នៅក្នុងបទសម្ភាសន៍ពិសេសជាមួយសារព័ត៌មានខេមបូណូមីស ឯកឧត្តម គង់ វិបុល រដ្ឋមន្រ្តីប្រតិភូអមនាយករដ្ឋមន្រ្តី ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានគូសបញ្ជាក់ថា នៅរយៈពេល ៥ឆ្នាំទៅមុខទៀត ផ្អែកទៅលើកិច្ចព្រមព្រៀងពាណិជ្ជកម្មសេរីនានា នឹងធ្វើឲ្យពន្ធពាណិជ្ជកម្មក្រៅប្រទេសមានការថមថយ ហើយនឹងធ្វើឲ្យចំណូលផ្ទៃក្នុងកាន់តែដើរតួនាទីសំខាន់ថែមទៀត ក្នុងការទ្រង់ទ្រង់ដល់ថវិកាចំណាយរបស់រាជរដ្ឋាភិបាល។ ឯកឧត្តមបានបន្តថា រាល់ប្រភេទពន្ធទាំងអស់ពន្ធផ្ទៃក្នុង ពិតជាមានសារៈសំខាន់បំផុតសម្រាប់គ្រប់ប្រទេសទាំងអស់លើពិភពលោក រួមទាំងកម្ពុជាផងដែរ ក្នុងការទ្រទ្រង់ថវិកាជាតិ។ បើតាមអគ្គនាយកនៃអគ្គនាយកដ្ឋានពន្ធដារ បច្ចុប្បន្ន ប្រទេសថៃ មានការពឹងផ្អែកលើពន្ធផ្ទៃក្នុងរហូតប្រមាណ ៨០% ទៅ៩០% ឯណោះ។ ដោយឡែក សម្រាប់កម្ពុជាវិញ ពឹងផ្អែកលើពន្ធផ្ទៃក្នុងប្រមាណ ៧៥% ទៅ ៨០% នៃចំណូលពន្ធសរុប។
តាមការរំពឹងរបស់ឯកឧត្តម គង់ វិបុល ចំណូលពន្ធផ្ទៃក្នុងនឹងដើរតួនាទីកាន់តែសំខាន់នៅប៉ុន្មានឆ្នាំាងមុខនេះ គឺបានពឹងផ្អែកលើយុទ្ធសាស្រ្តគៀរគរចំណូលរយៈពេលមធ្យម ២០២៣-២០២៨ ជាមួយនឹងការកែទម្រង់ និងលើកកម្ពស់សមត្ថភាពស្ថាប័នឲ្យកាន់តែល្អប្រសើរថែមទៀត តាមរយៈការធ្វើទំនើបកម្មរដ្ឋបាលសារពើពន្ធ ការពង្រឹងនូវផ្នែកធនធានមនុស្ស ជាដើម។
អត្ថបទគួរអាន
យ៉ាងណាក៏ដោយ អ្នកជំនាញក្នុងវិស័យសេដ្ឋកិច្ច នាពេលថ្មីៗ បានកត់សម្គាល់ឃើញថា តាមរយៈលទ្ធផលនៃការប្រមូលចំណូលរបស់អគ្គនាយកដ្ឋានពន្ធដារ និងអគ្គនាយកដ្ឋានគយ បានបង្ហាញពីសញ្ញាណវិជ្ជមាននៃសេដ្ឋកិច្ចកម្ពុជា ជួយឲ្យកម្ពុជាកាត់បន្ថយការពឹងផ្អែកលើថវិកាពីខាងក្រៅ និងធ្វើឲ្យកម្ពុជា កាន់តែមានលទ្ធភាពអាចទាក់ទាញវិនិយោគិនបរទេសឲ្យចូលមកវិនិយោគនៅក្នុងប្រទេសថែមកម្រិតទៀត។
ជាមួយគ្នានេះ ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ ធ្លាប់បានវាយតម្លៃខ្ពស់ចំពោះការផ្លាស់ប្ដូរនៃរចនាសម្ព័ន្ធពន្ធដារ ដែលបានធ្វើឲ្យកម្ពុជា កាត់បន្ថយពឹងផ្អែកខ្លាំងទៅលើពន្ធពីក្រៅពី ៦៥% មកនៅត្រឹម ១១% ប៉ុណ្ណោះ៕
