សារព័ត៌មាន VN Express បានស្រង់សម្ដីរបស់លោក Vu Dinh Thiem អគ្គនាយកមជ្ឈមណ្ឌលគ្លីនិកពិសោធន៍ នៃវិទ្យាស្ថានជាតិអនាម័យ និង រោគរាតត្បាតវៀតណាម បានឲ្យដឹងថា ការពិសោធន៍សាកល្បងនូវដំណាក់កាលទី៣ សម្រាប់វ៉ាក់សាំងកូវីដ១៩ ឈ្មោះ Covivac របស់វៀតណាម ត្រូវការអ្នកស្មគ្រចិត្តមកទទួលការចាក់វ៉ាក់សាំងនេះ ប្រហែល៤ពាន់នាក់។ ក៏ប៉ុន្ដ ការស្វែងរកអ្នកស្មគ្រចិត្តសាកល្បងចាក់វ៉ាក់សាំងនេះ គឺពិតជាលំបាកខ្លាំងណាស់ ហើយនៅតាមតំបន់នានា ក៏មិនសូវមានមនុស្សច្រើនដល់រាប់ពាន់នាក់ ដែលមិនទាន់បានចាក់វ៉ាក់សាំង និងមានលក្ខណៈសម្បត្តិត្រូវទៅនឹងការពិសោធន៍នេះដែរ។ ដូច្នេះហើយ ការចាក់វ៉ាក់សាំងសាកល្បងនេះ គឺត្រូវមានការពន្យារពេល ហើយក្រុមអ្នកផលិតវ៉ាក់សាំងរបស់វៀតណាម ក៏កំពុងរកមើលនូវជម្រើសផ្សេងទៀត ដើម្បីធ្វើការពិសោធន៍លើប្រសិទ្ធភាពវ៉ាក់សាំងកូវីដ១៩ ដែលខ្លួនកំពុងផលិតនេះ។
បើតាមអ្នកជំនាញផ្នែកផលិតវ៉ាក់សាំងរបស់វៀតណាម បានគូសបញ្ជាក់ថា ឥឡូវនេះ ពួកគេកំពុងតែពិចារណា លើការសាវជ្រាវសម្រាប់ការប្រើប្រាស់វ៉ាក់សាំងដែលកំពុងផលិតនេះ សម្រាប់ចាក់ជាដូសជំរុញឲ្យពលរដ្ឋរបស់ខ្លួននៅពេលខាងមុខ។ យ៉ាងណាមិញ តំណាងវិទ្យាស្ថានវ៉ាក់សាំង និងជីវសាស្ត្រវេជ្ជសាស្ត្រ ដែលផលិតវ៉ាក់សាំង Covivac បានឲ្យដឹងថា គេមិនមានពេលវេលាគ្រប់គ្រាន់ ដើម្បីបន្ដការសាកល្បងវ៉ាក់សាំងនេះ ក្នុងដំណាក់កាលទី៣ទៀតនោះទេ។
អត្ថបទគួរអាន
ក្រៅតែពី ការផលិតវ៉ាក់សាំងវ៉ាក់កូវីដ១៩ Covivac វៀតណាមក៏កំពុងមានវ៉ាក់សាំងកូវីដ១៩ ប្រភេទផ្សេងៗទៀតផងដែរ ដូចជា វ៉ាក់សាំងកូវីដ១៩ ផលិតដោយក្រុមហ៊ុន Vingroup ដែលទទួលបានបច្ចេកវិទ្យាផលិតពីក្រុមហ៊ុនអាមេរិក និងវ៉ាក់សាំងកូវីដ១៩ មួយប្រភេទទៀត ផលិតដោយក្រុមហ៊ុនជប៉ុន ស៊ីអនណូជី (Shionogi) ហើយវ៉ាក់សាំងទាំងពីរប្រភេទនេះ កំពុងស្ថិតក្នុងដំណាក់កាលសាកល្បងដូចគ្នា។ ទន្ទឹមនឹងនោះ វៀតណាម ក៏ទទួលបានការផលិតវ៉ាក់សាំង Sputnik V របស់រុស្ស៊ី នៅក្នុងប្រទេសខ្លួនផងដែរ ហើយបច្ចុប្បន្នកំពុងស្ថិតក្នុងដំណើរការផលិតកម្មនៅឡើយ មិនទាន់ដល់ដំណាក់កាលពិសោធន៍សាកល្បងនោះទេ។
សូមបញ្ជាក់ថា គិតមកទល់ពេលនេះ វៀតណាម មានពលរដ្ឋប្រមាណ ៧១លាននាក់ហើយ ដែលទទួលបានការចាក់វ៉ាក់សាំងកូវីដ១៩យ៉ាងហោចណាស់១ដូស និងមានប្រមាណជាង៥០លាននាក់ បានចាក់វ៉ាក់សាំងគ្រប់ចំនួន២ដូស ខណៈដែលប្រទេសនេះ មានប្រជាជនសរុបប្រមាណ ៩៦លាននាក់។ យ៉ាងណាក៏ដោយចុះ បើមើលទៅលើតួលេខឆ្លងកូវីដ១៩វិញ វៀតណាមនៅតែមានតួលេខឆ្លងប្រចាំថ្ងៃខ្ពស់ ដោយមានប្រមាណ ជាង១ម៉ឺននាក់ក្នុងមួយថ្ងៃ ដែលនាំឲ្យចំនួនអ្នកឆ្លងសរុបកើនដល់ជាង ២លាន២សែននាក់ និងអ្នកស្លាប់សរុបមានជាង ២ម៉ឺន៥ពាន់នាក់៕
None
