បើតាមអ្នកជំនាញ ភូមិកីឡដ្ឋាននេះ វាមិនត្រឹមតែដើរតួនាទីក្នុងការរក្សាសុវត្ថិភាព និង រឹតចំណងសាមគ្គីភាពរវាងកីឡាករ គ្រូបង្វឹក និង ប្រតិភូកីឡាមកពីប្រទេសផ្សេងៗក្នុងតំបន់អាស៊ាននោះទេ ប៉ុន្ដែ វានឹងចូលរួមជួយកម្ពុជាក្នុងការកត់ត្រានូវប្រវត្តិសាស្ត្រថ្មីមួយ ក្នុងការរៀបចំព្រឹត្តិការណ៍កីឡាថ្នាក់តំបន់ដ៏ធំ។
មែនទែនទៅ បើតាមការអះអាងពីអ្នកជំនាញ ការដែលកម្ពុជារួមជាមួយប្រទេសផ្សេងៗមានការសាងសង់អគារស្នាក់នៅសម្រាប់កីឡាករពេលពួកគេធ្វើជាម្ចាស់ផ្ទះព្រឹត្តិការណ៍ប្រកួតកីឡាធំៗវាមិនមែនជារឿងចៃដន្យនោះទេ ប៉ុន្ដែវាជាលក្ខខណ្ឌតម្រូវរបស់គណៈកម្មការអូឡាំពិកអន្តរជាតិ(IOC)។ តើមានមូលហេតុអ្វីដែលនាំឲ្យគណៈកម្មការអូឡាំពិកអន្តរជាតិ IOC តម្រូវឲ្យប្រទេសម្ចាស់ផ្ទះព្រឹត្តិការណ៍ប្រកួតកីឡាធំៗសាងសង់អគារស្នាក់នៅសម្រាប់កីឡាករ គ្រូបង្វឹក និងប្រតិភូកីឡា0x017d7
បើតាមឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បានឲ្យដឹងថា ការសាងសង់ភូមិកីឡដ្ឋាន ឬភូមិកីឡា វាមិនមែនជារឿងថ្មីនោះទេសម្រាប់ប្រទេសមួយចំនួនដែលធ្លាប់ធ្វើជាម្ចាស់ផ្ទះព្រឹត្តិការណ៍កីឡាធំៗដូចជាស៊ីហ្គេម កីឡាអាស៊ី និងអូឡាំពិក ព្រោះវាជាលក្ខខណ្ឌតម្រូវរបស់គណៈកម្មការអូឡាំពិកអន្តរជាតិ។
ពាក់ព័ន្ធបញ្ហានេះឯកឧត្តម វ៉ាត់ ចំរើន បានពន្យល់ថា និន្នាការដែលគណៈកម្មការអូឡាំពិកអន្តរជាតិ តម្រូវឲ្យប្រទេសជាម្ចាស់ផ្ទះរៀបចំកន្លែងស្នាក់នៅសមរម្យ ឬសាងសង់ភូមិកីឡាសម្រាប់កីឡាករ គ្រូបង្វឹក និងប្រតិភូកីឡាប្រទេសជាភ្ញៀវនេះ គឹបន្ទាប់ពីមានភារវកម្មក្នុងព្រឹត្តិការណ៍កីឡាអូឡាំពិកនៅអាល្លឺម៉ង់កាលពីឆ្នាំ១៩៧២ នៅពេលនោះក្រុមជនជាតិប៉ាឡេស្ទីនបានសម្លាប់ក្រុមកីឡាករ គ្រូបង្វឹក និងប្រតិភូរបស់អ៊ីស្រាអែលនៅសណ្ឋាគារ។ ចាប់តាំងពីពេលនោះមក IOC តម្រូវឲ្យប្រទេសដែលធ្វើម្ចាស់ផ្ទះព្រឹត្តិការណ៍កីឡាធំៗសាងសង់ភូមិកីឡា ឬប្រើសណ្ឋាគារលំដាប់ផ្កាយ៤ ឬ៥ឲ្យកីឡាករថ្នាក់នៅ។
អត្ថបទទាក់ទង
យ៉ាងណាមិញ គម្រោងភូមិកីឡដ្ឋានវើលដ៍ប្រ៊ីដដែលជាការវិនិយោគដោយក្រុមហ៊ុនវើលដ៍ប្រ៊ីដរបស់អ្នកឧកញ៉ា សៀ ឬទ្ធី និងសហការជាមួយរាជរដ្ឋាភិបាលកម្ពុជា ដែលបច្ចុប្បន្នកំពុងសាងសង់ឡើងនៅក្បែរនឹងពហុកីឡដ្ឋានមរតកតេជោនោះ ត្រូវបាន ឯកឧត្តម វ៉ាត់ ចំរើន បានមានប្រសាសន៍ថា នឹងដើរតួនាទីយ៉ាងសំខាន់ក្នុងការរក្សាសុវត្ថិភាពជូនកីឡាករ គ្រូបង្វឹក និងប្រតិភូកីឡាមកពីប្រទេសផ្សេងៗ ពេលកម្ពុជាធ្វើជាម្ចាស់ផ្ទះការប្រកួតកីឡាស៊ីហ្គេម និងអាស៊ានប៉ារ៉ាហ្គេមនាឆ្នាំ២០២៣។ ឯកឧត្តមជឿជាក់ថា ភូមិកីឡដ្ឋាននេះនឹងជួយលើកមុខមាត់និងកេរ្តិ៍ឈ្មោះកម្ពុជាមួយកម្រិតទៀតទាំងនៅលើឆាកជាតិ និងអន្តរជាតិ។ លើសពីនេះ វានឹងជួយសាងកំណត់ត្រាប្រវត្តិសាស្ត្រថ្មីសម្រាប់កម្ពុជាក្នុងនាមប្រទេសធ្វើម្ចាស់ផ្ទះស៊ីហ្គេម និងអាស៊ានប៉ារ៉ាហ្គេមលើកដំបូង ដែលគោរពតាមលក្ខខណ្ឌរបស់គណៈកម្មការអូឡាំពិកអន្តរជាតិបានត្រឹមត្រូវ។
សូមបញ្ជាក់ថា ភូមិកីឡដ្ឋានវើលប្រ៊ីដនេះ លាតសន្ធឹងលើផ្ទៃដី៦ហិកតាក្នុងចំណោមផ្ទៃដី៣ម៉ឺន៥ពាន់ហិកតា ហើយវាមានទីតាំងស្ថិតនៅក្បែរនឹងពហុកីឡាដ្ឋានមរតកតេជោ ក្នុងទីក្រុងនាគសម្តេចតេជោសែន ដោយការសាងសង់គ្រោងចំណាយដើមទុនប្រមាណជាង២០០លានដុល្លារ និងគ្រោងបញ្ចប់នៅចុងឆ្នាំ២០២២។
អ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន វើលប្រ៊ីដ គ្រុប បានអះអាថា គម្រោងភូមិកីឡដ្ឋាន វើលដ៍ប្រ៊ីដនេះ នឹងក្លាយជាតំបន់ពាណិជ្ជកម្មថ្មីសឡាងមួយទៀត នៃទីក្រុងនាគសម្តេចតេជោសែន ដោយតំបន់ពាណិជ្ជកម្មនេះ ត្រូវបានសិក្សាយ៉ាងល្អិតល្អន់ ដោយក្នុងនោះ មានខុនដូរសម្រាប់ការស្នាក់នៅ១២អគារ ស្មើនឹងជាង១.៣០០បន្ទប់ មានខុនដូរប្រភេទស្ទូឌីយ៉ូ១អគារ ស្មើនឹង ១៦៣បន្ទប់ កម្ពស់១៣ជាន់ ។ ក្រៅពីនេះ ក៏មានជាប្រភេទផ្ទះល្វែង ផ្ទះអាជីវកម្ម ផ្ទះវីឡា ផ្សារទំនើប សារមន្ទីរកីឡា ជាដើម។ បច្ចុប្បន្ន គម្រោងនេះ ក៏បានសហការជាមួយនឹងធនាគារធំៗជាច្រើន ដើម្បីផ្ដល់ជូននូវការប្រាក់ប្រាក់ក្នុងលក្ខខណ្ឌពិសេស សម្រាប់អ្នកដែលមានបំណងចង់ទិញលំនៅដ្ឋាន នៅក្នុងគម្រោងនេះផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
