យ៉ាងណាមិញ ថ្មីៗនេះ តម្លៃផ្លែឈើរបស់វៀតណាមមួយចំនួន កំពុងធ្លាក់ថ្លៃខ្លាំងមែនទែន ដូចជាផ្លែស្រកានាគ ឪឡឹក និងកសិផលផ្សេងទៀត ដោយតម្លៃបច្ចុប្បន្ននៅលក់បានត្រឹមតែជាង ៣ពាន់ ទៅ៨ពាន់ដុងក្នុងមួយគីឡូក្រាមប៉ុណ្ណោះ ឬស្មើនឹងប្រហែល ជាង៥០០ ទៅ ជាង១ពាន់៤រយរៀលក្នុងមួយគីឡូក្រាម។ នេះបើតាមការរាយការណ៍ពីសារព័ត៌មាន VN Express។
ក្រុមអាជីវករលក់ផ្លែឈើវៀតណាម បានបញ្ជាក់ប្រាប់អ្នកសារព័ត៌មានថា VN Express ថ្មីៗនេះថា កាលពីមុនពួកគាត់ធ្លាប់លក់ផ្លែឈើបានក្នុងតម្លៃខ្ពស់ ប៉ុន្ដែនៅមួយរយៈចុងក្រោយនេះ ពោលគឺតាំងពីផ្លែឈើនាំចេញទៅចិនលែងបាន បាននាំឲ្យតម្លៃផ្លែឈើក្នុងស្រុកធ្លាក់ថ្លៃខ្លាំងមែនទែន។ ជាក់ស្ដែង ពីមុនគាត់ធ្លាប់លក់ផ្លែឪឡឹកបានដល់តម្លៃជាង១ដុល្លារក្នុងមួយគីឡូក្រាម ប៉ុន្ដែ ឥឡូវនេះ លក់បានត្រឹមតែពាក់កណ្ដាលនៃតម្លៃពីមុនប៉ុណ្ណោះ។
រីឯតម្លៃផ្លែស្រកានាគវិញ ក្រុមអាជីវករខ្លះដាក់លក់ត្រឹមតែប្រហែល ៤ពាន់រៀលប៉ុណ្ណោះ សម្រាប់ផ្លែស្រកានាគ៦គីឡូក្រាម ពោលគឺមួយគីឡូក្រាមមានតម្លៃប្រហែលជាង ៦០០រៀល។
ទន្ទឹមនឹងតម្លៃផ្លែធ្លាក់ថ្លៃ ក្រុមអ្នកលក់ផ្លែឈើវៀតណាមក៏កំពុងប្រឈមនឹងតម្លៃដឹកជញ្ជូនឡើងថ្លៃខ្ពស់ដែរ ដែលវាធ្វើឲ្យពួកគេកាន់តែលំបាក និងស្ទើរតែលក់រកប្រាក់ចំណេញមិនឃើញនោះទេ។
អត្ថបទគួរអាន
បើងាកទៅមើលការនាំចេញផ្លែឈើតាមច្រកព្រំដែនវៀតណាម ទៅកាន់ប្រទេសចិនវិញ គឺនៅតែបន្ដអូសបន្លាយជាប់គាំងមកអស់រយៈពេល៣ខែមកហើយ ដោយបង្ខំឲ្យអ្នកបើកបរកុងតឺន័រដឹកទំនិញទាំងនោះត្រឡប់ចូលទីក្រុងវិញ ហើយដាក់លក់ក្នុងតម្លៃត្រឹមតែពាក់កណ្ដាល ឬ១ភាគបីនៃតម្លៃនាំចេញតែប៉ុណ្ណោះ។
នៅតំបន់ភាគខាងជើងនៃខេត្តឡាក់សឺន ប្រទេសវៀតណាម ដែលជាច្រកព្រំដែនដ៏សំខាន់ក្នុងការនាំចេញទំនិញទៅកាន់ប្រទេសចិននោះ ត្រូវបានភ្នាក់ងារគយវៀតណាមរាយការណ៍ថា មានកុងតឺន័រដឹកទំនិញជាង១ពាន់៣រយគ្រឿងបានជាប់គាំងនៅទីនោះ នាដើមសប្ដាហ៍នេះ ហើយមាន ៣ភាគ៤នៃកុងតឺន័រទាំងនោះ គឺដឹកផ្លែឈើ។ ការកកស្ទះកុងតឺន័រដឹកទំនិញតាមច្រកព្រំដែន ត្រូវបានគេរំពឹងថា នឹងបន្ដកើនឡើងថែមទៀត នៅប៉ុន្មានថ្ងៃខាងមុខនេះ។
បើទោះបីជា ការនាំចេញតាមច្រកព្រំដែនគោកមានការជាប់គាំងក្ដី ប៉ុន្ដែ បើមើលទៅលើការនាំចេញការនាំចេញផលិតផលកសិកម្ម រុក្ខាប្រមាញ់ និងនេសាទរបស់វៀតណាមជារួម ទៅកាន់ទីផ្សារចិននៅក្នុងរយៈពេល២ខែឆ្នាំ២០២២ គឺនៅតែសម្រេចបានជាង៨ពាន់លានដុល្លារ កើនឡើងជាង២០% ធៀបនឹងរយៈពេលដូចគ្នាកាលពីឆ្នាំមុន ។ នេះបើតាមរបាយការណ៍ពីក្រសួងកសិកម្ម និងអភិវឌ្ឍន៍ជនបទ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
