បេសកជនពិសេសនៃប្រធានអាស៊ាននឹងធ្វើដំណើរទស្សនកិច្ចលើកទី៣នៅមីយ៉ាន់ម៉ាក្នុងពេលឆាប់ៗខាងមុខនេះ ដើម្បីបន្តជួយមីយ៉ាន់ម៉ាឲ្យវិលមករកប្រក្រតីភាព និងមាគ៌ាប្រជាធិបតេយ្យឡើងវិញ។
បេសកជនពិសេសនៃប្រធានអាស៊ានទទួលបន្ទុកបញ្ហាមីយ៉ាន់ម៉ានៅថ្ងៃទី១៨ វិច្ឆិកា បានចេញសេចក្តីថ្លែងការណ៍មួយអបអរ និងស្វាគមន៍ចំពោះការដោះលែងអ្នកទោសទ្រង់ទ្រាយធំរបស់រដ្ឋាភិបាលមីយ៉ាន់ម៉ាកាលពីថ្ងៃទី១៧ វិច្ឆិកា ឆ្នាំ២០២២។ បេសកជនពិសេសនៃប្រធានអាស៊ានចាត់ទុកការដោះលែងអ្នកទោសទ្រង់ទ្រាយធំនេះថា ជាកាយវិការដ៏សំខាន់ក្នុងទិសដៅត្រឹមត្រូវ ដើម្បីបង្កើតបរិយាកាសអំណោយផលសម្រាប់ការចាប់ផ្តើមដំណើរការសន្ទនាក្នុងចំណោមភាគីពាក់ព័ន្ធទាំងអស់នៅប្រទេសមីយ៉ាន់ម៉ា។
លើសពីនេះវាក៏ជាសញ្ញាបង្ហាញពីសុឆន្ទៈក្នុងការស្វែងរកដំណោះស្រាយដោយសន្តិវិធីចំពោះវិបត្តិបច្ចុប្បន្ន និងជាការវិវត្តវិជ្ជមានស្របតាមស្មារតី និងបំណងប្រាថ្នានៃកិច្ចព្រមព្រៀងជាឯកឆន្ទ៥ចំណុច ដែលសំរេចក្នុងកិច្ចប្រជុំមេដឹកនាំអាស៊ានកាលពីថ្ងៃទី២៤ ខែមេសា ឆ្នាំ២០២១ ផងដែរ។
ការបន្ទន់ឥរិយាបថរបស់រដ្ឋាភិបាលមីយ៉ាន់ម៉ានេះ បានជំរុញបេសកជនពិសេសនៃប្រធានអាស៊ានសម្រេចនឹងធ្វើដំណើរទស្សនកិច្ចលើកទី៣ទៅមីយ៉ាន់ម៉ាតាមការគ្រោងទុកនៅប៉ុន្មានសប្តាហ៍ខាងមុខនេះ ដើម្បីបន្តជួយមីយ៉ាន់ម៉ាឲ្យវិលទៅរកប្រក្រតីភាព និងដើរលើមាគ៌ាប្រជាធិបតេយ្យឡើងវិញ ដែលខ្លួនបានខិតខំធ្វើតាំងពីដើមអាណត្តិជាប្រធានអាស៊ានរបស់កម្ពុជា។
អត្ថបទគួរអាន
បេសកជនពិសេសនៃប្រធានអាស៊ានសង្ឃឹមថា ដំណើរទស្សនកិច្ចលើកក្រោយនេះនឹងអាចសម្រេចបានវឌ្ឍនភាពបន្ថែមទៀតលើអាទិភាពចំនួនបី នៃកិច្ចព្រមព្រៀងជាឯកឆន្ទទាំង៥ចំណុច គឺការបញ្ចប់អំពើហិង្សា ការសម្របសម្រួលដល់ការចែកជំនួយមនុស្សធម៌ និងការកសាងជំនឿ និងទំនុកចិត្ត សម្រាប់កិច្ចសន្ទនាសន្តិភាពប្រកបដោយបរិយាប័ន្ន។
គួររំលឹកផងដែរថា ក្រោយរបបយោធាដឹកនាំដោយលោក មីន អ៊ុងឡាំង ធ្វើរដ្ឋប្រហារទម្លាក់រដ្ឋាភិបាលស្របច្បាប់របស់លោកស្រី អោង សាន់ស៊ូជី កាលពីអំឡុងខែកុម្ភៈ ឆ្នាំ២០២១ ដែលបង្កឲ្យមានអំពើហិង្សារួចមក មីយ៉ាន់ម៉ាបានក្លាយជារដ្ឋឯកោ និងឃ្លាតឆ្ងាយពីសហគមន៍អាស៊ាន។ ជាក់ស្តែងរាល់កិច្ចប្រជុំធំៗ ជាពិសេសកិច្ចប្រជុំកំពូលអាស៊ានដែលកម្ពុជាធ្វើជាម្ចាស់ផ្ទះកាលពីពេលថ្មីៗនេះ ពុំមានវត្តមានមីយ៉ាន់ម៉ានោះទេ សូម្បីអ្នកតំណាងមិនមែននយោបាយ។ ទោះយ៉ាងណា កៅអីសម្រាប់មីយ៉ាន់ម៉ានៅតែមានសម្រាប់កិច្ចប្រជុំនានារបស់អាស៊ាន។
សូមបញ្ជាក់ថា ក្នុងចំណោមអ្នកទោសជិត៦ពាន់នាក់ ដែលរបបយោធាមីយ៉ាន់ម៉ាប្រកាសដោះលែងនោះ ក៏មានលោក ច ទិនស្វេ អតីតរដ្ឋមន្ត្រីការិយាល័យទីប្រឹក្សារដ្ឋ, អ្នកស្រី ឡី ឡី ម៉ អតីតអភិបាលតំបន់តានីនតាយី, លោក ម្ញា អៃ សកម្មជនគាំទ្រលទ្ធិប្រជាធិបតេយ្យជំនាន់៨៨៨៨, បណ្ឌិត ម្ញោ ញុនត៍ សមាជិកគណៈកម្មាធិការកណ្ដាល និងជាអ្នកនាំពាក្យនៃបក្សសម្ព័ន្ធជាតិដើម្បីប្រជាធិបតេយ្យ, លោក ថេន អ៊ូ សមាជិកគណៈកម្មាធិការកណ្តាលបក្ស NLD, លោក ច ហូ ទីប្រឹក្សាច្បាប់បក្ស NLD, សាស្ត្រាចារ្យ ម៉ោង តាឆូ និងព្រះតេជគុណ ស្វ៊ែ ញ៉ាវ៉ារ, លោកស្រី វីគី បូម៉ែន អតីតឯកអគ្គរាជទូតចក្រភពអង់គ្លេសប្រចាំនៅមីយ៉ាន់ម៉ា និងស្វាមី, លោកសាស្ត្រាចារ្យ សន ធើណែល ជាអតីតទីប្រឹក្សានយោបាយ សេដ្ឋកិច្ចរបស់លោកស្រី អោង សាន់ស៊ូជី, លោក តូរូ គូបូតា ជាអ្នកកាសែត និងផលិតករភាពយន្តជប៉ុន និងលោក ច ថេ អ៊ូ ជាពលរដ្ឋអាមេរិកជាដើម៕
