មិត្តហ្វូន និង Viettel Group ទទួលបានគ្រឿងឥស្សរិយយសមុនីសារាភ័ណ្ឌចំនួន៤ ក្នុងឱកាសគម្រប់ខួប១៥ឆ្នាំ

ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានអញ្ជើញចូលរួមជាអធិបតីក្នុងពិធីនេះ។​ព្រមទាំងមានការអញ្ជើញចូលរួមពីតំណាងរដ្ឋាភិបាល និងក្រសួងនានាផងដែរ។ ក្រៅពីនេះក៏មានវត្តមានឯកអគ្គរដ្ឋទូតវៀតណាមប្រចាំកម្ពុជា លោក Nguyen Huy Tang ប្រធាន និងនាយកប្រតិបត្តិក្រុមហ៊ុន Viettel Group លោក Tao Duc Thang និងឥស្សរជនជាច្រើនរូបផ្សេងទៀត។

ក្រោមគំនិត និងប្រធានបទ "The Met's Sonata" ការប្រារព្ធកម្មវិធីនេះធ្វើឡើងក្នុងគោលបំណងបង្ហាញសារដែលមិត្តហ្វូនមាន និងនូវតែបន្ត ដើម្បីបង្កើតការរួមចំណែកដ៏មានតម្លៃដល់ប្រជាជន និងប្រទេសជាតិកម្ពុជា ដោយការលះបង់ចេញពីបេះដូង។ ចាប់តាំងពីការបង្កើតឡើងនៅថ្ងៃទី ១៩ ខែកុម្ភៈ ឆ្នាំ ២០០៩ មិត្តហ្វូនបានបន្តយុទ្ធសាស្រ្ត "ហេដ្ឋារចនាសម្ព័ន្ធដំបូង អាជីវកម្មតាមក្រោយ" នាំយកសេវាទូរគមនាគមន៍ទៅកាន់តំបន់ឆ្ងាយបំផុត និងដាច់ស្រយាលបំផុតនៅក្នុងប្រទេសកម្ពុជា។ ការប្រារព្ធពិធីនេះបានបង្ហាញពីដំណើរការរបស់មិត្តហ្វូនដែលបានរួមចំណែកកសាងសេវាទូរគមនាគមន៍របស់ខ្លួននៅទូទាំងប្រទេសកម្ពុជា ដោយផ្តល់សេវាទូរស័ព្ទដល់ទៅ ៩៨% នៃចំនួនប្រជាជន។

ថ្លែងក្នុងពិធីរំលឹកខួបនេះ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិកម្ពុជា បានវាយតម្លៃខ្ពស់ចំពោះការរួមចំណែករបស់ Viettel Group ចំពោះប្រទេសកម្ពុជា និងបង្ហាញពីបំណងចង់បន្តអភិវឌ្ឍទំនាក់ទំនងល្អរវាងរដ្ឋាភិបាលកម្ពុជា និង Viettel Group ផងដែរ។ លោកបានថ្លែងថា៖ «ខ្ញុំសូមថ្លែងអំណរគុណយ៉ាងស្មោះស្ម័គ្រចំពោះថ្នាក់ដឹកនាំនៃក្រុមហ៊ុន Viettel Group ដែលបានដឹកនាំក្រុមហ៊ុនមិត្តហ្វូន បាននាំមកនូវអត្ថប្រយោជន៍ជាច្រើន រួមចំណែកដល់ការអភិវឌ្ឍន៍សេដ្ឋកិច្ច និងសង្គមរបស់ប្រទេសយើង។ មិត្តហ្វូន បាននាំយកសេវាទូរគមនាគមន៍ បច្ចេកវិទ្យាព័ត៌មានទៅកាន់គ្រប់ទីកន្លែង និងបានជួយ លើកកម្ពស់ជីវភាពរស់នៅរបស់ប្រជាជនកម្ពុជា។ នាថ្ងៃអនាគត ខ្ញុំសង្ឃឹមថាទំនាក់ទំនងកិច្ចសហប្រតិបត្តិការរវាងរដ្ឋាភិបាលកម្ពុជា និងសមាជិកនៃក្រុមហ៊ុន Viettel Group នឹងបន្តអភិវឌ្ឍយ៉ាងខ្លាំងក្លា និងស៊ីជម្រៅ ដោយនាំមកនូវផលប្រយោជន៍កាន់តែច្រើនដល់ភាគីទាំងពីរ និងរួមចំណែកដល់ការអភិវឌ្ឍន៍ប្រកបដោយចីរភាពរបស់កម្ពុជា»។

ឆ្លៀតក្នុងឱកាសនេះ ព្រះមហាក្សត្រនៃព្រះរាជាណាចក្រកម្ពុជា បានប្រោសព្រះរាជទានព្រះរាជគ្រឿងឥស្សរិយយសមុនីសារាភ័ណ្ឌ មហាសេរីវឌ្ឍន៍ ដល់បុគ្គល និងសមូហភាពដល់ក្រុមហ៊ុន Viettel Group និងមិត្តហ្វូន ជាការទទួលស្គាល់អំពីការរួមចំណែករបស់ពួកគេក្នុងរយៈពេល១៥ឆ្នាំកន្លងមក។ បុគ្គល​និង​សមូហភាព​ទាំង​៤​រូប​ដែល​មាន​កិត្តិយស​ទទួល​បាន​មេដាយ​រួម​មាន​៖

១. ក្រុមហ៊ុន វៀតធេល កម្ពុជា

២. លោក Tao Duc Thang ប្រធាន និងជានាយកប្រតិបត្តិក្រុមហ៊ុន Viettel Group

៣. លោក Phung Van Cuong នាយកប្រតិបត្តិក្រុមហ៊ុន Viettel Global

៤. លោក Cao Manh Duc នាយកប្រតិបត្តិក្រុមហ៊ុន មិត្តហ្វូន

ក្នុងនាមក្រុមហ៊ុន Viettel Group និងមិត្តហ្វូន លោក Tao Duc Thang បានសម្តែងនូវបំណងចង់បន្តរួមដំណើរជាមួយរដ្ឋាភិបាល និងប្រជាជន ដើម្បីនាំមកនូវសុភមង្គល និងវិបុលភាពដល់កម្ពុជា ។

លោកថ្លែងថា៖ «ដោយមានបំណងចង់បន្តរួមចំណែក និងកសាងប្រទេសកម្ពុជា ជួយប្រជាជនកម្ពុជាឱ្យមានជីវភាពកាន់តែប្រសើរឡើង មិត្តហ្វូននឹងចូលរួមយ៉ាងសកម្មក្នុងការអនុវត្តយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា ដែលការសន្យារបស់យើងចាប់ពី១៥ឆ្នាំមុន និងទៅអនាគតនឹងតែងតែមាន។ ដូចជាទស្សនៈវិស័យរបស់យើងតាំងពីដើមគឺ “អ្នកច្នៃប្រឌិត និងយកចិត្តទុកដាក់” (Caring Innovator) ។ រាល់ដំណោះស្រាយ រាល់ផលិតផល រាល់សកម្មភាពរបស់មិត្តហ្វូននឹងខិតខំធានាថាគ្មានប្រជាជនកម្ពុជាណាដែលមិនទទួលបានប្រព័ន្ធបច្ចេកវិទ្យាឡើយ»។

បន្ទាប់ពីការអភិវឌ្ឍន៍អស់រយៈពេល១៥ឆ្នាំមិត្តហ្វូនបច្ចុប្បន្នជាម្ចាស់ហេដ្ឋារចនាសម្ព័ន្ធទូរគមនាគមន៍ដ៏ធំបំផុត និងរក្សាចំណែកទីផ្សារឈានមុខគេនៅកម្ពុជាផងដែរ។ ក្នុងដំណាក់កាលថ្មី មិត្តហ្វូនកំពុងឈានមុខគេនៃនិន្នាការបំលាស់ប្តូរឌីជីថល តាមរយៈការបង្កើតកម្មវិធី និងដំណោះស្រាយឌីជីថល ដើម្បីបង្កើនជីវភាពរស់នៅរបស់ប្រជាជនកម្ពុជា។ មិត្តហ្វូនក៏កំពុងសហការជាមួយក្រសួង ស្ថាប័ននានាក្នុងរដ្ឋាភិបាលលើគម្រោង បំលាស់ប្តូរឌីជីថលផងដែរ។

បន្ថែមពីលើសកម្មភាពអាជីវកម្មរបស់ខ្លួន មិត្តហ្វូនបានចូលរួមចំណែកយ៉ាងសំខាន់ដល់ ការអភិវឌ្ឍប្រទេសកម្ពុជា និងប្រជាជនរបស់ខ្លួន ដោយជាង ១ ពាន់លានដុល្លារបានចូលរួមចំណែកក្នុងថវិកាជាតិ និងជាង ១២០ លានដុល្លារអាមេរិក ឧទ្ទិសដល់គំនិតផ្តួចផ្តើមគាំទ្រសហគមន៍ និងសង្គម។

ក្នុង​ពិធី​គម្រប់​ខួប​នេះមិត្តហ្វូន​ក៏​បាន​ដាក់​ឱ្យ​ដំណើរការ​កម្មវិធី​ទូរទស្សន៍​ឌីជីថល TV360 ដែលអនុញ្ញាតឱ្យអ្នកប្រើប្រាស់មើលប៉ុស្តិ៍ទូរទស្សន៍ជាច្រើនប្រកបដោយគុណភាពខ្ពស់ជាមួយឧបករណ៍បច្ចេកវិទ្យាផ្សេងៗ។ កម្មវិធី TV360 គឺជាផ្នែកបន្ទាប់ដើម្បីបំពេញបន្ថែមប្រព័ន្ធអេកូឌីជីថលរបស់មិត្តហ្វូន៕