ព្យុះទីហ្វុងប៊ូឡូយបានវាយប្រហារយ៉ាងដំណំលើប្រទេសវៀតណាមនៅឆ្នាំនេះ ដោយបានបង្កការបំផ្លិចបំផ្លាញតំបន់ភាគខាងជើង និងកណ្តាល ដែលបណ្តាលឲ្យមនុស្សយ៉ាងតិច៥៤នាក់ស្លាប់ និងរបួសជាង១៤០នាក់ និងបានបង្កការខាតបង់ផ្នែកសេដ្ឋកិច្ចប្រមាណជាង៣៣២លានដុល្លារ។ បើយោងតាមនាយកដ្ឋានគ្រប់គ្រងទំនប់ទឹកនិងបង្ការគ្រោះមហន្តរាយនៃក្រសួងកសិកម្ម និងបរិស្ថានវៀតណាម ព្យុះដ៏កំណាចនេះបានបង្កឱ្យមានភ្លៀងធ្លាក់ខ្លាំង បំណាក់ដី ទឹកជំនន់ភ្លាមៗ និងខ្យល់កន្រ្តាក់វាយលុកនៅក្នុងខេត្ត-ក្រុងចំនួន១៨របស់វៀតណាម។
គ្រោះធម្មជាតិនេះបានបំផ្លាញលំនៅឋានប្រជាពលរដ្ឋលើសពី៩ម៉ឺនខ្នងបំផ្លាញផលដំណាំប្រមាណ៤ម៉ឺន៩ពាន់ហិកតា និងបណ្តាលឱ្យសត្វនៅតាមកសិដ្ឋាននានាជាច្រើនពាន់ក្បាលបានស្លាប់។ លើសពីនេះព្យុះនេះបានបង្កផលប៉ះពាល់ដល់បណ្តាញផ្គត់ផ្គង់អគ្គិសនី និងប្រព័ន្ធទូរសព្ទជាង៨ពាន់បង្គោល ដែលបង្កឱ្យមានការកាត់ផ្តាច់ថាមពលធ្វើឱ្យប៉ះពាល់ប្រជាពលរដ្ឋប្រមាណ២,៧លានគ្រួសារ លិចផ្លូវ និងសាលារៀនជាច្រើនកន្លែង។
ព្យុះទីហ្វុងដ៏កំណាចនេះ ក៏បានវាយប្រហារលើប្រទេសហ្វីលីពីន ថៃ និងឡាវយ៉ាងដំណំផងដែរ ខណៈបច្ចុប្បន្នស្ថាប័នជំនាញរបស់ប្រទេសទាំងនេះកំពុងស្រង់ស្ថិតិអ្នករងផលប៉ះពាល់ និងវាយតម្លៃពីទំហំនៃផលប៉ះពាល់៕
ដោយៈ សរ សុជាតិ
