងរោងចក្រផលិតថាមពលអគ្គិសនីដោយកម្តៅ ក៏ប៉ុន្តែវៀតណាម បានប្រើប្រាស់សក្តានុពលវារីអគ្គិសនី ស្ទើរតែអស់លទ្ធភាពទៅហើយ ខណៈដែរ ស្តុកប្រេង និងហ្គាស សម្រាប់ដុតកម្តៅ ក៏នៅសល់តិចតួចដែរ។
តម្រូវការប្រើប្រាស់ថាមពលទាំងនេះ បានកើនឡើង ២ដង លើសពី ផលិតផលក្នុងស្រុកសរុបទៅទៀត ពោលគឺកើនប្រមាណ ១៤ភាគរយ ដែលបានដាក់សម្ពាធយ៉ាងខ្លាំងទៅលើ រដ្ឋាភិបាលវៀតណាម ទាំងផ្នែកហិរញ្ញវត្ថុ និងយន្តការដោះស្រាយបញ្ហានេះ។
អត្ថបទទាក់ទង!
យ៉ាងណាក៏ដោយ ធនាគារពិភពលោក បានព្យាករណ៍ថា តម្រូវការប្រើប្រាស់ថាមពលក្នុងប្រទេសវៀតណាម នឹងបន្តកើនឡើង ៨ភាគរយក្នុងមួយឆ្នាំ សម្រាប់រយៈពេល ១០ឆ្នាំទៅមុខទៀត ដែលមានន័យថា វៀតណាម ត្រូវការទឹកប្រាក់ ១៥០ពាន់លានដុល្លារអាមេរិក ត្រឹមឆ្នាំ ២០៣០ ដើម្បីអភិវឌ្ឍវិស័យថាមពលរបស់ខ្លួន។
បើទោះបីជាប្រទេសវៀតណាម មានតម្លៃអគ្គិសនីថោកជាងបណ្តាប្រទេសក្នុងតំបន់ក៏ដោយ តម្លៃអគ្គិសនី នៅតែបន្តកើនឡើងពីមួយឆ្នាំ ទៅ មួយឆ្នាំ កើនឡើងជិត ១០ឆ្នាំទៅហើយ ដោយសារការផ្គត់ផ្គង់ក្នុងស្រុក មិនទាន់អាចបំពេញតម្រូវការបាន និងខ្វះការវិនិយោគបន្ថែម នៅក្នុងវិស័យនេះ។
គួរជម្រាបដែរថា តម្លៃអគ្គិសនីនៅវៀតណាម បានកើនឡើងជាង ១០ឆ្នាំមកហើយ ចាប់ពី ៤,១ សេនដុល្លារអាមេរិក មកដល់តម្លៃចុងក្រោយនេះគឺ ៨សេនដុល្លារអាមេរិក ក្នុងមួយគីឡូវ៉ាត់ម៉ោង ដែលធ្វើឲ្យតម្លៃនេះ ស្មើនឹងតម្លៃអគ្គិសនីនៅក្នុងប្រទេសចិន និងឥណ្ឌា ប៉ុន្តែយ៉ាងណាក៏នៅតែទាបជាង ប្រទេសឡាវ ឥណ្ឌូនេស៊ី និងកម្ពុជាផងដែរ។
ដោយឡែកយើងក្រឡេកមកមើលពី ប្រភពអគ្គិសនីរបស់ ប្រទេសកម្ពុជា ដែលបាននាំចូលពីប្រទេសជិតខាងវិញឃើញថា នៅក្នុងឆ្នាំ ២០១៨កន្លងទៅ កម្ពុជា ក៏បាននាំចូលថាមពលអគ្គិសនីប្រមាណជាង ១៤ភាគរយ នៃប្រភពអគ្គិសនីទាំងអស់ ក្នុងនោះ នាំចូលពីប្រទេសវៀតណាមប្រមាណ ១១ភាគរយ ប្រទេសថៃជិត ៣ភាគរយ និងប្រទេសឡាវ ០.៧ភាគរយ។ នេះបើយោងតាម របាយការណ៍ពី ក្រសួងរ៉ែ និងថាមពលកម្ពុជា។
អត្ថបទគួរឲ្យចាប់អារម្មណ៍!
ក្រៅពីការនាំចូល ប្រទេសកម្ពុជា បានផលិតថាមពលអគ្គិសនីក្នុងស្រុកសរុប រហូតដល់ទៅ ៨៥ភាគរយនៃប្រភពអគ្គិសនីទាំងអស់ ដែលសរុបជាង ២ពាន់ ៨រយមេហ្គាវ៉ាត់ កើនឡើងប្រមាណ ១៤ភាគរយ ធៀបនឹងឆ្នាំ ២០១៧ ហើយថាមពលទាំងនោះ បានមកពី ប្រភពដុតធ្យូងថ្ម វារីអគ្គិសនី ដុតប្រេង និងប្រភពដទៃផ្សេងៗទៀត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
