ក្រសួងឧស្សាហកម្មដាក់ឲ្យប្រើ«សញ្ញាផលិតផលកម្ពុជាមានគុណភាព» តើនឹងជួយបានអ្វីខ្លះ?

លោក ហួន សុរង្សី ប្រធាននាយកដ្ឋានកិច្ចការសិប្បកម្មនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានបញ្ជាក់ថា គោលបំណងដែលក្រសួងឧស្សាហកម្មដាក់ប្រើប្រាស់សញ្ញាផលិតផលកម្ពុជាមានគុណភាពនេះថា គឺដើម្បីជួយពង្រឹងគុណភាព និងសុវត្ថិភាពផលិតផល ដែលផលិត ដោយរោងចក្រ សហគ្រាស និងសិប្បកម្មនៅកម្ពុជា។ លោកជឿជាក់ថា តាមរយៈនិមិត្តសញ្ញានេះ វានឹងជួយឲ្យផលិតផលកម្ពុជាមានឱកាសកាន់តែខ្ពស់ក្នុងការជ្រៀតចូលផ្សារទំនើបផ្សេងៗនៅកម្ពុជា និងធ្វើឲ្យអតិថិជនក៏ដូចជាអ្នកប្រើប្រាស់កាន់តែមានទំនុកចិត្តលើផលិតផលក្នុងស្រុក។

ជាមួយគ្នានេះ លោកជំទាវឧកញ៉ា កែវ មុំ ម្ចាស់ក្រុមហ៊ុនផលិតនំស្រួយលីលី បានបង្ហាញការគាំទ្រយ៉ាងខ្លាំង និងចាត់ទុកការដាក់ឲ្យដំណើរការនិមិត្តសញ្ញាផលិតផលកម្ពុជាមានគុណភាពនេះ ជាអ្វីដែលក្រុមហ៊ុន រោងចក្រ សហគ្រាស និងសិប្បកម្មនៅកម្ពុជាទន្ទឹងរង់ចាំ។ សម្រាប់ លោកជំទាវ និមិត្តសញ្ញាបញ្ជាក់គុណភាពនេះ មិនត្រឹមតែជួយពង្រឹងគុណភាព និងសុវត្ថិភាពផលិតក្នុងស្រុកប៉ុណ្ណោះទេ ថែមទាំងផ្តល់ទំនុកចិត្តដល់អ្នកលក់ និងអ្នកប្រើប្រាស់ទៀតផង។ 

ពាក់ព័ន្ធនឹងការចុះបញ្ជីផលិតផលមានគុណភាពនេះ ត្រូវបានលោក ហួន សុរង្សី អះអាងថា ហាក់មានការតឹងរ៉ឹងបន្តិច ពោលគឺក្រុមហ៊ុន រោងចក្រ សហគ្រាស និងសិប្បកម្មទាំងនោះត្រូវចុះបញ្ជីធ្វើពាណិជ្ជកម្មត្រឹមត្រូវជាមួយក្រសួង និងមានការចុះបញ្ជីផលិតផល និងរង្វាស់រង្វាល់ត្រឹមត្រូវ។ លោកអះអាងបន្ថែមថា ការចុះបញ្ជីទៀតសោតមិនមែនចេះតែផ្តល់ឲ្យនោះទេ គឺត្រូវឆ្លងកាត់ការវាយតម្លៃយ៉ាងតឹងរ៉ឺងពីគណៈការជំនាញតាមដំណាក់កាលនីមួយៗ។

 បើតាមលោក ហួន សុរង្សី ការចុះបញ្ជីនេះដែរតម្រូវឲ្យក្រុមហ៊ុន រោងចក្រ សហគ្រាស និងសិប្បកម្មត្រូវបង់សេវាជូនរដ្ឋចំនួន ៣០ម៉ឺនរៀលក្នុងមួយមុខទំនិញ៕