ការព្យាករពីក្រសួងសេដ្ឋកិច្ចបានឲ្យដឹងថា វិស័យសំខាន់ៗ ចំនួន៣ រួមមាន វិស័យឧស្សាហកម្ម វិស័យកសិកម្ម និងវិស័យសេវាកម្ម នឹងបន្ដជាក្បាលម៉ាស៊ីនជំរុញសេដ្ឋកិច្ចកម្ពុជា នៅឆ្នាំ២០២២ ឱ្យមានកំណើនក្នុងអត្រា ៤,៨ភាគរយ ខណៈសេដ្ឋកិច្ចកម្ពុជា នៅឆ្នាំ២០២១ ត្រូវបានប៉ាន់ស្មានថា មានកំណើនក្នុងអត្រា ២,៤ភាគរយ។ ផ្អែកលើសេចក្ដីព្រាងច្បាប់របស់ក្រសួងសេដ្ឋកិច្ច និងហិរញ្ញវត្ថុ ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ បង្ហាញថា វិស័យសេវាកម្ម នឹងបន្តកើនឡើង ក្នុងអត្រា៤,១% ក្នុងឆ្នាំ២០២២ ពីកំណើនត្រឹម ០,៣% នៅឆ្នាំ២០២១។ ទោះយ៉ាងណា តើមានកត្តាអ្វីខ្លះ ធ្វើឲ្យវិស័យសេវាកម្មកើនយឺត ហើយវាអាចនឹងជះឥទ្ធិពលដល់អត្រាកំណើនសេដ្ឋកិច្ចកម្ពុជា នៅឆ្នាំ២០២២ ឬយ៉ាងណាខ្លះ?
ការងើបឡើងវិញ នៃវិស័យសេវាកម្ម អាចនឹងមានភាពយឺតយ៉ាវ ដោយសារតែការងើបឡើងវិញសន្សឹមៗ នៃអនុវិស័យសណ្ឋាគារ ភោជនីយដ្ឋាន និងសេវាគាំទ្រទេសចរណ៍ផ្សេងទៀត។
អនុវិស័យសណ្ឋាគារ និងភោជនីយដ្ឋាន ត្រូវបានរំពឹងថា នឹងងើបឡើងវិញ ប៉ុន្តែស្ថិតក្នុងកម្រិតទាប ទាំងទំហំ និងអត្រាកំណើន ដោយសារការរំពឹងការងើបឡើងវិញក្នុងល្បឿនយឺត នៃភ្ញៀវទេសចរអន្តរជាតិ។ ខណៈចំនួនភ្ញៀវទេសចរជាតិ ត្រូវបានរំពឹងថានឹងងើបឡើងវិញ ក្នុងសន្ទុះលឿន ព្រោះការរាតត្បាតកូវីដ-១៩ ក្នុងសហគមន៍បានស្រាកស្រាន្ត និងគ្រប់គ្រងស្ថានការណ៍បានឡើងវិញ។ ថ្មីៗនេះទៀត រាជរដ្ឋាភិបាលកម្ពុជា ក៏ទើបតែបានប្រកាសបើកប្រទេសឡើងវិញលើគ្រប់វិស័យ ដែលគេរំពឹងថាវិស័យសេវាកម្ម អាចនឹងចាប់ផ្ដើមស្ទុះងើបឡើងវិញកាន់តែលឿនផងដែរ។
អត្ថបទទាក់ទង
ជុំវិញបញ្ហានេះ កាលពីថ្ងៃទី១ ខែវិច្ឆិកា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏បានលើកឡើងដែរ ថាវិស័យសេវាកម្ម បានរងផលប៉ះពាល់ធ្ងន់ធ្ងរ ដោយសារការរាតត្បាតកូវីដ-១៩។ បើតាមសម្ដេច ហ៊ុន សែន ការបើកប្រទេសឡើងវិញលើគ្រប់វិស័យ នឹងចូលរួមស្ដារវិស័យសេវាកម្ម ក៏ដូចជា ស្ដារសេដ្ឋកិច្ចជាតិ ឡើងវិញ។ ជាមួយគ្នានោះ សម្ដេចក៏រំពឹងដែរថា សេដ្ឋកិច្ចកម្ពុជា អាចនឹងកើនបាន ២,៦ភាគរយ ក្នុងឆ្នាំ២០២១ ក្រោយបើកដំណើរការសង្គម និងសេដ្ឋកិច្ច ក្នុងប្រទេសឡើងវិញទាំងអស់ ចាប់ពីថ្ងៃទី១ ខែវិច្ឆិកា។
ជាមួយគ្នានេះដែរ លោក ឌិន សុមេធារិទ្ធិ ប្រធានសមាគមសណ្ឋាគារកម្ពុជា បានយល់ឃើញថា វិស័យសេវាកម្ម ពិតជាបានចូលរួមចំណែកយ៉ាងសំខាន់ ក្នុងកំណើនសេដ្ឋកិច្ចជាតិ។ លោកបានបន្ថែមថា បើទោះបីសកម្មភាពភ្ញៀវទេសចរផ្ទៃក្នុង ចាប់ផ្ដើមងើបឡើងវិញបណ្ដើរៗក៏ដោយ ប៉ុន្ដែសម្រាប់រហូតមកដល់ពេលនេះ វិស័យសណ្ឋាគារ ហាក់មិនទាន់មានការកម្រើកឡើងវិញនៅឡើយទេ ព្រោះមិនទាន់មានវត្តមានរបស់ភ្ញៀវអន្តរជាតិ។ បើតាមប្រធានសមាគមសណ្ឋាគាររូបនេះ លោកនៅមិនទាន់អាចបញ្ជាក់នៅឡើយថា កំណើនសេដ្ឋកិច្ចនៅឆ្នាំក្រោយ អាចសម្រេចដូចការព្យាករណ៍ ឬយ៉ាងណា ដោយលោករង់ចាំស្ថានភាពនៃលំហូរភ្ញៀវអន្តរជាតិជាមុនសិន ក្រោយរាជរដ្ឋាភិបាលប្រកាសបើកប្រទេសឡើងវិញ លើគ្រប់វិស័យ និងត្រៀមទទួលទេសចរវ៉ាក់សាំង នៅចុងខែវិច្ឆិកា ខាងមុខ។
បើតាមការបញ្ជាក់របស់លោក ឌិន សុមេធារិទ្ធ ប្រធានសមាគមសណ្ឋាគារកម្ពុជា បច្ចុប្បន្ន សមាគម មានសមាជិកសរុបចំនួន ៩១ក្រុមហ៊ុន។ ដោយសារតែការរាតត្បាតនៃជំងឺកូវីដ-១៩ ដែលបណ្ដាលឱ្យមានការបិទខ្ទប់ផងនោះ ក៏បានប៉ះពាល់ដល់សណ្ឋាគារមួយចំនួន នៅតាមបណ្ដាខេត្ត ដូចជា សៀមរាប និងព្រះសីហនុ ជាដើម ត្រូវបានផ្អាកសកម្មភាពរបស់ខ្លួនបណ្ដោះអាសន្នផងដែរ។
សូមបញ្ជាក់ថា ដើម្បីឱ្យកំណើនសេដ្ឋកិច្ចកម្ពុជា នាឆ្នាំ២០២២ សម្រេចបាននូវកំណើន ក្នុងអត្រា ៤,៨ភាគរយ ទាមទារឱ្យមានការចូលរួមពីវិស័យឧស្សាហកម្ម វិស័យសេវាកម្ម និងវិស័យកសិកម្ម ។ ក្នុងនោះ វិស័យឧស្សាហកម្ម ត្រូវបានព្យាករណ៍ថា នឹងសម្រេចបានកំណើន ៧,៧ភាគរយ ក្នុងឆ្នាំ២០២២ ពីកំណើន ៥,៧ភាគរយ ក្នុងឆ្នាំ២០២១។ ចំណែក វិស័យសេវាកម្ម ត្រូវបានគេព្យាករណ៍ថា នឹងសម្រេចបានកំណើន ក្នុងអត្រា ៤,១ភាគរយ ក្នុងឆ្នាំ២០២២ ពីកំណើន ០,៣ភាគរយ ក្នុងឆ្នាំ២០២១។ ចំណែកឯ វិស័យកសិកម្មវិញ ត្រូវបានគេព្យាករណ៍ថា នឹងសម្រេចបានកំណើន ក្នុងអត្រាទាប ១,១ភាគរយ ក្នុងឆ្នាំ២០២២ បើធៀបនឹងកំណើន ១,៤ភាគរយ ក្នុងឆ្នាំ២០២១៕
