តើព្រលានយន្ដហោះអន្តរជាតិភ្នំពេញថ្មី តម្លៃ១.៥០០លានដុល្លារ សាងសង់បានដល់ហើយ និងអាចរួចរាល់នៅឆ្នាំ២០២៣ដែរ ឬទេ?

គិតមកដល់ពេលនេះ គម្រោងសាងសង់ព្រលានយន្តហោះអន្តរជាតិភ្នំពេញថ្មី នៅតែបន្ដការងារសាងសង់របស់ខ្លួនយ៉ាងសកម្ម ដោយការងារសាងសង់សម្រេចបាន២៦%ហើយនៃផែនការ។ បើគ្មានអ្វីប្រែប្រួលនោះទេ គម្រោងព្រលានយន្តហោះអន្តរជាតិភ្នំពេញថ្មី ដែលស្ថិតក្នុងខេត្តកណ្ដាល គ្រោងនឹងដាក់ឱ្យដំណើរការ នៅឆ្នាំ២០២៣។

លោក ឆាល វ៉ាន់ នាយកប្រតិបត្តិក្រុមហ៊ុន Cambodia Airport Investment ដែលជាក្រុមហ៊ុនអភិវឌ្ឍគម្រោងសាងសង់ព្រលានយន្តហោះអន្តរជាតិភ្នំពេញថ្មីនេះ បានគូសបញ្ជាក់ប្រាប់ខេមបូណូមីសថា ទោះបីកន្លងមក វិបត្តិកូវីដ-១៩ បានជះឥទ្ធិពលដល់ដំណើរនៃការសាងសង់មួយចំនួន ក៏ដោយចុះ តែក្រុមហ៊ុននៅតែសុទិដ្ឋិនិយម ចំពោះគម្រោងសាងសង់នេះ។ យ៉ាងណាក៏ដោយ ដើម្បីប្រមូលទុនបន្ថែមដើម្បីសាងសង់គម្រោងព្រលានយន្ដហោះនេះ កាលពីដើមខែវិច្ឆិកានេះ ក្រុមហ៊ុន Cambodia Airport Investment ក៏បានសម្រេចលក់មូលបត្របំណុលមានបុគ្គលធានា (guaranteed bond) តម្លៃ១៥លានដុល្លារ ឱ្យទៅធនាគារព្រីន៍ ផងដែរ ។

យោងតាមសេចក្តីប្រកាសព័ត៌មានរបស់ក្រុមហ៊ុន បច្ចុប្បន្ន គម្រោងសាងសង់អាកាសយានដ្ឋានអន្តរជាតិភ្នំពេញថ្មី បានចំណាយទឹកប្រាក់សរុបជាង ៣៤៦លានដុល្លាអាមេរិករួចហើយ ដោយមិនរាប់បញ្ចូលថ្លៃដីដែលវិនិយោគរួចនោះទេ។

ជុំវិញគម្រោងសាងសង់ព្រលានយន្តហោះអន្តរជាតិភ្នំពេញថ្មីនេះ ត្រូវបានឯកឧត្តម ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានបញ្ជាក់ប្រាប់សារព័ត៌មានខេមបូណូមីសថា ដំណើរការសាងសង់ព្រលានយន្តហោះភ្នំពេញថ្មីនេះ គ្រោងចំណាយថវិកាសរុប ប្រមាណ ១ពាន់៥លានដុល្លារ ក្នុងការសាងសង់ និងមានចែកជា ៣ដំណាក់កាល។ ខណៈដំណាក់កាលទី១ ត្រូវបាន ឯកឧត្តម ស៊ីន ចាន់សិរីវុត្ថា ប៉ាន់ស្មានថា នឹងចំណាយថវិកាប្រមាណ ៧រយលានដុល្លារអាមេរិក។

មន្ត្រីជាន់ខ្ពស់អាកាសចរស៊ីវិលរូបនេះ មានក្ដីរំពឹងខ្ពស់ថា ក្រោយបញ្ចប់ការសាងសង់ព្រលានយន្តហោះអន្តរជាតិភ្នំពេញថ្មី នឹងបង្កើតឱកាសការងារបន្ថែម ដល់ប្រជាពលរដ្ឋកម្ពុជា ជំរុញកំណើនសេដ្ឋកិច្ចជាតិ ថែមទាំងបង្កើនការដឹកជញ្ជូនតាមផ្លូវអាកាសផងដែរ៕