ហេតុអ្វីបានជាលោកពូទីន បែរជាមកប្រាប់លោកខាងលិចឲ្យប្រាប់អ៊ុយក្រែនបញ្ឈប់អំពើឃោរឃៅទៅវិញ ទាំងដែលខ្លួនជាអ្នកផ្តើមសង្គ្រាមឈ្លានពានទៅលើអ៊ុយក្រែនមុននោះ0x017d7
លោកពូទីនបានប្រាប់លោក ម៉ាក្រុងថា លោកខាងលិចអាចជួយបញ្ចប់រាល់ឧក្រិដ្ឋកម្មសង្គ្រាម និងការវាយប្រហារមកកាន់ទីក្រុងនានានៅអ៊ុយក្រែន ក៏ដូចជានៅក្នុងតំបន់ដុនបាស ដែលនាំឱ្យជនស៊ីវិលស្លាប់ជាច្រើន តាមរយៈការបញ្ចុះបញ្ចូលទីក្រុងកៀវឲ្យបញ្ចប់ការតតាំងហើយព្រមធ្វើតាមខ្លួន និងឲ្យលោកខាងលិចបញ្ឈប់ការបញ្ចូនអាវុធឲ្យអ៊ុយក្រែនតទៅទៀតផងដែរ។
ការដែលរុស្ស៊ីនិយាយដូច្នេះ ក៏ដោយសារតែកន្លងមក រុស្ស៊ីមិនដែលទទួលស្គាល់សកម្មភាពរបស់ខ្លួនមកលើអ៊ុយក្រែនថា ជាការឈ្លានពាននោះទេ។ រុស្ស៊ីបានហៅវាថា ជាប្រតិបត្តិការយោធាពិសេស និងបានបដិសេធចំពោះការចោទប្រកាន់ថា បានប្រព្រឹត្តឧក្រិដ្ឋកម្មសង្គ្រាមដោយកងកម្លាំងរបស់ខ្លួននៅក្នុងប្រទេសអ៊ុយក្រែន។ រុស្ស៊ីចាត់ទុកសកម្មភាពរបស់ខ្លួនថា ជាការរំដោះប្រជាជនអ៊ុយក្រែនចេញពីការគ្រប់គ្រងរបស់ពួកណាហ្ស៊ី។
យ៉ាងណាក៏ដោយ លោកពូទីនក៏បានប្រាប់សមភាគីបារាំងថា ទីក្រុងម៉ូស្គូនៅតែត្រៀមខ្លួនជានិច្ចសម្រាប់ការសន្ទនាជាមួយអ៊ុយក្រែន។ គួររំឭកថា ការចរចាទល់មុខលើកចុងក្រោយបង្អស់រវាងភាគីទាំងពីរ គឺធ្វើឡើងកាលពីខែមីនា ក្នុងប្រទេសតួគី តែក្រោយមកជានិច្ចជាកាលប្រទេសទាំងពីរមានតែការជជែកគ្នាតាមប្រព័ន្ធវីដេអូអនឡាញប៉ុណ្ណោះហើយមិនមានលទ្ធផលផ្លែផ្កានោះឡើយ។
អត្ថបទគួរអាន
ជាការឆ្លើយតប ប្រធានាធិបតីបារាំងលោកម៉ាក្រុង បានប្រាប់ប្រធានាធិបតីរុស្ស៊ីវិញថា លោកមានឆន្ទៈក្នុងការធ្វើការជាមួយអង្គការអន្តរជាតិនានា ដើម្បីជួយដកការបិទខ្ទប់របស់រុស្ស៊ីលើការនាំចេញផលិតផលចំណីអាហាររបស់អ៊ុយក្រែនតាមរយៈកំពង់ផែសមុទ្រខ្មៅ។ លោកម៉ាក្រុងក៏បានរំលឹកឡើងវិញដែរថា បទឈប់បាញ់គឺជារឿងចាំបាច់មួយនៅអ៊ុយក្រែន។ ប្រធានាធិបតីបារាំងដែលទើបជាប់ឆ្នោតសម្រាប់អាណត្តិទីពីររូបនេះ បានសម្តែងការព្រួយបារម្ភយ៉ាងខ្លាំងអំពីស្ថានភាពនៅ Donbas និង Mariupol។
គួរកត់សម្គាល់ថា លោកម៉ាក្រុង ស្ថិតនៅក្នុងចំណោមមេដឹកនាំលោកខាងលិចមួយចំនួនតូចដែលនៅបន្តរក្សាកិច្ចសន្ទនា ដោយផ្ទាល់ជាមួយលោកពូទីន ចាប់តាំងពីសង្គ្រាមនៅអ៊ុយក្រែនបានផ្ទុះឡើង។ នេះបើតាមការអះអាងវិមានក្រឹមឡាំង។
តើស្ថានភាពនៅអ៊ុយក្រែនពេលនេះមានសភាពយ៉ាប់យ៉ឺនកម្រិតណា?
មកទល់ពេលនេះរុស្ស៊ីនៅតែបើកការវាយប្រហារទ្រង់ទ្រាយធំលើទីតាំងចុងក្រោយរបស់កងទ័ពអ៊ុយក្រែននៅម៉ារីយូប៉ូល ។
អង្គការសហប្រជាជាតិ និងកាកបាទក្រហមអន្តរជាតិ ទើបតែបានសម្របសម្រួលជម្លៀសជនស៊ីវិលចេញពីក្រុងម៉ារីយ៉ូប៉ូល មិនបានប៉ុន្មានថ្ងៃផង នៅថ្ងៃអង្គារទី០៣ឧសភា រុស្ស៊ីបានបើកការវាយប្រហារទ្រង់ទ្រាយធំដោយប្រើរថក្រោះ និង យន្តហោះចម្បាំងទៅលើតំបន់រោងចក្រស្លរដែក Azov ដែលជាទីតាំងឈរជើងចុងក្រោយរបស់កងទ័ពអ៊ុយក្រែន ក្នុងក្រុងម៉ារីយ៉ូប៉ូល។ បើតាមការអះអាងពីភាគីអ៊ុយក្រែន រុស្ស៊ីបានបញ្ជូនទ័ពតាមផ្លូវគោក និង ផ្លូវទឹកបន្ថែម សំដៅ វាយដណ្តើមយករោងចក្រស្លដែកចុងក្រោយ។
ដោយឡែក ក្រសួងការពារជាតិរុស្ស៊ីបានអះអាងថា កងទ័ពរុស្ស៊ីបានប្រើយន្តហោះចម្បាំង និង កាំភ្លើងធំ បាញ់កម្ទេចរោងចក្រស្លដែក កាលពីថ្ងៃទី ៣ខែឧសភា។ ប៉ុន្តែការវាយប្រហារដូច្នេះត្រូវបានអ្នកនាំពាក្យរុស្ស៊ី ចោទប្រកាន់ថា ទាហានអ៊ុយក្រែនឆ្លៀតឱកាស ពេលបទឈប់បាញ់កាលពីថ្ងៃអាទិត្យកន្លងទៅ ដើម្បីពង្រាយកម្លាំងនៅតាមទីតាំងយុទ្ធសាស្ត្រ ក្នុងរោងចក្រស្លដែក ដើម្បីរង់ចាំប្រយុទ្ធទប់ទល់នឹងកងទ័ពរុស្ស៊ីវិញ។
សូមជម្រាបថា កិច្ចខិតខំប្រឹងប្រែងរបស់ភាគីអ៊ុយក្រែន ដែលជ្រោមជ្រែងដោយ UN និងកាកបាទក្រហមអន្តរជាតិ ដើម្បីជម្លៀសជនស៊ីវិលចេញពីម៉ារីយ៉ូប៉ូលនៅតែបន្ត ទោះបីមានការវាយប្រយុទ្ធគ្នាខ្លាំងក្លាក្តី។ ក្បួនរថយន្តក្រុងបានចាកចេញពីទីក្រុង Mariupol នៅព្រឹកថ្ងៃពុធ ដើម្បីបន្តជម្លៀសជនស៊ីវិលចេញពីទីក្រុងភាគខាងត្បូងអ៊ុយក្រែនមួយនេះ។ យ៉ាងណាក៏ដោយ ភាគីអ៊ុយក្រែន មិនបានបញ្ជាក់ទេថា ជនស៊ីវិលដែលបានជម្លៀសបន្ថែមនោះ គឺពលរដ្ឋដែលបានជាប់គាំងក្នុងរោងចក្រស្លរដែក ឬមកពីតំបន់ផ្សេងនៃក្រុងម៉ារីយ៉ូប៉ូលនោះទេ៕
None
