អ្នកជំនាញរំពឹងថា តាមរយៈព្រឹត្តិការណ៍ជាប្រវត្តិសាស្ត្រនេះ វានឹងរួមចំណែកជួយជំរុញការកំណើនអភិវឌ្ឍក្នុងវិស័យអចលនទ្រព្យ និងសេដ្ឋកិច្ចកម្ពុជាឲ្យកាន់តែមានភាពរស់រវើក និងល្អប្រសើរបន្ថែមទៀត។
អ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាលនៃក្រុមហ៊ុនវើលដ៍ប៊្រីដគ្រុប បានបង្ហាញសុទិដ្ឋិនិយមខ្ពស់ចំពោះការធ្វើជាម្ចាស់ផ្ទះព្រឹត្តិការណ៍ប្រកួតកីឡាស៊ីហ្គេមក្នុងការរួមចំណែកជួយអភិវឌ្ឍ និងជំរុញកំណើនសេដ្ឋកិច្ចកម្ពុជា។ ជាការកត់សម្គាល់របស់ អ្នកឧកញ៉ា មានតែព្រឹត្តិការណ៍កីឡា និងវប្បធម៌ប៉ុណ្ណោះ ដែលមានឥទ្ធិពលខ្លាំងក្នុងការជួយផ្សព្វផ្សាយ និងទាក់ទាញការវិនិយោគ ព្រោះរាល់ការរៀបចំព្រឹត្តិការណ៍លំដាប់អន្តរជាតិម្តងៗ វាតែងតែពាំនាំថ្នាក់ដឹកនាំគណៈប្រតិភូ និងអ្នកវិនិយោគមកជាមួយមន្ត្រី គ្រូបង្វឹក និងអត្តពលិក ដែលត្រូវចូលរួមប្រកួតក្នុងព្រឹត្តិការណ៍កីឡានោះ។
សម្រាប់អ្នកឧកញ៉ា សៀ ឬទ្ធី ការធ្វើជាម្ចាស់ផ្ទះការប្រកួតកីឡាស៊ីហ្គេមមិនត្រឹមតែបង្ហាញពីមុខមាត់របស់កម្ពុជានៅលើឆាកអន្តរជាតិប៉ុណ្ណោះ ថែមទាំងរួមចំណែកជួយទាក់ទាញភ្ញៀវទេសចរបរទេស និងអ្នកវិនិយោគឲ្យមកកម្សាន្ត និងសម្លឹងឱកាសវិនិយោគនៅកម្ពុជា។
ជាមួយគ្នានេះលោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាយល់ឃើញថា រាល់ការរៀបចំមិនថាព្រឹត្តិការណ៍កីឡា ឬបុណ្យប្រពៃណីជាតិវាតែងតែជួយទាក់ទាញភ្ញៀវទេសចរ និងអន្តរជាតិឲ្យមកចូលរួមដើរលេងកម្សាន្ត ដែលវាជាផ្នែកមួយជួយអាជីវកម្មក្នុងវិស័យទេសចរណ៍ដូចជាភោជនីយដ្ឋាន ផ្ទះសំណាក់និងសណ្ឋាគារជាដើម។ នៅពេលអាជីវកម្មទាំងនេះមានសកម្មភាព និងដំណើរការល្អប្រសើរ វានឹងជះផលប្រយោជន៍បន្តដល់វិស័យអចលនទ្រព្យ និងវិស័យសំណង់លំនៅឋាន អគារពាណិជ្ជកម្មបម្រើឲ្យការលក់រាយ និងអគារសហកម្មសិទ្ធិជាដើម។
អត្ថបទគួរអាន
ពាក់ព័ន្ធស្ថានភាពវិស័យអចលន្រព្យនាពេលបច្ចុប្បន្ន លោកឧកញ៉ា ចេង ខេង ប្រធានក្រុមប្រឹក្សាភិបាល និងជាអគ្គនាយកក្រុមហ៊ុនវាយតម្លៃអចលនទ្រព្យ CPL បានគូសបញ្ជាក់ថា នៅដើមឆ្នាំ២០២៣ នេះ ចរន្តទិញលក់អលចនទ្រព្យហាក់មានសកម្មភាពកម្រើកឡើងវិញលើផ្នែកមួយចំនួន។ អ្នកជំនាញរូបនេះកត់សម្គាល់ឃើញថា អលនទ្រព្យដែលមានតម្លៃសមរម្យនៅតែមានស្ថានភាពទិញលក់ល្អប្រសើរ ប៉ុន្តែចរន្តទិញលក់អលចនទ្រព្យមានតម្លៃថ្លៃហាក់មានស្ថានភាពទ្រឹង។
ពាក់ព័ន្ធស្ថានភាពវិស័យអចលន្រព្យនាពេលបច្ចុប្បន្ន លោកស្រី អាន សុធីតា នាយិកាគ្រប់គ្រងក្រុមហ៊ុនអចលនទ្រព្យ PropNex កត់សម្គាល់ឃើញថា ចរន្តទិញលក់ក្នុងវិស័យអចលន្រព្យនៅប៉ុន្មានខែកន្លងមកនេះមិនទាន់បានបង្ហាញសញ្ញាវិជ្ជមានគួរឲ្យកត់សម្គាល់នោះទេ ពោលគឺនៅតែបន្តស្ថិតក្នុងស្ថានភាពលំបាកដដែល។ បញ្ហានេះត្រូវបានអ្នកជំនាញរូបនេះវាយតម្លៃថា អាចបណ្តាលមកពីភាពមិនច្បាស់លាស់នៃសេដ្ឋកិច្ចសកល ដែលគំរាមកំហែងដោយសារសង្គ្រាមរវាងរុស្ស៊ី និងអ៊ុយក្រែន និងជម្លោះពាណិជ្ជកមរវាងប្រទេសមានសេដ្ឋកិច្ចធំៗជាដើម។
គួរបញ្ជាក់ថា រាជរដ្ឋាភិបាលកម្ពុជាបានត្រៀមកញ្ចប់ថវិកាជិត១២០លានដុល្លារ ដើម្បីចំណាយលើការរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេមដែលកម្ពុជាធ្វើម្ចាស់ផ្ទះចាប់ពីថ្ងៃទី៥-១៧ ខែឧសភា ឆ្នាំ២០២៣។ អ្វីដែលពិភពលោកកំពុងចោលក្រសែភ្នែកមកលើប្រទេសកម្ពុជា គឺការមិនយកថ្លៃហូបចុក និងស្នាក់នៅរបស់ប្រតិភូកីឡាអន្តរជាតិ ដែលធ្វើឲ្យកម្ពុជាក្លាយជាប្រទេសដំបូងគេក្នុងរយៈពេលជាង៦៤ឆ្នាំនៃការរៀបចំព្រឹត្តិការណ៍ប្រចាំតំបន់មួយនេះ។ បើតាមការគូសបញ្ជាក់របស់ប្រមុខដឹកនាំរាជរដ្ឋាភិបាលកម្ពុជា គោលបំណងនៃការធ្វើបែបនេះ គឺដើម្បីឲ្យពិភពលោកស្គាល់កម្ពុជាកាន់តែច្បាស់បន្ថែមទៀត។
តាមរយៈព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេមនេះដែរ ថ្នាក់ដឹកនាំក្រសួងទេសចរណ៍រំពឹងថា កម្ពុជានឹងអាចស្រូបទាញភ្ញៀវទេសចរបរទេសប្រមាណ៥០ម៉ឺននាក់ឲ្យមកកម្សាន្តនៅកម្ពុជា និងរំពឹងទទួលបានភ្ញៀវទេសចរបរទេសលើស៤លាននាក់នៅពេលមួយឆ្នាំ២០២៣៕
