![រូបគម្រោង WB Arena](https://cdn.cambonomist.com/media/images/canva-photo-editor_94.2e16d0ba.fill-960x540.png)
បើតាមអ្នកគ្រប់គ្រងគម្រោង តំបន់ទេសចរណ៍ថ្មី WB Arena បានអះអាងប្រាប់ខេមបូណូមីសថា តំបន់ដែលកំពុងសាងសង់ឡើងនេះ មានទីតាំងនៅតាមបណ្ដោយផ្លូវជាតិលេខ២ ក្នុងសង្កាត់ចាក់អង្រែក្រោម ចម្ងាយប្រមាណតែជាង ២គីឡូម៉ែត្រប៉ុណ្ណោះ ពីស្ពានអាកាសព្រះមុនីវង្ស។
លក្ខណៈពិសេសរបស់តំបន់ទេសចរណ៍ប្លែកភ្នែក WB Arena នេះ គឺមានបរិយាកាសស្រស់ស្រាយ បែបធម្មជាតិពិតៗទាំងអាហារដែលដាក់លក់ដូរនៅទីនោះ និងដំណើរកម្សាន្ដបែបជិះទូកតាមដងទន្លេគយគន់សម្រស់រាជធានីភ្នំពេញ។
![រូបប្លង់គំរូ របស់ តំបន់ទេសចរណ៍ WB Arena](https://cdn.cambonomist.com/media/images/36831863_2602775049796278_45134479.2e16d0ba.fill-960x540.png)
បើតាមការប្រកាសរបស់ក្រុមហ៊ុនម្ចាស់គម្រោងតំបន់ទេសចរណ៍នេះ
បានឲ្យដឹងថា ពាណិជ្ជករ ក៏ដូចជាអាជីវករ អាចធ្វើការបើកអាជីវកម្មនៅទីនេះ ដូចជា ភោជនីយដ្ឋានជាប់មាត់ទន្លេ
ហាងអាហារដ្ឋានបែបខ្មែរ កន្លែងម៉ាស្សា និង ស៉្បា ឬអាចជួលហាងក្នុងផ្សារដែលមានចំនួន
៩០ស្តង់ និងផ្សេងៗទៀត ដើម្បីលក់ទំនិញ ឬផលិតផលនានាផងដែរ។
![រូបខិតបណ្ណព័ត៌មានផ្សព្វផ្សាយពីការជួលហាង WB Arena](https://cdn.cambonomist.com/media/images/photo_2018-08-15_16-34-09.original.jpg)
WB Arena គឺជាកន្លែងថ្មី ទីតាំងស្អាត បរិយាកាសល្អបរិសុទ្ធ និងមានអាហារដ្ឋានបែបទំនៀមទម្លាប់ខ្មែរ ចិន អឺរ៉ុប និងអាហារជាច្រើនប្រភេទទៀត។ បន្ថែមពីនេះ WB Arena ក៏មានកន្លែងកម្សាន្ដផ្សេងៗទៀត រួមមាន ក្រុមរបាំ ការប្រគុំតន្រ្តី និងអ្នកសម្ដែងប្រចាំតំបន់ផងដែរ។
![រូបប្លង់គំរូ របស់ តំបន់ទេសចរណ៍ WB Arena](https://cdn.cambonomist.com/media/images/36851090_2602777496462700_43636458.2e16d0ba.fill-960x540.png)
តំបន់ទេសចរណ៍ដ៏ពិសេស និងថ្មីសន្លាងមួយនេះ នឹងក្លាយជាទីដ៏សែនមនោរម្យមួយ សម្រាប់ភ្ញៀវទេសចរជាតិ និងអន្ដរជាតិ អាចមកលំហែកាយពេលសម្រាកពីការងារ។ នេះបើតាមការអះអាងពីអ្នកគ្រប់គ្រងគម្រោងអភិវឌ្ឍន៍តំបន់ទេសចរណ៍មួយនេះ។
ផ្លូវដើរតាមមាត់ទន្លេ សម្រាប់ភ្ញៀវទេសចរដើរកម្សាន្ដ មានទំហំរហូតដល់ ៣ពាន់ម៉ែត្រការ៉េ ដែលមានដើមត្នោតជាជួរតុបតែងភ្លើងលម្អ និងរចនាបទគួរឲ្យទាក់ទាញ នៅតាមបណ្តោយទន្លេបាសាក់។
តាមអ្វីដែលជាផែនការ ក៏មានសាលមហោស្រពធំមួយទៀត នៅទីនោះផងដែរ ដែលមានកន្លែងអង្គុយចំនួន ៤០០កៅអី មានការសម្តែងរៀងរាល់ថ្ងៃ ពីអ្នកសម្ដែងក្នុងស្រុក និងអន្តរជាតិ ព្រមទាំងមាន ការប្រគំតន្ត្រី ព្រឹត្តិការណ៍កីឡា និងកម្មវិធីសម្ដែងវប្បធម៌ប្រពៃណីខ្មែរជាដើម។