អង្គការនៃប្រទេសនាំចេញប្រេង OPEC និងដៃគូរបស់ខ្លួនដូចជា ប្រទេសរុស្សីជាដើម បានព្រមព្រៀងគ្នានឹងបង្កើនការផលិតផ្គង់ផ្គង់ប្រេងលើទីផ្សារ ចាប់ពីខែសីហាតទៅ បន្ទាប់ពីមើលឃើញថា តម្លៃប្រេងបានហក់ឡើងយ៉ាងខ្លាំងនៅអំឡុងពេលមានកូវីដ-១៩។
នៅក្នុងកិច្ចព្រមព្រៀងថ្មីនេះ អង្គការប្រទេសនាំចេញប្រេង OPEC និងប្រទេសជាដៃគូ បានយល់ព្រមបង្កើនការផលិតបន្ថែម ២លានបារ៉ែលក្នុងមួយថ្ងៃ ចាប់ពីខែសីហា ដល់ខែធ្នូ ដើម្បីជួយឲ្យមានលំនឹងទីផ្សារ។
តម្លៃប្រេងឆៅលើទីផ្សារអង់គ្លេសបានកើនឡើងដល់ទៅ ៤៣% នៅក្នុងឆ្នាំនេះ ដោយមានតម្លៃដល់ទៅជិត ៧៤ដុល្លារអាមេរិកក្នុងមួយបារ៉ែល ខណៈដែលការឡើងតម្លៃប្រេងនេះ គឺបានកើឡើងក្រឺតៗតាំងពីចុងឆ្នាំ២០២០មកម្ល៉េះ។ ការកើនឡើងនេះ មួយផ្នែកក៏ដោយសារតែ កាលពីឆ្នាំមុន អង្គការប្រទេសនាំចេញប្រេង OPEC និងប្រទេសជាដៃគូ បានរួមគ្នាកាត់បន្ថយការផលិតប្រេង ប្រមាណ១០លានបារ៉ែលក្នុងមួយថ្ងៃ នៅគ្រាដែលវិបត្តិមេរោគឆ្លងកូវីដ-១៩បានចាប់ផ្ដើមផ្ទុះឡើងនៅគ្រាដំបូង ដែលបានធ្វើឲ្យតម្រូវការប្រេងធ្លាក់ចុះ ហើយតម្លៃបានដាំក្បាលចុះខ្លាំង ដោយកាលពីចុះឆ្នាំ២០២០ តម្លៃប្រេង គឺមានក្រោម៤០ដុល្លារក្នុងមួយធុងបារ៉ែលប៉ុណ្ណោះ។
អត្ថបទគួរអាន
ប៉ុន្ដែ នៅឆ្នាំ២០២១នេះវិញ តម្លៃប្រេងបានហក់ឡើង ដោយសារតែសេដ្ឋកិច្ចប្រទេសជាច្រើនទូទាំងពិភពលោកមានការបើកដំណើការឡើងវិញជាបណ្ដើរ ដែលហើយតម្លៃប្រេងហក់ឡើងខ្លាំង ក៏បានចូលជំរុញឲ្យមានការកើនឡើងអតិផរណានៅក្នុងបណ្ដាប្រទេសមួយចំនួន និងគំរាមកំហែង បន្ទុចបង្អាក់ដល់ការងើបឡើងវិញនៃសេដ្ឋកិច្ចសកលផងដែរ។
សូមបញ្ជាក់ថា តម្លៃប្រេងទីផ្សារពិភពលោកហក់ឡើងខ្ពស់ វាក៏បានអូសទាញឲ្យតម្លៃប្រេងឥន្ធនៈនៅកម្ពុជាមានការកើនឡើងខ្ពស់ដែរ ដោយប្រេងសាំងធម្មតាត្រូវដាក់លក់ចាប់ពីថ្ងៃទី ១៦ ដល់ថ្ងៃទី ៣១ ខែកក្កដា មានតម្លៃ ៤.១០០រៀល ក្នុងមួយលីត្រ ខណៈដែលប្រេងម៉ាស៊ូតវិញតម្លៃ ៣.៦៥០រៀលក្នុងមួយលីត្រ៕
None
