ក្រៅពីបឹងយក្សឡោម តើខេត្តរតនគិរី មានតំបន់ទេសចរណ៍សក្ដានុពលអ្វីខ្លះដែលមិនគួរមើលរំលង?

លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី បានឱ្យដឹងថា បច្ចុប្បន្នរមណីយដ្ឋានទេសចរណ៍នៅក្នុងខេត្តរតនគិរី មានចំនួន២៧កន្លែង ដោយចែកចេញជា៣ក្រុម រួមមាន តំបន់សក្ដានុពលបែបធម្មជាតិ វប្បធម៌ និងតំបន់ទេសចរផ្នែកឯកជន ដែលមានកន្លែងកម្សាន្តកែច្នៃ។ បើតាមមន្រ្តីជំនាញរូបនេះ ខេត្តរតនគិរី នៅមានតំបន់សក្ដានុពលទេសចរណ៍ជាច្រើនទៀត ប៉ុន្តែពុំទាន់រៀបចំខ្សែទស្សនកិច្ចបានទាំងស្រុងនៅឡើយទេ ដោយសារបញ្ហាតភ្ជាប់ហេដ្ឋារចនាសម្ព័ន្ធ។ ជាមួយគ្នានេះ ប្រធានមន្ទីរទេសចរណ៍ខេត្តរតនគិរីបានគូសបញ្ជាក់ថា តំបន់ទឹកជ្រោះក្នុងខេត្តរតនគិរី ត្រូវបានចែកចេញជា៣ចង្កោម ហើយនៅក្នុងចង្កោមនីមួយៗមានបឹងធំៗ ដូចជា បឹងយក្សឡោម បឹងលំកុដទឹកធ្លាក់កាចាញ និងទឹកធ្លាក់អូរស៊ីនលែរជាដើម ដែលជាទីពេញនិយមរបស់អ្នកទេសចរទៅលេងកម្សាន្តយ៉ាងច្រើនកុះករ។ ក្រៅពីនេះ ក៏មានផ្នែកវិស័យឯកជនជាច្រើនទៀតបានចូលរួមវិនិយោគបង្កើតកន្លែងកម្សាន្ត និងស្នាក់នៅ កន្លែងអង្គុយលេ​ង និងសេវាកម្មម្ហូបអាហារ ដ៏សម្បូរបែប ដើម្បីលើកកម្ពស់វិស័យទេសចរណ៍នៅក្នុងខេត្តភូមិភាគឦ​សានមួយនេះ។

​បើតាមការអះអាងរបស់លោក ង៉ែត ពិទូ បច្ចុប្បន្នខេត្តរតនគិរីទទួលបានភ្ញៀវទេសចរទៅកម្សាន្តចន្លោះពី២ទៅ៣ពាន់នាក់ក្នុង១សប្តាហ៍។ នៅក្នុងឆ្នាំ២០២៣ កន្លងទៅ ខេត្តរតនគិរីទទួលបានភ្ញៀវទេសចរប្រមាណ៣០ម៉ឺននាក់ ហើយតាមរយៈភ្ញៀវទេសចរទាំងនេះវាបានរួមចំណែកយ៉ាងសំខាន់ក្នុងការជួយលើកកម្ពស់ដំណើរការអាជីវកម្មក្នុងវិស័យទេសចរណ៍ និងលើកកម្ពស់ជីវភាពរបស់ប្រជាពលរដ្ឋមូលដ្ឋាន៕