បើតាមបណ្ដាញអគ្គិសនីជាតិវៀតណាម បានឲ្យដឹងថា រោងចក្រថាមពលដើរដោយធ្យូងថ្មជាច្រើន នៅភាគខាងជើង និងតំបន់កណ្ដាលនៃប្រទេសវៀតណាម កំពុងកាត់បន្ថយផលិតកម្មរបស់ខ្លួនដល់មកនៅត្រឹម៦០% ដោយសារតែខ្វះខាតធ្យូងថ្ម។ នេះបើតាមការរាយការណ៍ពីសារព័ត៌មាន VN Express។
ឯកអគ្គរាជទូតអូស្ត្រាលីប្រចាំប្រទេសវៀតណាម លោកស្រី រ៉ូប៊ីន ម៉ូឌី (Robyn Mudie) បានអះអាងថា រដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម បានស្នើសុំជំនួយ ក្នុងការភ្ជាប់ទំនាក់ទំនងក្រុមហ៊ុនវៀតណាម ជាមួយនឹងអូស្ត្រាលី ដើម្បីអាចឲ្យវៀតណាមទិញយកធ្យូងថ្មពីអូស្ត្រាលីនៅក្នុងខែមេសានេះ ខណៈដែលអូស្ត្រាលីត្រូវបានគេដឹងថា ស្ថិតក្នុងចំណោមប្រទេសអ្នកនាំចេញធ្យូងថ្មធំជាងគេបំផុតមួយក្នុងពិភពលោក។ ប៉ុន្ដែ កន្លងមកការនាំចេញធ្យូងថ្មរបស់អូស្ត្រាលី ក៏ជួបបញ្ហាខ្លះៗដែរ ដោយសារតែរងសម្ពាធទណ្ឌកម្មពីប្រទេសចិន។
ក្រៅតែពីស្វែងរកការទិញធ្យូងថ្មពីអូស្ត្រាលីហើយនោះ វៀតណាមក៏កំពុងស្វែងរកប្រភពទិញធ្យូងថ្មពីប្រទេសអាហ្វ្រិកខាងត្បូងផងដែរ។
អគ្គិសនីជាតិវៀតណាម បានអះអាងនៅសប្ដាហ៍នេះថា មានរោងចក្រថាមពលដើរដោយធ្យូងថ្មជាច្រើននៅតំបន់ភាគខាងជើង និងកណ្ដាលនៃប្រទេសវៀតណាម បានកាត់បន្ថយផលិតកម្មប្រមាណមកនៅត្រឹម ៦០% ទៅ៧០% ដោយសារតែខ្វះខាតធ្យូងថ្ម ខណៈបណ្ដាញអគ្គិសនីជាតិវៀតណាម ក៏បានព្រមានអំពីហានិភ័យខ្វះខាតធ្យូងថ្មនេះ ចាប់ពីខែមេសាតទៅផងដែរ។ ទោះយ៉ាងណា ក្រសួងពាណិជ្ជកម្មវៀតណាម អះអាងថា នៅឆ្នាំនេះ នឹងមិនមានការខ្វះខាតថាមពលប្រើប្រាស់នោះទេ។
អត្ថបទគួរអាន
វៀតណាមកំពុងតែកៀគរថាមពលប្រមាណ ជិត៤ពាន់មេហ្គាវ៉ាត់ ពីប្រភពរោងចក្រថាមពលធ្យូងថ្ម និងឧស្ម័ន និងប្រភពថាមពលកកើតឡើងវិញ និងវារីអគ្គិសនីជាដើម។
អាជ្ញាធរវៀតណាមអះអាងថា នៅឆ្នាំ២០២៥ ប្រទេសជិតខាងកម្ពុជាមួយនេះ នឹងត្រូវការថាមពលកកើតឡើងវិញចំនួន ៥ពាន់៥រយមេហ្គាវ៉ាត់ទៀត ដើម្បីទប់ស្កាត់ការខ្វះខាតថាមពល។
វៀតណាមក៏កំពុងស្វែងរក ការសាងសង់រោងចក្រថាមពលដើរដោយខ្យល់បក់នៅក្នុងភាគខាងជើងនៃផ្ទៃប្រទេសផងដែរ ខណៈដែលរោងចក្រភាគច្រើនឥឡូវនេះ មាននៅប៉ែកភាគកណ្ដាល និងខាងត្បូង។
បើតាមអគ្គិសនីជាតិវៀតណាម បានឲ្យដឹងថា រោងចក្រថាមពេលដើរដោយធ្យូងថ្ម មានចំណែកជាង៤៣% នៃថាមពលអគ្គិសនីដែលផលិតបានសរុបកាលពីខែកុម្ភៈ៕
None
