នាយកប្រតិបត្តិនៅក្រុមហ៊ុនធំៗរបស់សហរដ្ឋអាមេរិក និងវៀតណាមក្នុងវិស័យបន្ទះឈីប និងបច្ចេកវិទ្យា ក៏ដូចជាអាកាសចរណ៍បានជួបប្រជុំគ្នាកាលពីថ្ងៃចន្ទ ដើម្បីស្វែងរកភាពជាដៃគូអាជីវកម្មក្នុងអំឡុងពេលដំណើរទស្សនកិច្ចរបស់ប្រធានាធិបតីសហរដ្ឋអាមេរិកលោក ចូ បៃដិន មកកាន់ទីក្រុងហាណូយ ហើយគម្រោងដែលទទួលបានផ្លែផ្កាគឺកិច្ចព្រមព្រៀងថ្មីលើការទិញយន្តហោះ និងបញ្ញាសិប្បនិម្មិត។
បើយោងតាមសេចក្តីរាយការណ៍របស់សារព័ត៌មាន Reuter កិច្ចព្រមព្រៀងដែលបង្ហាញច្បាស់ដោយសេតវិមានក្នុងអំឡុងពេលលោក បៃដិន នៅហាណូយគឺការទិញយន្តហោះ Boeing 737 Max ចំនួន៥០គ្រឿងរបស់ក្រុមហ៊ុនអាកាសចរណ៍វៀតណាម នៅក្នុងកិច្ចព្រមព្រៀងមួយដែលខ្លួនបាននិយាយថាមានតម្លៃជាង៧ពាន់៨រយលានដុល្លារ ហើយចំពោះគម្រោង AI ទាំងមន្រ្តីវៀតណាម និងអាមេរិកមិនបានបញ្ចេញទឹកប្រាក់នោះទេ ដោយគេគ្រាន់តែឲ្យដឹងថា ក្រុមហ៊ុន Microsoft នឹងធ្វើការជាមួយនឹងដៃគូនៅវៀតណាមលើមូលដ្ឋានបច្ចេកវិទ្យា AI ដែលកំពុងមានតម្រូវសម្រាប់ប្រទេសវៀតណាម និងទីផ្សារដែលកំពុងរីកចម្រើននានា។
អត្ថបទគួរអាន
ប្រភពដដែលបានបន្តទៀតថា ក្រៅពីនេះ ក្រុមហ៊ុន Nvidia ក៏នឹងចាប់ដៃគូជាមួយក្រុមហ៊ុនវៀតណាមមួយចំនួនដូចជា FPT, Viettel និង Vingroup ដែលជាក្រុមហ៊ុនមេរបស់ VinFast លើគម្រោង AI នៅក្នុងប្រទេសវៀតណាមផងដែរ។
បន្ថែមលើនេះសេតវិមាន ក៏បានគូសបញ្ជាក់ពីចំនួន នៃការវិនិយោគទាក់ទងនឹងបន្ទះឈីបដោយក្រុមហ៊ុនអាមេរិកក្នុងប្រទេសវៀតណាម រួមទាំងផែនការរបស់ Marvell និង Synopsys នៅក្នុងការសាងសង់មជ្ឈមណ្ឌលរចនាបន្ទះឈីបនៅក្នុងប្រទេសកុម្មុយនីស្តមួយនេះ។
ដោយឡែករោងចក្រ Amkor ថ្មីតម្លៃ១ពាន់៦រយលានដុល្លារ នៅជិតទីក្រុងហាណូយ ដែលនឹងប្រមូលផ្តុំការវេចខ្ចប់ និងសាកល្បងផលិតបន្ទះឈីប នឹងត្រូវចាប់ផ្តើមប្រតិបត្តិការក្នុងខែតុលា ហើយក្រៅពីនោះ គម្រោងវិនិយោគរោងចក្រដំឡើងបន្ទះឈីបទំហំ១ពាន់៥រយលានដុល្លាររបស់ក្រុមហ៊ុន Intel នៅភាគខាងត្បូងនៃប្រទេស ក៏អាចនឹងត្រូវបានពង្រីកផងដែរ។ ក្រុមហ៊ុន Honeywell របស់អាមេរិក ក៏នឹងសហការជាមួយដៃគូវៀតណាម ដើម្បីចាប់ផ្តើមគម្រោងសាកល្បងមួយដើម្បីអភិវឌ្ឍប្រព័ន្ធផ្ទុកថាមពលថ្មដំបូងបំផុតនៅប្រទេសវៀតណាម។ នេះបើតាមការគូសបញ្ជាក់របស់សេតវិមានអាមេរិក៕
