លោកស្រី ជីនដារ៉ត់ វីរីយ៉ាតាវីគុល (Jindarat Viriyataveekul) ទីប្រឹក្សាបំណុលសាធារណៈ នៃការិយាល័យគ្រប់គ្រងបំណុលសាធារណៈថៃ បានលើកឡើងថា កម្រិតបំណុលសាធារណៈរបស់រដ្ឋាភិបាលថៃ នៅពេលនេះ ស្ថិតក្នុងដែនកំណត់ដែលអាចទទួលយកបាននៅឡើយ ដោយសារវាមិនទាន់លើសពី៧០% នៃផលិតផលក្នុងស្រុកសរុប។
លោកស្រីសង្កត់ធ្ងន់ថា កម្រិតបំណុលសាធារណៈ នៅតែស្ថិតក្នុងដែនកំណត់ដែលអាចគ្រប់គ្រងបាននៅឡើយ បើទោះបីជាក្រោយពីរដ្ឋាភិបាលថៃ បានខ្ចីប្រាក់បន្ថែមជាង៤ពាន់លានដុល្លារអាម៉េរិក ក្នុងឆ្នាំសារពើពន្ធ២០២៤ សម្រាប់កម្មវិធីផ្ដល់ហិរញ្ញប្បទានដល់វិធីចែកលុយពលរដ្ឋក្នុងម្នាក់១ម៉ឺនបាត ឬប្រមាណ៣០០ដុល្លារអាម៉េរិក សម្រាប់ក្រុមពលរដ្ឋដែលងាយរងគ្រោះយ៉ាងណាក៏ដោយចុះ។
លោកស្រីបានលើកឡើងថា ទោះបីជាបំណុលសាធារណៈ បានកើនឡើងអំឡុងវិបត្តិកូវីដ-១៩ ជាពេលដែលរដ្ឋាភិបាលបានខ្ចីបុលបន្ថែមសរុបជាង៤៤ពាន់លានដុល្លារអាម៉េរិក យ៉ាងណាក្ដី ក៏កម្រិតបំណុលសាធារណៈរបស់ប្រទេសថៃ នៅតែទាបជាងប្រទេសអភិវឌ្ឍន៍មួយចំនួននៅឡើយ ពោលគឺស្ថិតក្នុងកម្រិតមធ្យមនៅឡើយ បើធៀបទៅនឹងប្រទេសទាំងនោះ។
សូមបញ្ជាក់ថា គិតត្រឹមខែសីហា ឆ្នាំ២០២៤ នេះ បំណុលសាធារណៈរបស់រដ្ឋាភិបាលថៃ មានចំនួន៦៤%នៃផលិតផលក្នុងស្រុកសរុប (GDP)៕
ដោយ: តែម សុខុម
