ការព្រមានរបស់សម្ដេចតេជោ ហ៊ុន សែន បែបនេះ បន្ទាប់ពីសម្ដេចបានត្រួតពិនិត្យនូវរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ ដោយរកឃើញថា បណ្ដាខេត្តនានាបានជំពាក់បំណុលក្រុមហ៊ុន លី ឈួងនេះ យ៉ាងច្រើន តាមរយៈការអនុវត្តន៍គម្រោងនានា ដោយមិនបានឱ្យរដ្ឋាភិបាលដឹង។
ថ្លែងនៅក្នុងឱកាសបើកការដ្ឋានសាងសង់ និងលើកកម្រិតគុណភាពផ្លូវជាតិលេខ៤៨ តភ្ជាប់ខេត្តព្រះសីហនុ ទៅកាន់ខេត្តកោះកុង នៅថ្ងៃទី៣ ខែមករា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់យ៉ាងដូច្នេះ សម្ដេចនឹងយកឆ្នាំ២០២២នេះ ដើម្បីជំរុញកំណែទម្រង់នៃការគ្រប់គ្រងហិរញ្ញវត្ថុសាធារណៈ និងអនុវត្តន៍ដោយម៉ឺងម៉ាត់នូវច្បាប់ និងបទបញ្ជាស្ដីពីការប្រើប្រាស់ថវិកា ដោយសម្ដេចបានស្នើឱ្យគ្រប់ស្ថាប័នថ្នាក់ជាតិ ពិសេសថ្នាក់ក្រោមជាតិអនុវត្ត ដោយម៉ឺងម៉ាត់នូវបទដ្ឋានទាក់ទងជាមួយនឹងការគ្រប់គ្រងហិរញ្ញវត្ថុ។ សម្ដេចបានបង្ហាញនូវការភ្ញាក់ផ្អើលជាខ្លាំងក្រោយសម្ដេចបានទទួលរបាយការណ៍ពីឯកឧត្តមអគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ អំពីបំណុលដែលបណ្ដាខេត្តនានាជំពាក់ក្រុមហ៊ុន លី ឈួង ដែលជាក្រុមហ៊ុនសាងសង់គម្រោងធំៗ ជាច្រើននៅកម្ពុជា នាពេលកន្លងមក។
អត្ថបទគួរអាន
បើទោះជា ក្រុមហ៊ុនសាងសង់មួយនេះ បានចូលរួមសាងសង់សំណង់ធំៗ ជាច្រើន នៅកម្ពុជា ក៏ដោយចុះ តែសម្ដេចតេជោ ហ៊ុន សែន បានបង្ហាញការហួសចិត្តយ៉ាងខ្លាំង ចំពោះក្រុមហ៊ុននេះ ដែលបានឃុបឃិត ជាមួយបណ្ដាខេត្តមួយចំនួន អនុវត្តគម្រោងនានា ដោយមិនបានឱ្យរដ្ឋាភិបាលដឹងជាមុន ដោយបានអនុវត្តផែនការធ្វើមុនទូទាត់ថវិកាតាមក្រោយ បន្ទាប់ពីក្រុមហ៊ុននេះធ្លាប់បានដាក់សំណើជូនរដ្ឋាភិបាលរួចមកហើយ តែត្រូវរដ្ឋាភិបាលបដិសេធ។ ជុំវិញបញ្ហានេះ ប្រមុខដឹកនាំកម្ពុជា សម្ដេចតេជោ ហ៊ុន សែន បានបញ្ជាក់ថា រាល់ការទូទាត់បំណុលឱ្យក្រុមហ៊ុន លី ឈួង អភិបាលខេត្តទាំងអស់ត្រូវសងត្រឡប់ទៅវិញ ក្នុងរយៈពេល ២០ឆ្នាំ ដោយខ្លួនឯង ដោយរដ្ឋាភិបាលមិនចេញសងជំនួសនោះទេ។ សម្ដេចថែមទាំងបញ្ជាឱ្យបញ្ឈប់រាល់គម្រោងទាំងអស់ របស់ក្រុមហ៊ុន លី ឈួង ទៀតផង។
សម្ដេចតេជោ ហ៊ុន សែន បានគូសបញ្ជាក់ទៀតថា ការធ្វើបែបនេះ គឺដើម្បីព្រមានដល់ក្រុមហ៊ុន លី ឈួង និងក្រុមហ៊ុនដទៃ ឱ្យបញ្ឈប់សកម្មភាពអនុវត្តគម្រោងសាងសង់មុន រួចសងប្រាក់តាមក្រោយ ដោយសម្ដេចបានចាត់ទុកទង្វើនេះ ថាជាទង្វើពុករលួយ នឹងបង្កើតបំណុលដល់រដ្ឋាភិបាលកម្ពុជា។ បន្ថែមនោះ សម្ដេចក៏បានសង្កត់ធ្ងន់ទៀតថា រាល់គម្រោងទាំងអស់ លុះត្រាតែមានការអនុម័តពីរដ្ឋាភិបាលជាមុនសិន ទើបអាចអនុវត្តបាន។
ក្រុមហ៊ុន លី ឈួង សំណង់ និងអាហរ័ណ នីហរ័ណ គឺជាក្រុមហ៊ុនសាងសង់អគារ និងផ្លូវថ្នល់នៅកម្ពុជាអស់រយៈពេលយូរឆ្នាំមកហើយ។ តាមការគូសបញ្ជាក់ពីសម្តេចតេជោ ហ៊ុន សែន ក្រុមហ៊ុននេះ ក៏បានសាងសង់វិមានសន្តិភាព វិមានរដ្ឋសភាជាតិ និងអគារសំណង់ធំៗជាច្រើនទៀតផងដែរ៕
