តាមការរាយការណ៍ដោយភ្នាក់ងារព័ត៌មានវៀតណាមបានឲ្យដឹងថា ផែនការខ្ចីថវិកាបន្ថែមរបស់រដ្ឋាភិបាលវៀតណាមនេះ មានគោលបំណងធានាឲ្យបាននូវតុល្យភាពសម្រាប់កញ្ចប់ថវិការដ្ឋ និងជំរុញការអភិវឌ្ឍសេដ្ឋកិច្ចសង្គម ក្នុងកម្រិតសមស្របនៃហានិភ័យចំណាយ។ ក្នុងចំណោមថវិកាសរុប គឺមានភាគច្រើនបំផុតត្រូវខ្ចីសម្រាប់បំពេញក្នុងកញ្ចប់ថវិការដ្ឋ ខណៈដែលខ្លះទៀត គឺសម្រាប់ការរៀបចំហិរញ្ញប្បទានឡើងវិញ។ ផែនការខ្ចីប្រាក់នេះ ក៏មានគោលបំណង ដើម្បីគ្រប់គ្រងយ៉ាងហ្មត់ចត់នូវសូចនាករបំណុលរបស់រដ្ឋាភិបាល ដើម្បីធានាថា កញ្ចប់ថវិកាមានសុវត្ថិភាព និង អាចពន្លឿនដល់ការអភិវឌ្ឍទីផ្សារមូលធនក្នុងស្រុក។
ក្រសួងហិរញ្ញវត្ថុ បានស្នើដល់រដ្ឋាភិបាលឲ្យមានភាពសកម្មនៅក្នុងការបោះផ្សាយបណ្ណបំណុល ការរៀបចំឡើងវិញនូវផលបត្របំណុល និងការអភិវឌ្ឍទីផ្សារមូលបត្របំណុលរដ្ឋាភិបាល។ បន្ថែមពីនេះ ក្រសួងក៏ត្រូវរៀបចំធនធាន សម្រាប់ការទូទាត់សងបំណុល ដើម្បីកុំឲ្យមានការសងយឺតវ៉ាវ ដែលអាចប៉ះពាល់ដល់ការប្តេជ្ញាចិត្តរបស់រដ្ឋាភិបាលផងដែរ។
អត្ថបទទាក់ទង!
ក្នុងឆ្នាំ២០២១ រដ្ឋាភិបាលវៀតណាមគ្រោងនឹងខ្ចីថវិកាជាង ២៧ពាន់លានដុល្លារ ដោយក្នុងនោះ មានដល់ទៅ៨៤% គឺខ្ចីនៅក្នុងស្រុក និងសល់ប៉ុន្មានគឺនឹងខ្ចីពីបរទេស។ យ៉ាងណាមិញ នៅឆ្នាំនេះ រដ្ឋាភិបាលវៀតណាមក៏ត្រូវសងបំណុលជាង ១៧ពាន់លានដុល្លារផងដែរ ហើយបើធៀបនឹងទំហំ GDP របស់វៀតណាមនៅឆ្នាំ២០២០ បំណុលដែលរដ្ឋាភិបាលត្រូវសងនៅឆ្នាំនេះ គឺមានប្រហែល៦%នៃ GDP ខណៈដែលកាលពីឆ្នាំ២០២០ សេដ្ឋកិច្ចវៀតណាមនៅតែរក្សាបានកំណើនក្នុងរង្វង់៣% ទោះបីកូវីដ-១៩រាតត្បាតក៏ដោយ។
សូមបញ្ជាក់ថា អនុបាតបំណុលសាធារណៈធៀបនឹង GDP របស់វៀតណាម ត្រូវបានកាត់បន្ថយពីជិត៦៤% ក្នុងឆ្នាំ២០១៦ មកនៅត្រឹមតែជាង ៥៥%ប៉ុណ្ណោះ នៅក្នុងឆ្នាំ២០២០ ខណៈដែលរដ្ឋសភាជាតិវៀតណាម បានកំណត់ពិដានអត្រាបំណុលនេះ មិនឲ្យលើស៦៥%នៃ GDP នោះឡើយ។ ក្នុងន័យនេះ បានបង្ហាញឲ្យឃើញថា សម្ពាធបំណុលសាធារណៈវៀតណាម ត្រូវបានថយចុះគួរឲ្យកត់សម្គាល់ក្នុងរយៈពេល៥ឆ្នាំចុងក្រោយនេះ។
សូមបញ្ជាក់ថា នៅប៉ុន្មាឆ្នាំចុងក្រោយនេះ វៀតណាមមានការខ្ចីបំណុល ភាគច្រើនតែជាបំណុលក្នុងស្រុកប៉ុណ្ណោះ ពិសេសតាមរយៈការលក់បណ្ណបំណុលរបស់រដ្ឋាភិបាល។ ក្រៅពីនេះ បើក្រឡេកទៅមើលឆ្នាំ២០២០ វៀតណាមមិនបានខ្ចីបំណុលថ្មីៗពីខាងស្ថាប័នហិរញ្ញវត្ថុអន្តរជាតិដូចជាធនាគារពិភពលោក និងធនាគារអភិវឌ្ឍន៍អាស៊ីនោះទេ៕
None
