ទោះយ៉ាងណា ក្រុមអ្នកជំនួញនៅតែមានក្ដីបារម្ភថា ប្រសិនបើតម្លៃប្រេងឆៅពិភពលោក ក៏ដូចជាតម្លៃប្រេងឥន្ធនៈនៅកម្ពុជាបន្ដឡើងថ្លៃ និងអូសបន្លាយពេលកាន់តែយូរទៀត នោះចង់ ឬមិនចង់វានឹងបង្កឲ្យមានផលប៉ះពាល់កាន់តែខ្លាំងជាក់ជាមិនខានឡើយ។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញ បានបញ្ជាក់ប្រាប់សារព័ត៌មានខេមបូណូមីសថា ជាការពិត ការឡើងថ្លៃនៃប្រេងឥន្ធនៈ ពិតជាបានជះឥទ្ធិពលយ៉ាងធ្ងន់ធ្ងរដល់វិស័យដឹកជញ្ជូននៅកម្ពុជា ប៉ុន្ដែបច្ចុប្បន្ន ថ្លៃដឹកជញ្ជូនទំនិញនៅកម្ពុជា ហាក់មិនទាន់មានការប្រែប្រួលខ្លាំង និងក្លាយជាបញ្ហាចោទនៅឡើយទេ។ ដ្បិតថា មិនទាន់ក្លាយជាក្ដីកង្វល់លើមធ្យោបាយដឹកជញ្ជូន ក្នុងស្រុកក៏ដោយចុះ ប៉ុន្ដែប្រធានសមាគមរូបនេះ បានសង្កត់ធ្ងន់ទៀតថា បើសិនតម្លៃប្រេងឥន្ធនៈលើទីផ្សារអន្តរជាតិ បន្តឡើងថ្លៃទៀត វានឹងប៉ះពាល់ខ្លាំងដល់វិស័យដឹកជញ្ជូននៅកម្ពុជាជាក់ជាមិនខានឡើយ។
បើតាមការបញ្ជាក់របស់លោក ជា ចាន់ដារ៉ា បច្ចុប្បន្ន តម្លៃដឹកជញ្ជូនក្នុងស្រុក នៅតែរក្សាតម្លៃតាមធម្មតា គ្រាន់តែផលចំណេញពីការដឹកជញ្ជូនថយចុះជាងមុនពេលប្រេងឥន្ធនៈឡើងថ្លៃបន្តិច។ ក្នុងនោះ សម្រាប់ទូរកុងតឺន័រខ្លី២០ហ្វីត ពីរាជធានីភ្នំពេញ ទៅខេត្តព្រះសីហនុ មានតម្លៃ ចន្លោះពី ១៦០ដុល្លារ ទៅ ១៨០ដុល្លារ រីឯទូរកុងតឺន័រវែង មានតម្លៃ ២៦០ដុល្លារ ទៅ ២៨០ដុល្លារ។
អត្ថបទគួរអាន
ជាមួយគ្នានេះដែរ លោកជំទាវ ឧកញ៉ា កែវ មុំ ប្រធានសមាគមសហគ្រិនស្ត្រីកម្ពុជា និងជាអគ្គនាយិកាក្រុមហ៊ុនផលិតនំស្រួយលីលី បានបញ្ជាក់ប្រាប់សារព័ត៌មានខេមបូណូមីសថា បញ្ហាប្រេងឥន្ធនៈឡើងថ្លៃ ពិតជាបង្ករផលប៉ះពាល់ដល់ខ្សែច្រវ៉ាក់ផលិតកម្ម និងសេវាដឹកជញ្ជូន។ លោកជំទាវបានគូសបញ្ជាក់ថា ការឡើងថ្លៃនៃប្រេងឥន្ធនៈ នឹងជាកត្តាធ្វើឱ្យផលចំណេញពីឧស្សាហកម្ម មានការថយចុះ។ យ៉ាងណាក៏ដោយចុះ លោកជំទាវ កែវ មុំ នៅតែមានសុទិដ្ឋិនិយមចំពោះការស្ទុះកើបឡើងវិញ នៃវិស័យសហគ្រាសខ្នាតតូច និងមធ្យមនៅកម្ពុជា ក្រោយពេលដែលរាជរដ្ឋាភិបាលបានបើកប្រទេសឡើងវិញជាបណ្ដើរៗ។
តម្លៃប្រេងឥន្ធនៈនៅប៉ុន្មានខែកន្លងមកនេះ បានបន្ដកើនឡើងជាបន្ដបន្ទាប់ ស្របពេលដែលតម្លៃប្រេងឆៅលើទីផ្សារពិភពលោកក៏មានតម្លៃខ្ពស់ដូចគ្នាដែរ។
សូមបញ្ជាក់ថា តារាងតម្លៃប្រេងឥន្ធនៈពីក្រសួងពាណិជ្ជកម្មកម្ពុជាបង្ហាញថា ចាប់ពីថ្ងៃទី១ ខែវិច្ឆិកា ដល់ថ្ងៃទី១៥ ខែវិច្ឆិកា ឆ្នាំ២០២១ តម្លៃប្រេងសាំងធម្មតាត្រូវលក់ក្នុងតម្លៃ ៤.៥៥០រៀល ក្នុង១លីត្រ ខណៈតម្លៃម៉ាស៊ូតវិញ ១លីត្រ មានតម្លៃ៤.១០០រៀល។ ការកើនឡើងនៃតម្លៃប្រេងឥន្ធនៈនៅកម្ពុជា គឺស្របគ្នាទៅនឹងតម្លៃប្រេងឆៅលើទីផ្សារពិភពលោកក៏កំពុងហក់ឡើងខ្លាំងដែរ ដោយក្នុងមួយធុងបារ៉ែល មានតម្លៃក្នុងរង្វង់ជាង៨៣ដុល្លារអាមេរិកឯណោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
