ក្នុងនោះ មានទ្រព្យសកម្មជាង១០០លានដុល្លារ ដែលកាន់កាប់ដោយក្រុមហ៊ុនបុត្រសម្ព័ន្ធរបស់ China Evergrande Group ត្រូវបានតុលាការបង្កង ក្រោយពីមានការប្ដឹងពីក្រុមហ៊ុនម៉ៅការសាងសង់ Shanghai Construction Group។
ដោយឡែក ក្រុមហ៊ុន ម៉ៅការសាងសង់ដដែលនេះ ក៏បានបញ្ជាក់កាលពីសប្ដាហ៍មុនដែរថា តុលាការតំបន់នៅក្នុងខេត្តគ័ងចូវ ក៏ទើបតែបានបង្កកទ្រព្យសកម្មរបស់ក្រុមហ៊ុនបុត្រសម្ព័ន្ធរបស់ Evergrande មួយផ្សេងទៀត ដែលមានតម្លៃជិត៦០លានដុល្លារ។
អ្នកផ្គត់ផ្គង់ និង អ្នកម៉ៅការជាច្រើនបានចាប់ផ្ដើមចាត់វិធានការតាមផ្លូវច្បាប់ប្រឆាំងនឹងក្រុមហ៊ុន Evergrande នេះផងដែរ ក្រោយពេលដែលក្រុមហ៊ុនមានការខកខានសងប្រាក់ និងសងយឺតយ៉ាវជាដើម។ ក្រុមហ៊ុន Evergrand ជាក្រុមហ៊ុនអភិវឌ្ឍន៍អចលនទ្រព្យចិនដ៏ធំលំដាប់ទី២ ហើយបច្ចុប្បន្នក្រុមហ៊ុននេះ ត្រូវបានគេដឹងថា មានជំពាក់បំណុលដល់ទៅជាង ៣ រយពាន់លានដុល្លារ។
អត្ថបទគួរអាន
យ៉ាងណាក៏ដោយចុះ ក្រុមហ៊ុន Evergrande បានបដិសេធក្នុងការធ្វើអត្ថាធិប្បាយលើពាក្យបណ្ដឹងជាមួយក្រុមហ៊ុន Shanghai Construction Group ខាងលើនេះ ដោយប្រធានក្រុមហ៊ុន Evergrande លោក Hui Ka Yan បានប្រាប់កិច្ចប្រជុំផ្ទៃក្នុងមួយកាលពីដើមខែនេះថា ក្រុមហ៊ុនមានគោលបំណងស្តារឡើងវិញនូវការងារសំណង់ពេញលេញនៅទូទាំងប្រទេសចិនក្នុងខែកុម្ភៈ ដែលសំណង់បានរួចរាល់ជាង ៩៣% នៅកាលពីចុងឆ្នាំមុន ជាមួយនឹងគោលដៅនៃប្រគល់លំនៅដ្ឋានអាផាតមិនចំនួន ៦០ម៉ឺនអាផាតមិនជូនដល់អតិថិជនរបស់ខ្លួននៅឆ្នាំ ២០២២នេះ។ លោកបានបន្ថែមថាក្រុមហ៊ុនត្រូវការជម្រះបំណុលរបស់ខ្លួន ដោយការស្ដារឡើងវិញយ៉ាងពេញលេញនូវសកម្មភាពសំណង់ និងការលក់ ដោយមិនលក់ទ្រព្យសកម្មរបស់ក្រុមហ៊ុនក្នុងតម្លៃថោកឡៃឡុង ដើម្បីសងបំណុលនោះទេ៕
អត្ថបទ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
