នៅ៥ខែដំបូងនៅឆ្នាំនេះ បើតាមតួលេខពីអគ្គនាយកដ្ឋានគយ និងរដ្ឋាករកម្ពុជាំ ទំហំពាណិជ្ជកម្មរវាងកម្ពុជា និងវៀតណាម សម្រេចបានដល់ជិត២ពាន់៨រយលានដុល្លារ កើនឡើង២០% ធៀបនឹងរយៈពេលដូចគ្នាកាលពីឆ្នាំមុន ខណៈប្រមុខរាជរដ្ឋាភិបាលកម្ពុជារំពឹងថា នៅពេញមួយឆ្នាំ២០២២ ទំហំពាណិជ្ជកម្មទ្វេភាគីរវាងកម្ពុជា-វៀតណាម នឹងបន្ដកើនដល់១០ពាន់លានដុល្លារអាមេរិកឯណោះ។
ជុំវិញទំនាក់ទំនងពាណិជ្ជកម្មរវាងកម្ពុជា និងវៀតណាម លោកបណ្ឌិត ហុង វណ្ណៈ អ្នកជំនាញសេដ្ឋកិច្ច នៃវិទ្យាស្ថានទំទាក់ទំនងអន្តរជាតិ នៃរាជបណ្ឌិតសភាកម្ពុជា បានគូសបញ្ជាក់ថា នៅក្នុងក្របខណ្ឌទ្វេភាគី ក៏ដូចជាក្របខណ្ឌកិច្ចព្រមព្រៀងសេរីផ្សេងទៀត ការដោះដូរទំនិញគឺអាស្រ័យលើតម្រូវការរវាងអ្នកផ្គត់ផ្គង់ និងតម្រូវការអ្នកបញ្ជាទិញ។ ជាក់ស្តែង កម្ពុជាមានតម្រូវការខ្ពស់ជាងវៀតណាម ដែលធ្វើឲ្យបរិមាណការនាំចូលពីវៀតណាមមកកម្ពុជា មានច្រើនជាងការនាំចេញពីកម្ពុជាទៅវៀតណាម។ មួយវិញទៀត ប្រទេសវៀតណាមជាប្រទេសដែលមានការផលិតធំជាងកម្ពុជាយូរឆ្នាំមកហើយ ដូចនេះហើយប្រព័ន្ធលំហូរទំនិញរបស់វៀតណាមមានលក្ខណៈល្អប្រសើរជាងកម្ពុជា បើទោះបីជាពេលបច្ចុប្បន្នកម្ពុជាមានការអភិវឌ្ឍរីកចម្រើនច្រើនក៏ពិតមែន តែកម្លាំងផលិតកម្ម ក៏ដូចជាប្រភេទមុខទំនិញកម្ពុជា ធៀបនឹងប្រទេសវៀតណាមនៅតែមានកម្រិតទាបនៅឡើយ។
អ្នកជំនាញសេដ្ឋកិច្ច បណ្ដិត ហុង វណ្ណៈ បានលើកឡើងទៀតថា កម្ពុជាគួរសិក្សាបន្ថែមទៀតថា តើភាគីវៀតណាមនាំចូលទំនិញអ្វីខ្លះមកកម្ពុជា ហើយកម្ពុជាគួរផលិតទំនិញអ្វីដើម្បីជំនួសទំនិញដែលនាំចូលពីក្រៅប្រទេសបាន។ ទន្ទឹមនេះ ប្រទេសវៀតណាមជាប្រទេសដែលមានកិច្ចសន្យាអន្តរជាតិក្នុងការនាំចេញច្រើនជាមួយប្រទេសដទៃ ដូចនេះវៀតណាមក៏អាចដើរតួរជាឈ្មួញកណ្តាល ហើយក៏អាចមានតម្រូវការទំនិញជាវត្ថុធាតុដើមពីកម្ពុជាកាន់តែច្រើនថែមទៀតផងដែរ ពិសេសកសិផលតែម្ដង។
អត្ថបទគួរអាន
ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មកម្ពុជា បានគូសបញ្ជាក់ដែរថា រាជរដ្ឋាភិបាលកម្ពុជា និងវៀតណាម នៅតែបន្តជំរុញទំនាក់ទំនងពាណិជ្ជកម្មរវាងគ្នា តាមរយៈការអនុវត្តយន្តការទ្វេភាគី ក្របខណ្ឌតំបន់ ក៏ដូចជា អង្គការពាណិជ្ជកម្មពិភពលោក ជាពិសេសក៏បាននឹងកំពុងសហការគ្នា លើវិស័យពាណិជ្ជកម្មឲ្យស្របតាមសភាពការណ៍ជាក់ស្ដែងរបស់ពិភពលោកផងដែរ។ បើប្រៀបធៀបជាមួយប្រទេសផ្សេងដែលមានទីតាំងភូមិសាស្ត្រឆ្ងាយពីកម្ពុជា ដូចជា ចិន ជប៉ុន កូរ៉េ អាមេរិក កាណាដា និងអឺរ៉ុបជាដើមនោះ ឃើញថា ការដោះដូរពាណិជ្ជកម្មរវាងកម្ពុជា និងវៀតណាម មានភាពងាយស្រួលជាង ពិសេសមធ្យោបាយដឹកជញ្ជូនតែម្តង។ បើតាម ឯកឧត្តម ស៊ាង ថៃ ទំនិញដែលកម្ពុជានាំចេញទៅវៀតណាមភាគច្រើន ជាផលិតផលកសិកម្ម ហើយក្រៅពីនេះ ក៏មានផលិតផលឧស្សាហកម្មវាយនភណ្ឌមួយចំនួនទៀត ដូចជា សម្លៀកបំពាក់ អំបោះ ក្រណាត់ វ៉ាលី ក្ដារបន្ទះ ថ្នាំលាប ជ័របិទកញ្ចក់ ឧស្ម័ន សារធាតុគីមី អាហារកែច្នៃ និងស្ករអំពៅជាដើម។
សូមបញ្ជាក់ថា នៅឆ្នាំ២០២១ ទំហំពាណិជ្ជកម្ម រវាងកម្ពុជា-វៀតណាម សម្រេចបានរហូតជាង ៩ពាន់លានដុល្លារអាមេរិក ជាមួយគ្នានោះ រាជរដ្ឋាភិបាលកម្ពុជាបានបង្ហាញនូវក្ដីរំពឹងយ៉ាងមុតមាំថា ទំហំពាណិជ្ជកម្មរវាងកម្ពុជា-វៀតណាម នឹងអាចសម្រេចបានក្នុងទំហំទឹកប្រាក់ប្រមាណ ១០ពាន់លានដុល្លារនៅឆ្នាំ២០២២។ យ៉ាងណាមិញ នៅ៥ខែដំបូង ឆ្នាំ២០២២ ពាណិជ្ជកម្មទ្វេភាគីកម្ពុជាវៀតណាម មានទំហំទឹកប្រាក់ប្រមាណជិត ២ពាន់៨រយលានដុល្លារ មានការកើនឡើង២០% បើធៀបនឹងរយៈពេលដូចគ្នាកាលពីឆ្នាំមុន។ ដោយក្នុងនោះ កម្ពុជាសម្រេចបានការនាំចេញទំនិញទៅកាន់ទីផ្សារវៀតណាម ក្នុងទំហំជាង១ពាន់លានដុល្លារអាមេរិក កើនឡើង៣,៤% ចំណែកការនាំចូលទំនិញ ពីវៀតណាមមកកម្ពុជាវិញ សម្រេចបានជាង ១ពាន់៧រយលានដុល្លារអាមេរិក កើនឡើង៣៤%៕
None
