របាយការណ៍ការិយាល័យស្ថិតិទូទៅរបស់រដ្ឋាភិបាលវៀតណាម បានឲ្យដឹងថា ក្នុងចំណោមប្រទេសដែលទទួលបានការវិនិយោគពីវៀតណាម ២៧ប្រទេសនោះ ប្រទេសកម្ពុជា នៅឈរលំដាប់លេខ២ ដែលក្រុមហ៊ុនវៀតណាមបានចូលមកវិនិយោគច្រើនជាងគេ ពោលគឺ ដែលមានចំនួនទឹកប្រាក់ប្រមាណ ៣២ លានដុល្លារអាមេរិក ស្មើនឹងប្រមាណជាង១២% នៃការវិនិយោគក្រៅប្រទេសសរុបរបស់វៀតណាម ដែលមានទឹកប្រាក់ ២៦៣ លានដុល្លារ ខណៈដែលប្រទេសឡាវឈរលំដាប់លេខ១ មានជិត ៣២% ឬស្មើនឹងទឹកប្រាក់ប្រមាណ ជាង ៩០ លានដុល្លារអាមេរិក។
អត្ថបទទាក់ទង!
ក្នុងពាក់កណ្ដាលឆ្នាំ២០១៨នេះដែរ វិស័យធនាគារ និងហិរញ្ញវត្ថុ ត្រូវបានគេដឹងថា ឈរក្នុងលំដាប់កំពូលមួយ ក្នុងចំណោមការវិនិយោគនៅក្រៅប្រទេសរបស់វៀតណាម ដែលមានទំហំវិនិយោគជាង ១០០លានដុល្លារអាមេរិក ឬស្មើនឹងជាង ៤០% នៃទុនវិនិយោគក្រៅប្រទេសសរុប។ បន្ទាប់ពីនេះ គឺមានការវិនិយោគនៅក្នុងវិស័យផ្សេងៗទៀតដូចជា វិស័យកសិកម្ម ព្រៃឈើ និងផលនេសាទសមុទ្រជាដើម។
ជាមួយគ្នានេះ អ្នកជំនាញសេដ្ឋកិច្ច កម្ពុជា បានអះអាងដែរថា ការវិនិយោគពីវៀតណាមមកកាន់កម្ពុជា ភាគច្រើន គឺមាននៅក្នុងវិស័យធនាគារ កសិកម្ម និងការលក់រាយជាដើម។
ថ្មីៗនេះទៀតសោត ក្នុងជំនួបជាមួយនឹងអភិបាល នៃគណៈអភិបាលខេត្តព្រះសីហនុឯកឧត្តម យន្ត មីន ក្រុមហ៊ុនផលិតដែករបស់វៀតណាម Hoa Phat ក៏បានបង្ហាញពីមហិចតា នៃការវិនិយោគរបស់ខ្លួននៅកម្ពុជាផងដែរ ដែលការវិនិយោគនេះ គ្រោងនឹងចំណាយទុនវិនិយោគប្រមាណ ៥០០លានដុល្លារអាមេរិក ដើម្បីវិនិយោគរោងចក្រផលិតដែក នៅខេត្តព្រះសីហនុ លើផ្ទៃដីប្រមាណពី ១០០ ទៅ ១៥០ ហិកតា។
សូមជម្រាបថា នាប៉ុន្មានឆ្នាំចុងក្រោយនេះ ប្រទេសវៀតណាមបានពង្រីកសក្តានុពលក៏ដូចជា ឥទ្ធិពលរបស់ខ្លួនទៅលើការវិនិយោគយ៉ាងសម្បើម នៅប្រទេសក្នុងតំបន់ឥណ្ឌូចិន គឺកម្ពុជា និងឡាវ ខណៈដែលប្រទេសទាំងពីរនេះ គឺជាគោលដៅទីផ្សារវិនិយោគដ៍ធំជាងគេរបស់ប្រទេសវៀតណាម។
បើតាមរបាយការណ៍ពេញ១ឆ្នាំ ២០១៧ របស់ក្រុមប្រឹក្សាអភិវឌ្ឍន៍កម្ពុជា CDC បានបង្ហាញដែរថា ក្នុងចំណោមប្រទេសទាំង១០ ដែលបានមកវិនិយោគនៅកម្ពុជា វៀតណាម គឺឈរក្នុងលំដាប់លេខរៀងទី៥ ដែលបានបោះទុនវិនិយោគនៅកម្ពុជាជាង ៥១លានដុល្លារអាមេរិក៕
None
