តែយ៉ាងណា មន្ត្រីជាន់ខ្ពស់រូបនេះ បន្តស្នើឱ្យប្រជាពលរដ្ឋជួយគាំទ្រផលិតផលឱ្យកាន់តែច្រើនថែមទៀត ដើម្បីរួមចំណែកជួយលើកកម្ពស់វិស័យកែច្នៃ និងផលិតផលកសិកម្មរបស់កម្ពុជា ក៏ដូចជាលើកកម្ពស់ជីវភាពរបស់ប្រជាពលរដ្ឋ។
ឯកឧត្តមបណ្ឌិត សួង ណយ អនុប្រធានគណៈកម្មាធិការជាតិ ជំរុញចលនាភូមិ១ ផលិតផល១ បានកត់សម្គាល់ឃើញថា នៅក្នុងរដូវកាលបុណ្យភ្ជុំបិណ្ឌឆ្នាំនេះ ចលនាគាំទ្រផលិតផលខ្មែរដូចជាបន្លែ ផ្លែឈើ ត្រីសាច់ និងគ្រឿងទេយ្យទានផ្សេងៗពីសំណាក់ប្រជាពលរដ្ឋមានសម្ទុះកើនឡើងគួរឱ្យកត់សម្គាល់ បើធៀបនឹងឆ្នាំកន្លងមកនេះ។ យ៉ាងណាក៏ដោយ ឯកឧត្តមបណ្ឌិត ស្នើឱ្យប្រជាជនបន្តជួយគាំទ្រផលិតខ្មែរឱ្យកាន់តែច្រើនបន្ថែមទៀតនៅក្នុងរដូវបុណ្យភ្ជុំបិណ្ឌនេះ។ សម្រាប់ ឯកឧត្តមបណ្ឌិត សួង ណយ ការគាំទ្រផលិតផលខ្មែរមិនត្រឹមតែបង្ហាញពីការស្នេហាជាតិ ប៉ុណ្ណោះទេ ថែមទាំងជួយលើកកម្ពស់វិស័យកែច្នៃ និងជួយអភិវឌ្ឍន៍វិស័យកសិកម្ម ក៏ដូចជាជួយលើកកម្ពស់ជីវភាពរបស់ប្រជាពលរដ្ឋ និងសេដ្ឋកិច្ចជាតិ។
ជាមួយគ្នានេះ ឯកឧត្តមបណ្ឌិត សួង ណយ ក៏បានជំរុញលើកទឹកចិត្តដល់អ្នកផលិត និងម្ចាស់អាជីវកម្មទាំងអស់ត្រូវរៀបចំគិតគូរលើការផ្គត់ផ្គង់ផលិតផលទាំងនោះឱ្យបានដិតដល់ និងមានការច្នៃប្រឌិតខ្ពស់ ទៅតាមតម្រូវការរបស់ប្រជាពលរដ្ឋនៅក្នុងរដូវកាលបុណ្យភ្ជុំបិណ្ឌនេះ ដ្បិតថា រដូវកាលបុណ្យភ្នំបិណ្ឌ មានរហូតដល់ទៅ១៥ថ្ងៃឯណោះ។
សូមជម្រាបថា ទោះបីជាមានតម្រូវការបន្លែ ត្រី សាច់មានការកើនឡើងគួរឱ្យកត់សម្គាល់នៅក្នុងរដូវបុណ្យភ្ជុំបិណ្ឌនេះក្តី ប៉ុន្តែតម្លៃសត្វរស់នៅលើទីផ្សារ ហាក់មិនមានការប្រែប្រួលគួរឱ្យកត់សម្គាល់នោះទេ។ តែយ៉ាងណាសមាគមអ្នកចិញ្ចឹមសត្វកម្ពុជា រំពឹងថា កំណើនតម្រូវការសាច់នៅក្នុងរដូវបុណ្យភ្ជុំបិណ្ឌនេះនឹងជួយជំរុញឱ្យតម្លៃសត្វរស់ហក់ឡើងថ្លៃបន្ថែមទៀត។
