ដោយឡែក ប្រមុខចារកម្មការពារជាតិរបស់ចក្រភពអង់គ្លេសបានឲ្យដឹងថា មានរថពាសដែក ឧទ្ធម្ភាគចក្រ និងមន្ទីរពេទ្យចល័តជាច្រើនទៀតត្រូវបានគេប្រទះឃើញនៅតាមព្រំដែន។ បន្ថែមពីលើនេះ មន្ត្រីសេតវិមានអាមេរិកក៏បានចេញមកអះអាងកាលពីថ្ងៃពុធដែរថា យ៉ាងហោចណាស់ទាហាន ៧ពាន់នាក់ទៀត ត្រូវបានរុស្ស៊ីបញ្ជូនមកតំបន់ព្រំដែនជាមួយអ៊ុយក្រែននៅប៉ុន្មានថ្ងៃចុងក្រោយនេះ។ យ៉ាងណាមិញ ការអះអាងរបស់អាមេរិក មិនមានភស្តុតាងមកសំអាងនោះទេ។
ប្រមុខការទូតអាមេរិក អាន់តូនី ប្លីងខេន នៅក្នុងកិច្ចសម្ភាសន៍មួយបាននិយាយថា អ្វីដែលរុស្សីនិយាយ មិនដូចអ្វីដែលគេធ្វើទេ។ គេមិនឃើញមានការដកកងទ័ពពីតំបន់តាមបណ្តោយព្រំដែន ដូចទៅនឹងអ្វីដែលទីក្រុងម៉ូស្កូបានអះអាងនោះឡើយ មានតែការបន្ថែមកម្លាំង។
ដោយឡែក ភ្នាក់ងារស៊ើបការណ៍បរទេសរបស់ប្រទេសអេស្តូនី បាននិយាយថា ពួកគេកំណត់បានពីសកម្មភាពទាហានត្រៀមប្រយុទ្ធរបស់រុស្សីប្រមាណ១០កងពល ស្មើនឹងជាង១ម៉ឺន៧ពាន់នាក់ ចល័តឆ្ពោះទៅព្រំដែនអ៊ុយក្រែន។ ភ្នាក់ងារដដែលបានព្រមានថា ការវាយប្រហារនេះនឹងរួមបញ្ចូលទាំងការទម្លាក់គ្រាប់មីស៊ីល និងការកាន់កាប់ទីតាំងសំខាន់ៗផងដែរ។
អត្ថបទគួរអាន
គួរជម្រាបថា ភាពតានតឹងក្នុងវិបត្តិនៅអ៊ុយក្រែនមិនបានធូរស្រាលទាល់តែសោះ ខណៈការចរចានៅលើតុការទូត និងការអនុវត្តជាក់ស្តែងហាក់ផ្ទុយគ្នាស្រឡះ។ ការគំរាមកំហែងនៅតែបន្តមាននៅតាមបន្ទាត់ព្រំដែន ដែលជាការឆ្លើយតប ក្រុមប្រទេសលោកខាងលិច និងអង្គការណាតូ បាននិងកំពុងបង្កើនវត្តមានទ័ពនៃសម្ព័ន្ធមិត្តណាតូ នៅក្នុងតំបន់អឺរ៉ុបខាងកើតទាំងមូលតែម្តង។
ប្រទេសលោកខាងលិចធ្លាប់បានទទូចឲ្យប្រទេសចិន ជួយជ្រោមជ្រែងការបន្ថយកម្ដៅនៃវិបត្តិនៅអ៊ុយក្រែនដែរ ពោលគឺស្នើឲ្យចិនព្យាយាមនិយាយជាមួយរុស្សី ប៉ុន្តែត្រូវប៉េកាំងបដិសេធ ដោយអះអាងថា គេគ្មានសិទ្ធិអ្វីលូកដៃក្នុងកិច្ចការរបស់ម៉ូស្គូឡើយ។ ការបន្តសម្ងំស្ងៀមរបស់ចិន ត្រូវបានអាមេរិកចាត់ទុកថា ជាការរងចាំមើលគំរូ និងការឆ្លើយតបរបស់វ៉ានស៊ីនតោនដើម្បីងាយស្រួលឲ្យប៉េកាំងយកទៅអនុវត្តជាមួយកោះតៃវ៉ាន់។
យ៉ាងណាក៏ដោយ នៅថ្ងៃពុធសប្តាហ៍នេះ អ្នកនាំពាក្យក្រសួងការបរទេសចិនលោក វ៉ាង វិនប៊ីនបានចេញមកប្រតិកម្ម ដោយចោទអាមេរិកថា កំពុងប្រលែងលេងនឹងភ្លើងសង្គ្រាម និងបង្កើតភាពតានតឹង ជុំវិញវិបត្តិនៅអ៊ុយក្រែន។ ចិនរិះគន់អាមេរិកនិងបណ្តាប្រទេសលោកខាងលិចមួយចំនួនថា បានបំភាន់ និងយកព័ត៌មានមិនពិតមកនិយាយជាបន្តបន្ទាប់ ដែលវានឹងបង្កើតភាពចលាចល ដល់ពិភពលោកដែលធ្វើឲ្យបែកបាក់គ្នាកាន់តែខ្លាំងឡើង៕
None
