តើឧកញ៉ា ចេង ខេង មានគោលការណ៍រកស៊ីជោគជ័យអ្វីខ្លះ?
លោកឧកញ៉ា ចេង ខេង បាននិយាយថា រឿងការងាររកស៊ី មុខជំនួញណា ក៏មានការប្រកួតប្រជែងគ្នាដែរ ប៉ុន្តែ មុខជំនួញអចលនទ្រព្យ លោកគិតថា មានការប្រកួតប្រជែងគ្នាខ្លាំងជាងគេ។ ដោយសារការរកស៊ីក្នុងវិស័យនេះ ភាគច្រើនទាក់ទងតែជាមួយអ្នកដែលមានលុយ អ្នកមានមុខមាត់នៅក្នុងសង្គម។ ពួកគាត់ទាំងនោះ ចង់បានអ្វីដែលល្អ មានគុណភាព ដូច្នេះ ជាអ្នកផ្ដល់សេវា ត្រូវព្យាយាមអត់ធ្មត់នូវអ្វីៗគ្រប់បែបយ៉ាង, ត្រូវមានភាពវៃឆ្លាត ធ្វើការឲ្យរហ័ស ធ្វើឲ្យបានទៅតាមការត្រូវការរបស់អតិថិជនរបស់ នោះអ្នកនឹងឈ្នះការប្រកួតប្រជែងហើយ។
ឧកញ៉ ចេង ខេង បន្ថែមថា ពីមុនមក លោកចាប់ផ្តើមរកស៊ីនៅក្នុងវិស័យដីធ្លីនេះ គឺគ្មានចេះដឹងអ្វីទាំងអស់ និយាយជារួម គឺលោករៀនបណ្តើរ ធ្វើការបណ្តើរ រៀនពីកំហុសមួយទៅកំហុសមួយ ពីបទពិសោធន៍មួយទៅបទពិសោធន៍មួយ ពីអតិថិជនម្នាក់ ទៅអតិថិជនម្នាក់ រហូតដល់លោកអាចបង្កើតគោលការណ៍ និងដាក់ចេញជារូបមន្តមួយចំនួន ដូចជា ធ្វើការងារដោយក្តីស្រលាញ់ ពេញចិត្តនឹងកិច្ចការងារនេះ ពិសេស គឺធ្វើការដោយបេះដូង។
អត្ថបទគួរអាន
ឧកញ៉ា ចេង ខេង បានរៀបរាប់ថា «ដើម្បីបង្កើតគោលដៅសម្រេចជោគជ័យ ត្រូវបង្កើតផែនការច្បាស់លាស់ មុននឹងធ្វើអ្វីៗ ត្រូវសិក្សាពីទីតាំងឲ្យលម្អិត បើចង់បានលុយ យើងត្រូវដាក់ផែនការជាក់លាក់ ត្រូវយកឲ្យបានប៉ុន្មានលានដុល្លារក្នុងមួយឆ្នាំ? យើងត្រូវមានទំនាក់ទំនងល្អជាមួយអតិថិជន។ យើងគិតពីគុណភាពបម្រើសេវាកម្មឲ្យល្អ និងប្រសិទ្ធភាពការងារ យើងកុំមើលឃើញលុយជាធំពេក។ យើងត្រូវរៀនពីកំហុសខ្លួនយើង ហើយចេះទទួលការរិះគន់ពីអតិថិជនដើម្បីកែសម្រួលច្នៃប្រឌិត ទើបយើងទទួលជោគជ័យ។»
បើនិយាយពីទ្រឹស្តីនៅក្នុងការធ្វើអាជីវកម្មអចលនទ្រព្យវិញ លោក ចេង ខេង ថា «ត្រូវគិតឲ្យធំ ធ្វើឲ្យល្អបំផុត ធ្វើឲ្យអស់លទ្ធភាពដែលយើងចង់បាន។ យើងមិនត្រូវគិតតូច ហើយទៅធ្វើកិច្ចការតូច យើងនឹងទទួលបានតូចទៅតាមហ្នឹងដែរ។ ប៉ុន្តែ បើសិនជាយើងគិតឲ្យបានធំ ទោះបីយើងធ្វើសម្រេចបាន១០ភាគរយ ក៏យើងនៅតែទទួលលទ្ធផលធំជាងអ្នកដែលគិតតូចដែរ»៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
