UN ថា សង្គ្រាមនៅហ្គាហ្សាបានធ្វើឱ្យប៉ះពាល់ដល់សេដ្ឋកិច្ចប្រទេសអារ៉ាប់ក្បែរខាង និងអាចទាញទម្លាក់ GPD ជាង២%

សង្គ្រាមជាងពីរខែមកនេះបាននិងកំពុងជះផលប៉ះពាល់តិច ឬច្រើនទៅលើបណ្តាប្រទេសអារ៉ាប់ ដែលបានប្រឈមនឹងវិបត្តរួចទៅហើយ នៃសម្ពាធសារពើពន្ធ កំណើនយឺត និងភាពអត់ការងារធ្វើ ហើយកត្តាទាំងនេះបានរារាំងការវិនិយោគ ផលិតផលប្រើប្រាស់ និងពាណិជ្ជកម្មផងដែរ។ ក្នុងនោះ ប្រទេសលីបង់ កំពុងធ្លាក់ក្នុងវិបត្តិសេដ្ឋកិច្ចដ៏សែនជ្រៅ។ បើតាមការសិក្សាដែលត្រូវបានចាត់តាំងដោយកម្មវិធីអភិវឌ្ឍន៍របស់អង្គការសហប្រជាជាតិកាលពីពេលថ្មីៗ ផលប៉ះពាល់នៃជម្លោះលើរដ្ឋទាំងបីអាចនឹងធ្វើឱ្យបាត់បង់ផលិតផលក្នុងស្រុកសរុបជាង១០ពាន់លានដុល្លារ ឬប្រមាណ២,៣% នៃ GDP ដោយចំនួននេះអាចកើនឡើងទ្វេដង ប្រសិនបើសង្គ្រាមបន្តអូសបន្លាយដល់ប្រាំមួយខែ។

លោក Abdallah Al Dardari ជំនួយការអគ្គលេខាធិការអង្គការសហប្រជាជាតិនិងជានាយកការិយាល័យប្រចាំតំបន់អារ៉ាប់ (RBAS) របស់ UNDP ដែលដឹកនាំការសិក្សានេះបានឱ្យដឹងថា វិបត្តិនេះគឺជាការបំផ្ទុះគ្រាប់បែកបន្ថែមទៀតក្នុងតំបន់ដែលមានភាពផុយស្រួយរួចទៅហើយ។ លោក ដាដារី បានបន្ថែមថា ទំហំនៃការបំផ្លិចបំផ្លាញនៅតំបន់ហ្គាហ្សាក្នុងរយៈពេលដ៏ខ្លីបែបនេះ គឺមិនធ្លាប់មានពីមុនមកនោះទេចាប់តាំងពីសង្គ្រាមលោកលើកទីពីរ។ លោកថា វាត្រូវចំណាយពេល៥ឆ្នាំក្នុងការប្រយុទ្ធគ្នានៅស៊ីរី ដើម្បីឈានដល់កម្រិតដូចគ្នានៃការបំផ្លិចបំផ្លាញ ដែលហ្គាហ្សា ទើបប្រទះក្នុងរយៈពេលមួយខែ។

គួរជម្រាបថា ជម្លោះនៅហ្គាហ្សាពីរខែមកនេះ បានធ្វើឱ្យមានការផ្លាស់ទីលំនៅដ៏ច្រើននៃចំនួនប្រជាជនជិត៨០% នៃតំបន់ហ្គាហ្សាក្នុងរយៈពេលដ៏ខ្លី បើធៀបនឹងជម្លោះស៊ីរី ដែលមានអាយុកាលជាងមួយទសវត្សរ៍ ដែលនេះវាបានបង្កឱ្យមានវិបត្តិជនភៀសខ្លួនដ៏ធំបំផុតរបស់ពិភពលោក។ ទោះបីជាយ៉ាងណា នាយកការិយាល័យប្រចាំតំបន់អារ៉ាប់ នៃកម្មវិធីអភិវឌ្ឍអង្គការសហប្រជាជាតិ(UNDP) និងជាអ្នកជំនាញលើការកសាងឡើងវិញនៅក្នុងតំបន់ជម្លោះ លោក ដាដារី បានឱ្យដឹងថា ក្រុមការងាររបស់លោកកំពុងឈានដល់ការផ្តល់មូលនិធិអភិវឌ្ឍន៍ និងការព្រមព្រៀងជាមួយស្ថាប័នហិរញ្ញវត្ថុពហុភាគីរួចហើយ លើសេណារីយ៉ូនៃការកសាងឡើងវិញក្រោយសង្គ្រាមសម្រាប់តំបន់ហ្គាហ្សា៕