ព្រឹទ្ធសភាអាមេរិកអនុម័តពង្រីកថវិកាចំណាយ ៨០០ពាន់លានដុល្លារ សម្រាប់វិស័យយោធានៅឆ្នាំក្រោយ
ព្រឹទ្ធសភាសហរដ្ឋអាមេរិកកាលពីថ្ងៃព្រហស្បតិ៍ ទី១៥ ធ្នូ បានអនុម័តចេញច្បាប់ ដែលអនុញ្ញាតឱ្យមានការចំណាយដ៏មហាសាលក្នុងទំហំទឹកប្រាក់ប្រមាណ ៨៥៨ ពាន…
ក្រុមហ៊ុន ហ្គីលីម៉ិក ដែលផលិតផលិតផលវាយនភណ្ឌ និងផលិតផលផ្សេងទៀតមានមូលដ្ឋាននៅទីក្រុងហូជីមិញ បានរៀបរាប់នៅក្នុងពាក្យបណ្ដឹងរបស់ខ្លួនដែលបានដាក់ទៅតុលាការរដ្ឋញូវយ៉កកាលពីថ្ងៃទី ១២ខែធ្នូថា ក្រុមហ៊ុននេះបានចាប់ដៃគូជាមួយក្រុមហ៊ុនអាម៉ាហ្សូនតាំងពីឆ្នាំ២០១៤ដល់ឆ្នាំ២០២២ និងបានវិនិយោគរាប់សិបលានដុល្លារនៅក្នុងរោងចក្រផលិតមួយចំនួន ដើម្បីបង្កើតឃ្លាំងស្តុកដែក និងក្រណាត់សម្រាប់រៀបចំសារពើភ័ណ្ឌនៅក្នុងឃ្លាំងរបស់ក្រុមហ៊ុនអាម៉ាហ្សូន។ នេះបើយោងតាមរបាយការណ៍របស់ព័ត៌មាន Bloomberg។
ក្រុមហ៊ុន ហ្គីលីម៉ិក បាននិយាយថា ភាពជាដៃគូត្រូវបានបង្កើតឡើងដោយមាន«ទំនុកចិត្តគ្នា» ដោយក្រុមហ៊ុន ហ្គីលីម៉ិក បានពឹងផ្អែកលើភាពត្រឹមត្រូវនៃការព្យាកររបស់ក្រុមហ៊ុនអាម៉ាហ្សូនដើម្បីធ្វើការវិនិយោគឱ្យបានគ្រប់គ្រាន់តាមតម្រូវការរួមទាំងការទិញសម្ភារៈ និងការរៀបចំសមត្ថភាព និងកម្លាំងពលកម្មរោងចក្រ ដើម្បីបំពេញតម្រូវការរបស់ក្រុមហ៊ុនអាមេរិកមួយនេះ។
ក៏ប៉ុន្តែចាប់តាំងពីដើមខែមេសាមក ក្រុមហ៊ុនអាម៉ាហ្សូនបានផ្លាស់ប្តូរ និងកាត់បន្ថយភ្លាមៗនូវតម្រូវការដែលបានគ្រោងទុកសម្រាប់ពេលនៅសល់ចុងក្រោយនៃឆ្នាំ២០២២ និងឆ្នាំ២០២៣ បានកាត់បន្ថយមកនៅការការបញ្ជាទិញតិចតូច ខុសពីអ្វីដែលជាការព្យាករកាលពីពេលមុន។ នេះបើយោងតាមពាក្យបណ្តឹង។
មែនទែនទៅ ក្រុមហ៊ុន អាម៉ាហ្សូន រីករាយនឹងការកើនឡើងចំណូលមិនធ្លាប់មានពីមុនមកក្នុងអំឡុងពេលជំងឺកូវីដ១៩ ដោយសារតែមានការផ្ទុះការបញ្ជាទិញតាមអ៊ីនធឺណិតយ៉ាងច្រើនពីអ្នកប្រើប្រាស់ ហើយថ្នាក់គ្រប់គ្រង និងកម្មកររបស់ក្រុមហ៊ុន ហ្គីលីម៉ិក បានប្រថុយវិនិយោគដ៏ច្រើនសម្បើមដើម្បីបំពេញតម្រូវការរបស់ឱ្យបានទាន់ពេលវេលា។ ប៉ុន្ដែ ដោយសារតែស្ថានការសេដ្ឋកិច្ចពិភពលោកថមថយចុះ អាមេរិកក៏កំពុងប្រឈមនឹងបញ្ហាអតិផរណា ការប្រាក់កើនខ្ពស់ផងនោះ បានធ្វើឲ្យតម្រូវការប្រើប្រាស់មានការធ្លាក់ចុះគួរឲ្យកត់សម្គាល់។
ក្រុមហ៊ុនវៀតណាមនេះបាននិយាយថា ពួកគេបានជួលបុគ្គលិក ៧ ពាន់នាក់ឱ្យធ្វើការងារនៅតាមរោងចក្រជាច្រើនដើម្បីខំប្រឹងផលិតឃ្លាំងស្តុកទំនិញឱ្យបានជាង ១ លានកន្លែងក្នុងមួយឆ្នាំ ហើយបានបន្ថែមថា ផលិតកម្មសម្រាប់ក្រុមហ៊ុន អាម៉ាហ្សូន បានកើនឡើង ២០ ដងក្នុងអំឡុងពេលមានទំនាក់ទំនងគ្នាបាន ៨ ឆ្នាំមកនេះ។
សូមបញ្ជាក់ថា ក្រុមហ៊ុន ហ្គីលីម៉ិក ត្រូវបានបង្កើតឡើងក្នុងឆ្នាំ១៩៨២ ហើយផលិតផលសំខាន់ៗរបស់ក្រុមហ៊ុននេះរួមមាន កំណាត់សំពត សម្ភារៈគេហដ្ឋាន កន្ត្រកដាក់ខោអាវ កាបូប និងផលិតផលផ្សេងៗទៀត។
បើតាមក្រុមស្រាវជ្រាវ Mirae Asset Vietnam Research បានឱ្យដឹងថា ប្រាក់ចំណូលប្រហែល ៨៥% ពីការនាំចេញរបស់ក្រុមហ៊ុន ហ្គីលីម៉ិក គឺបានមកពីក្រុមហ៊ុនអាម៉ាហ្សូន ដែលបានបញ្ជាទិញផលិតផលមានតម្លៃជាង ១៤៦ លានដុល្លារពីក្រុមហ៊ុន ហ្គីលីម៉ិក កាលពីឆ្នាំមុន។
ក្រុមហ៊ុន ហ្គីលីម៉ិក ទទួលបានចំណូលយ៉ាងច្រើនបំផុត ១៧០ លានដុល្លារកាលពីឆ្នាំមុន គឺបានកើនឡើងជិត ១៦% បើធៀបនឹងឆ្នាំ២០២០៕
អត្ថបទ៖ សុខ ជា
