ប្រការនេះកំពុងធ្វើឲ្យអ្នកនយោបាយ និងអ្នកជំនាញសេដ្ឋកិច្ច អំពាវនាវដល់រដ្ឋាភិបាលទីក្រុងវ៉ាស៊ីនតោន ឲ្យបន្ទាបអត្រាពន្ធគយទៅលើទំនិញនាំចូលពីប្រទេសចិន ដើម្បីកាត់បន្ថយតម្លៃទំនិញលើទីផ្សារផង និងដើម្បីបន្ថយសម្ពាធអតិផរណាដែលកំពុងកើនខ្ពស់នៅសហរដ្ឋអាមេរិកផង។ នេះបើតាមការចុះផ្សាយដោយសារព័ត៌មានជប៉ុន Nikkei។
ការិយាល័យតំណាងពាណិជ្ជកម្មអាមេរិកបាននិយាយថា ពួកគេនឹងពិនិត្យមើលឡើងវិញ លើអត្រាពន្ធ២៥% ដែលបានកំណត់យកលើទំនិញនាំចូលពីប្រទេសចិន មានតម្លៃសរុប៥០ពាន់លានដុល្លារ ដែលបានដាក់ចេញកាលពីរដ្ឋការអតីតប្រធានាធិបតីអាមេរិក ដូណាល់ ត្រាំ។
មែនទែនទៅ នេះមិនមែនជារឿងចៃដន្យ ឬជាចេតនាចង់បន្ថូរបន្ថយភាពតានតឹងរវាងប្រទេសទាំងពីរអ្វីនោះទេ។ វិធានការនេះត្រូវបានអនុម័តក្រោមផ្នែកទី៣១០ នៃច្បាប់ពាណិជ្ជកម្មអាមេរិកឆ្នាំ១៩៧៤ ដែលតម្រូវឱ្យមានការពិនិត្យឡើងវិញ អំពីភាពចាំបាច់នៃរនាំងពន្ធគយ នៅរៀងរាល់បួនឆ្នាំម្តង។
យ៉ាងណាក៏ដោយ ការិយាល័យតំណាងពាណិជ្ជកម្មអាមេរិក បានជូនដំណឹងពីកាលបរិច្ឆេទផុតកំណត់អត្រាពន្ធខាងលើ ទៅរោងចក្រ និងសហគ្រាសអាមេរិក ដែលតែងទទួលផលចំណេញពីការយកពន្ធនេះ ដើម្បីឲ្យពួកគេដាក់ពាក្យស្នើសុំឲ្យរដ្ឋាភិបាលបន្តអនុវត្តកម្រិតពន្ធដដែល។ ប្រសិនបើមានសហគ្រាសណាមួយ បានដាក់សំណើ នោះការិយាល័យពាណិជ្ជកម្មអាមេរិក នឹងយកសំណើមកពិចារណា។
អត្ថបទគួរអាន
គួរជម្រាបថា ការពិនិត្យឡើងវិញនេះ ធ្វើឡើងនៅមុនការបោះឆ្នោតសភាពាក់កណ្តាលអាណត្តិ ដែលនឹងចូលមកដល់ក្នុងខែវិច្ឆិកាខាងមុខ ស្របពេលដែលអតិផរណា ទំនងនឹងក្លាយជាបញ្ហារសើបសម្រាប់រដ្ឋបាលលោក ចូ បៃឌិន ដែលត្រូវដោះស្រាយ។ អ្នកនយោបាយក្នុងជួររដ្ឋាភិបាលលោកបៃឌិន មួយចំនួន បានឆ្លៀតឱកាសនេះ ទទូចឲ្យសេតវិមាន គិតគូរបន្ថយកាតព្វកិច្ចពន្ធខ្លះលើទំនិញនាំចូល ដើម្បីកាត់បន្ថយការចំណាយរបស់អ្នកប្រើប្រាស់នៅអាមេរិក។
រដ្ឋមន្ត្រីហិរញ្ញវត្ថុអាមេរិក លោកស្រី ចានេត យេឡេន (Janet Yellen) ធ្លាប់បានបង្ហើបកាលពីចុងខែមេសាថា ការបន្ទាបអត្រាពន្ធលើទំនិញនាំចូលពីចិនមកអាមេរិក និងអាចជាដំណោះស្រាយមួយឈានទៅបន្ទាបអតិផរណានៅក្នុងប្រទេស។
ផ្ទុយទៅវិញ លោកស្រី ខាតធឺរីន តៃ(Katherine Tai) តំណាងពាណិជ្ជកម្មរបស់សហរដ្ឋអាមេរិក បានអះអាងផ្ទុយពីនេះថា លោកស្រីមានការប្រុងប្រយ័ត្នបន្តិច ចំពោះការទម្លាក់ពន្ធនេះ ដោយលោកស្រីមើលឃើញថា វាជារឿងសំខាន់ដើម្បីការពារក្រុមហ៊ុន និងឧស្សាហកម្មរបស់អាមេរិក។
គួរជម្រាបថា សន្ទស្សន៍តម្លៃទំនិញប្រើប្រាស់របស់សហរដ្ឋអាមេរិកបានកើនឡើង ៨,៥% នៅក្នុងខែមីនា ដែលជាការកើនឡើងខ្លាំងបំផុតមិនធ្លាប់មានក្នុងរយៈពេល ៤០ឆ្នាំចុងក្រោយ។ កំណើននេះ មួយផ្នែកត្រូវបានជំរុញដោយការលុកលុយរបស់រុស្ស៊ីលើអ៊ុយក្រែន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
