អ្នកជំនួញវ័យក្មេងនៅម៉ាឡេស៊ី កំពុងរងគ្រោះ ដោយសារគម្រោងអាជីវកម្មទិញឥឡូវ បង់លុយពេលក្រោយ

លោកស្រី ហានណាស យ៉េវ (Hannah Yeoh) រដ្ឋមន្រ្តីក្រសួងកីឡា និងយុវជនម៉ាឡេស៊ី បានអះអាងថា អាជីវករវ័យក្មេងនៅម៉ាឡេស៊ី ដែលមានអាយុចន្លោះពី១៨ឆ្នាំដល់៤០ឆ្នាំជាច្រើន កំពុងប្រឈមនឹងការក្ស័យធនដោយសារគម្រោងអាជីវកម្មទិញឥឡូវបង់លុយពេលក្រោយ ឬការបង់រំលោះ បន្ទាប់ពីពលរដ្ឋកាន់តែងាកទៅរកការទិញទំនិញតាមអនឡាញ។ បើតាមការអះអាងរបស់មន្ត្រីជាន់ខ្ពស់រូបនេះ អ្នករកស៊ីក្នុងគំរូអាជីវកម្មទិញឥឡូវបង់លុយពេលក្រោយជាច្រើន បានប្រកាសក្ស័យធនជាបន្តបន្ទាប់ ហើយអ្នកខ្លះកំពុងធ្លាក់ក្នុងវិបត្តិហិរញ្ញវត្ថុ ដែលទាមទារឲ្យរដ្ឋាភិបាលគួរតែយកចិត្តទុកដាក់ ដើម្បីកុំឱ្យបញ្ហាកាន់តែធ្ងន់ធ្ងរ។ កាលពីឆ្នាំ២០២៤ អ្នកក្ស័យធន​ដោយសារគំរូអាជីវកម្មខាងលើមានចំនួន​៨៧៧ករណី ខណៈកាលពីឆ្នាំ២០២៣ មានត្រឹមតែ៧២៧ករណីប៉ុណ្ណោះ។

លោកស្រី បានពញ្ញាក់អារម្មណ៍ដល់សាធារណជននៅក្នុងប្រទេសម៉ាឡេស៊ីថា ស្ថិតិនៅមានចំនួនតិចតួចនៅឡើយ ប៉ុន្តែនិន្នាការហាក់ដូចជាមានការកើនឡើងគួរឲ្យព្រួយបារម្ភ។ យ៉ាងណាមិញមន្ត្រីជាន់ខ្ពស់រូបនេះបានព្រមានថា វិបត្តិអាចនឹងកើតមាន ព្រោះការទិញទំនិញតាមអនឡាញ និងការទិញទំនិញដោយប្រើសេវាកម្មបងរំលស់អាចនឹងធ្វើឲ្យយុវជនផុងខ្លួនជាមួយបំណុល។

តាមការសិក្សាមួយ ដែលបានធ្វើឡើងដោយវិទ្យាស្ថានបណ្តាញអប់រំហិរញ្ញវត្ថុម៉ាឡេស៊ី ដែលគេបានស្ទាបស្ទង់ចំណេះដឹងអំពីការគ្រប់គ្រងហិរញ្ញវត្ថុនៅក្នុងចំណោមពលរដ្ឋវ័យក្មេង ដែលមានអាយុចន្លោះពី១៩ឆ្នាំដល់៣០ឆ្នាំ បានបង្ហាញថា មធ្យមភាគនៃចំណេះដឹងមូលដ្ឋានហិរញ្ញវត្ថុរបស់ពួកគេស្ថិតនៅក្រោមកម្រិតស្តង់ដាកំណត់៕

ដោយៈ សរ សុជាតិ