តួយ៉ាង វៀតណាមថ្មីៗនេះ បានចេញមុខទទូចស្នើទៅកាន់ចិនម្ដងទៀត ឲ្យបើកការនាំចូលផលិតផលកសិកម្មពីវៀតណាមតាមច្រកព្រំដែនក្នុងខេត្តយូណានប្រទេសចិនឡើងវិញ ក្រោយពីច្រកព្រំដែននេះ ត្រូវបានផ្អាកការនាំចូលផលិតផលពីវៀតណាមអស់រយៈពេល១ខែហើយ ដោយសារតែបារម្ភពីការឆ្លងរីករាលដាលកូវីដ-១៩។ បើតាមការចុះផ្សាយពីសារព័ត៌មាន VN Express។
Story: បើតាមការចុះផ្សាយពីសារព័ត៌មាន VN Express ក្រសួងឧស្សាហកម្ម និងពាណិជ្ជកម្មវៀតណាមនាពេលថ្មីៗនេះ បានប្រាប់ទៅកាន់ក្រសួងពាណិជ្ជកម្មរបស់ចិន និងអាជ្ញាធរខេត្តយ៉ូណានថា មកទល់ពេលនេះ មិនមានករណីឆ្លងកូវីដ-១៩ត្រូវបានរកឃើញនៅតាមតំបន់ព្រំដែនរវាងវៀតណាមនិងចិននៅច្រកខេត្តយូណាននោះទេ ហើយបច្ចុប្បន្នមានរថយន្ដដឹកទំនិញធំៗរបស់ចិនប្រមាណ៤០០គ្រឿងបានបើកចូលក្នុងប្រទេសវៀតណាមក្នុងមួយថ្ងៃៗ។
ប៉ុន្ដែ ចាប់តាំងពីខែកក្កដាមក ខេត្តយូណានប្រទេសចិន បានបញ្ឈប់ការនាំចូលផលិតផលកសិកម្មពីវៀតណាម ពិសេសផ្លែស្រកានាគតែម្ដង ដោយសារតែបារម្ភពីការឆ្លងរីករាលដាលនៃមេរោគកូវីដ-១៩។
រដ្ឋមន្ត្រីក្រសួងពាណិជ្ជកម្មវៀតណាម បានស្នើទៅខាងភាគីចិនឲ្យបើកដំណើរការនាំចូលផលិតផលកសិកម្មពីវៀតណាមឡើងវិញ ជាមួយនឹងវិធានការសុវត្ថិភាពដែលបានដាក់ចេញនិងបានអនុវត្តមកអស់រយៈពេល១ឆ្នាំមកហើយនោះ។
អត្ថបទគួរអាន
ក្រុមហ៊ុនវៀតណាមជាច្រើននៅខែសីហានេះ បានត្អូញត្អែរថា ការផ្អាកការនាំចូលផ្លែស្រកានាគពីវៀតណាម និងការដាក់វិធានការសុវត្ថិភាពតឹងរ៉ឹងពីសំណាក់ភាគីចិនបានធ្វើឲ្យមានផលលំបាកកាន់តែច្រើនសម្រាប់អាជីវកម្មរបស់ពួកគេ។
ក្រសួងពាណិជ្ជកម្មវៀតណាម បានផ្ដល់យោបល់ឲ្យក្រុមហ៊ុនទាំងនោះ ប្រើប្រាស់កូតានាំចេញផ្លូវការ មានន័យថាបង្កើតកិច្ចសន្យាជាមួយនឹងអ្នកបញ្ជាទិញចិន មុននឹងដឹកទំនិញទៅកាន់ព្រំដែន និងត្រូវប្រាកដថាសកម្មភាពពាណិជ្ជកម្មគឺអាចធ្វើទៅបានរលូន។
សូមបញ្ជាក់ថា ចិនគឺជាទីផ្សារនាំចេញធំបំផុតទី២របស់វៀតណាម ដោយនៅក្នុងរយៈពេល៧ខែមកនេះ វៀតណាមបាននាំចេញទំនិញទៅចិនជិត៣០ពាន់លានដុល្លារកើន២៤% ធៀបនឹងរយៈពេលដូចគ្នាកាលពីឆ្នាំមុន។ នេះបើតាមតួលេខពីការិយាល័យស្ថិតិទូទៅរបស់វៀតណាម៕
None
